Hatutan.com, (10 Jullu 2026), Díli–  Prezidente Repúblika (PR), José Ramos-Horta, husu autoridade seguransa sira hanesan Polísia Sientífiku Investigasaun Kriminál (PCIC),  Polísia Nasionál Timor-Leste (PNTL),  Ministériu Públiku no Tribunál sira atu hametin servisu hodi kombate forma hotu krime organizadu ne’ebé infiltra mai Timor-Leste.

Lee Mós: Lutu Nasaun Kuak Ona, Krime Transnasional Buras iha Timor-Leste

Suspeitu sira kazu scam call centre ne’ebé PNTL kaptura iha Metiaut, Kinta (09/07/2026). Foto/Juvinal Cabral dos Santos

Prezidente Repúblika hatete katak mensajen polítika ne’ebé importante liu mak Estadu tenke hametin luta hasoru krime organizadu, no labele iha interese ruma ne’ebé impede aplikasaun lei.

“Atividade jogu ilísitiu scam call centre ne’e, klaru PCIC ho PNTL, PGR, Tribunál sira, ha’u hatete de’it maka ne’e, mensajen polítika, ita tenke luta maka’as kontra butamak ida-ne’e, kontra krime organizadu, husi ne’ebé de’it la bele interese,” Prezidente Repúblika informa ba jornalista sira, Sesta (10/07/2026).

PR Horta subliña,  autoridade kompetente sira tenke kontinua halo investigasaun no aplika lei ho independénsia atu prevene no hasai rede krime organizadu ne’ebé bele ameasa seguransa no estabilidade nasaun.

Nia afirma, tanba rai sira ne’ebé  iha ASEAN ne’e , enfrenta krime organizadu,  tanba krime organizadu ne’e sira tenta tama iha rai hotu-hotu, Europa no Amérika iha.

Xefe Estadu   husu bá autoridade sira seguransa sira katak banhira kaer ona autór ka suspeitu labele husk sira halai, mezmu karik viola lei, husik sira iha otel prodeo Becora labele husik sira sai.

Jogu Online  kontinua akontese iha Timor-Leste,  tuir  RR Horta katak ne’e normál,  tanba rai boot  liu Timor, liu-liu iha Austrália no iha esperiénsia boot liu iha Timor ‘, maibé krime organizadu tama iha sira nia territóriu.

“Austrália ne’e Profisionál, efisiensiente,  ha’u koñese di’ak, bá ha’u polísia Top  iha mundu ne’e, AFP, sira maka luta   kontra terorizmu, krime organizadu, droga, money loundry, sira apoiu ita, maibé Austrália ne’e ha’u haree krime organizadu barak  bá sira ne’e la’ós fasil,” nia dehan.

PR Horta haktuir, atividade jogu online ne’e foin maka hahú tama iha Timor-Leste, maibé autoridade sira trava ona, sei estadu  Timor-Leste halo buat ruma tastiku no todan bá autór  ka suspeitu sira ne’e , sira bele hakfodak no ta’uk  sei la mai tan.

PNTL desmantela scam call centre iha Manleuana. Foto/Juvinal Cabral dos Santos

Kona-bá jogu online  ne’e Timor-oan maka fasilita tama mai territóriu Timor,  PR Horta afirma katak, ne’e bele akontese sidadaun Timor-oan maka fasilita, maibé  ne’e normál, tanba institusaun estadu hanesan PNTL, PCIC,  Prokuradór Jerál Repúblika, kolabora ho Polísia sira iha ASEAN ho Austrália, atu servisu hamutuk hodi trava.

“Sei servisu hamutuk ho polísia sira iha nasaun seluk, ha’u fiar ida-ne’e bele trava, atividade krime organizadu ne’e,” nia dehan.

Nia afirma , atu regurozu liután, tneke5 haree tan lei fun ruma tan atu nune’e lei ne’e radikal liu, signifika,  kualker sidadaun ne’ebé tama  iha territóriu Timor, akuzadu bá krime organizadu, la bele  fó hanesan hela iha uma ka rezidensia, tenke bá kedas Bekorra.

“Bá Becora atu hein julgamentu  ka la julgamentu,  hodi hein tinan ida ka tinan rua, to’o julgamentu,” nia afirma.

PR Ramos-Horta propoin beibeik ona bá Governu no Parlamentu Nasionál, atu haree bá lei sibernetíka, tanba ne’e  bele fó flexibilidade, falsilita bá polísia halo servisu tanba krime organizadu kaer  ema ida,  tenke investiga to’o hetan sé maka kaer redi sentrál.

Iha semana rua ikus ne’e, autoridade sira desmantela atividade scame call centre iha fatin haat iha Timor-Leste, kompostu husi; ida iha Tibar-Liquiça no sentru scame call centre tolu iha Díli, hanesan iha Manleuana, Metiaut ho Bebonuk.

Husi operasaon buska, apreensaun no detensaun ne’e, autoridade sira konsege kaptura ona ema kuaze atus rua (200) maioria ema estranjeiru ho nasionalidade Indonézia, Xina ho Kamboja.

Jornalista: Marcelino Tomae