Hatutan.com, (06 Jullu 2026) Díli-Portavóz Polísia Nasionál Timor-Leste (PNTL), Superintendente-Xefe Polísia João Belo dos Reis, informa polísia sei kaptura autór sama bandeira nasaun sira ne’ebé joga iha Kopa Mundiál 2026.

ortavóz Polísia Nasionál Timor-Leste (PNTL), Superintendente-Xefe Polísia João Belo dos Reis. Foto/Juvinal Cabral dos Santos

Autoridade Polísia   husu ba adeptu sira atu respeita simbolu nasaun hotu nian, inklui nasaun sira  ne’ebé kompete iha Kopa Mundiál.

Portavóz Polísia Nasionál Timor-Leste (PNTL), Superintendente-Xefe Polísia João Belo dos Reis haktuir, relasiona ho asaun sidadaun balun  ne’ebé  foin lalais sama bandeira Portugál, virál iha média sosiál PNTL asegura ona  no submete ba  investigasaun kontinua buka tuir autór seluk ne’ebé involve.

“Alin mane ida ne’ebé iha Lurumata ne’ebá sama Bandeira Portugál, tanba ne’e simbolu nasaun ida nian ita labele tolera asaun ida ne’e Diresaun Servisu Investigasaun Kriminál (DSIK) lokaliza ba  iha nia fatin foti mai no halo ona investigasaun ba nia”, Portavóz Polísia Nasionál Timor-Leste (PNTL), Superintendente-Xefe Polísia João Belo dos Reis ba jornalista sira iha sala Konferensia Kuartel Jerál PNTL, Caicoli, Segunda(06/07/2026).

Portavóz PNTL, Superintendente Polísia João Belo dos Réis , informa, sira iha koordenasaun nafatin ho Komandu Munisípiu sira atu buka tuir autór sira ne’ebé halo asaun sama Bandeira nasaun nian iha ne’ebé de’it.

“Ha’u hakarak husu ba adeptus sira ba nasaun sira  ne’ebé joga iha kopa mundiál , katak ita-boot sira iha direitu espresa ita-boot sira-nia kontente, maibé primeiru tenke respeitu nafatin regra kodigu estrada nian, depois respeitu mós simbolu Bandeira nasaun sira ne’ebé mak kompete iha ne’ebá.  Tanba ne’e la’ós hena baibain ne’e simbolu Bandeira nasaun ida nia, ne’ebé ita tenke respeita nafatin labele sama, labele sunu no labele estraga”, dehan Portavós PNTL.

Superintendente-Xefe Polísia João Belo dos Reis esplika, bainhira iha sidadaun sira ne’ebé estraga ka sunu no la respeitu Bandeira nasaun sira seluk nia  PNTL sei halo intervensaun no sei kaptura ba sira ne’ebé envolve iha laran.

“Ita nafatin fó aviza katak bainhira akontese violasaun hanesan nee, polísia sei halo intervensaun imediata no kaptura ema sira ne’ebé envolve, atu responde tuir dispozisaun legal sira ne’ebé vigora,” Portavóz Komandu Jerál PNTL informa.

Jornalista: Juvinal Cabral dos Santos