Hatutan.com, (10 Outubru 2022), Díli– Polísia Sientífika Investigasaun Kriminál (PCIC, sigla portugés) kontinua hetan konfiansa hosi Tribunál hodi hakle’an investigasaun bá kazu droga ne’ebé envolve arguido na’in-sia (9) hodi rekolla prova sira ne’ebé ajuda prosesu investigasaun.

Lee Mós : TR Seidauk Foti Desizaun Rekursu MP Kona-bá Kazu Droga hosi Arguido Na’in-sia

PCIC lori arguidu sira kazu ilísitiu bá droga bá TDD, Segunda (15/08/2022). Foto/Dok.Hatutan.com

Liuhosi konfiansa Tribunál nian ne’e, Segunda (10/10/2022), PCIC hamutuk ho nia parseiru estratéjiku Servisu Nasionál Investigasaun (SNI) halo mandadu buska domisiliariu  bá arguido na’in-lima (5) nia rezidénsia.

Arguido na’in-lima ne’e ho inisiál mak hanesan  MM, SSO, M, AY ho J. “ Ita ohin ezekuta mandadu buska domisiliariu lima ne’e kontinuasaun hosi kazu anterior nian ne’ebé Tribunál fó nafatin konfiansa bá PCIC hodi halo mandadu buska hodi rekolla prova sira ne’ebé ajuda prosesu investigasaun,” Adjuntu PCIC,  Adino Cabral haktuir bá jornalista iha nia knar fatin.

Advertisement

Hatán kona-bá prova saida de’it mak  PCIC rekolla hosi mandadu buska domisiliariu ne’e, Adino Cabral hateten, nia la bele esplika kle’an tanba sei iha prosesu investigasaun.  

“Importante ita ezekuta orden hodi halo buska no kumprimenta bá orden Tribunál nian. Iha operasaun buska nee servisu hamutuk ka junta ho SNI hanesan parseiru prinsipál,” nia hateten.

Iha loron 15 fulan-Agostu 2022, Tribunal Distritál Dili (TDD) liuhosi  juis singular José Gonçalves, deside aplika medida koasaun Termu Identidade Rezidénsia (TIR) no Aprezentasaun Periódika bá arguidu na’in-sia (9) ne’ebé deskonfia envolve iha kazu ilísitu bá droga.

Lee Mós : Faktus La Forte, Arguidu Na’in-rua Ne’ebé Deskonfia Involve Iha Kazu Droga Hetan TIR

Arguidu na’in-sia (9) ho inisiál DGS, MM, B, MAA, AY, SSO, M, CRM ho J iha obrigasaun legal atu aprezenta aan fulan ida dala ida iha Polísia Sientífika Investigasaun Kriminál  (PCIC).

Advertisement

Tribunál aplika medida koasaun ne’e, tanba laiha faktu sufisiente atu lori arguidu sira ba prizaun preventiva, maske arguidu sira konfesa faktu ne’ebé Ministériu Públiku (MP) aprezenta, maibé arguido sira hanesan vítima tanba sira konsumu de’it la’ós trafikante ka la’ós distribuidór.

 Ministériu Públiku (MP) liuhosi Prokuradór Rogério Viegas, halo rekursu kontra desizaun Tribunál Distritál Dili (TDD) liuhosi juiz José Gonçalves, ne’ebé aplika medida koasaun Termu Identidade Rezidénsia (TIR) no aprezentasaun periódika bá arguidu na’in-sia (9) ho inisiál  DGS, MM, B, MAA, AY, SSO, M, CRM ho J.

Konteúdu hosi rekursu ne’e rasik, husu atu halo alterasaun bá medida koasaun TIR no aprezentasaun periódika bá fali Prizaun Preventiva.

Lee Mós : Iha Relasaun ho Arguido Na’in-Sia Kazu Droga, Suspeitu FA Submete bá PI

Jornalista : Rogério Cárceres

Advertisement