Hatutan.com, (09 Jullu 2026), Díli–Polísia Sientífika Investigasaun Kriminál (PCIC)  kolabora  ho Servisu Nasionál Intelijénsia  (SNI),  Kuarta-kalan, hale’u tuku 21:00 Otl, detein sidadaun estranjeiru na’in-99 ne’ebé suspeita envolve iha atividade ilítiu sira hanesan burla informátika no jogu  online ka scam call centre  iha armazém ida iha Bebonuk, Díli.

Polísia detein sidadaun estranjeiru na’in-99 iha armazen ida iha Bebonuk tanba deskonfia pratika atividade ilísitu. Foto/Marcelino Tomae

Tuir informasaun ne’ebé Hatutan.com  asesa husi fontes servisu informasaun sekretá  iha  Kinta (09/06/2026), katak iha Kuarta-kalan ekipa Konjunta  liu husi PCIC ho SNI halo monitorizasaun bá movimentu ne’ebé konsidera estrañu husi grupu sidadaun estranjeiru, maioria nasionalidade Xina, ne’ebé halibur hamutuk liu ema 100 iha armazém ida iha área Bebonuk.

Durante fulan ida PCIC monitoriza no deskobre katak iha atividade kriminál burla informátika no mós esplorasaun Ilisita bá jogu online,  nune’e  iha  Kuarta-kalan  ekipa PCIC ho kolaborasaun husi SNI  halo inspesaun surpreza hodi detein  Xines na’in-98 no sidadaun Kambodia na’in ida  (1).

Iha operasaun surpreza ne’e konsege prende  sobjetu sira hanesan komputadór  hamutuk unidade 88, laptop 13, Telemóvel  27, no mós iha Osan balún maibé sida’uk sura  inklui telemóvel privadu balún mós sida’uk sura.

PCIC sei prepara auto notísia liu husi investigasaun no identifikasaun hodi remete bá Ministériu Públiku (MP).

Jornalista: Marcelino Tomae