Hatutan.com, (12 Outubru 2022), Díli—Comissão Anti Corrupção (CAC), liuhosi ekipa Medida Prevensaun no Kombate Korrupsaun, Kuarta 12 Outubru 2022, haleu tuku 09:30 to’o iha servisu Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, iha Palásiu Governu Díli hodi halo buska no apreensaun inklui tau alzema (borgol) ba assessor ida iha Gabinete MAPKOMS ho inisiál G.

Comissão Anti Corrupção (CAC), liuhosi ekipa Medida Prevensaun no Kombate Korrupsaun, Kuarta 12 Outubru 2022, haleu tuku 09:30 halo buska no apreensaun inklui tau alzema (borgol) ba assessór Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo ho inisiál G iha Gabinete MAPKOMS Palásiu Governu Díli. Foto Hatutan.com/Elio dos Santos da Costa.

Bainhira tun hosi karreta, ekipa CAC nian diretamente sa’e bá gabinete MAPKOMS no hetan asesór ne’e hala’o hela servisu.

Lee Mós: Hafoin Ferias Judisiáriu PGR Sei Ko’alia Kazu Set-top Box RTTL,E.P

Ho nune’e, investigadór ida ne’ebé lidera hela mandadu buska no apreensaun ne’e, halo tiha esplikasaun oitoan kona-bá razaun sira-nia prezensa iha gabinete MAPKOMS.

Esplika tiha nune’e, ekipa CAC nian ne’ebé envolve iha prosesu ne’e halo kedan kapturasaun bá MAPKOMS nia asesór ho inisiál G ne’e no lori kedan tun ba fatin ne’ebé karreta CAC nian estasiona hela, nune’e kontinua transporta kedan bá edifísiu CAC iha Faról, Díli.

Atuasun CAC nian ne’e, iha relasaun ho kazu projetu instalasaun Set-Top Box, bá Rádiu no Televizaun Timor-Leste, Empréza Públika (RTTL,EP) ne’ebé diskonfia fó prezuizu ba Estadu ho montante orsamentu $7,680.00.

Observasaun Hatutan.com iha terrenu nota katak, funsionáriu sira ne’ebé servisu hela iha arredór Palásiu Governu hakfodak no dúvida tebes, tanba haree asesór MAPKOMS ne’ebé ekipa CAC “borgol” metin liman rua.

Informasaun ne’ebé Hatutan.com rekolla iha terrenu, hosi fontes sira CAC nian katak, iha loron ne’e mós ekipa ne’e halo apreensaun no detensaun ba na’in ba empreza DILI ETERNAL INNOVATION INFORMATION, Lda ne’ebé iha asaun 40%.

Hosi konteúdu relatóriu, CAC konsege identifika prejuizu direta bá Estadu ho montante $7,680.00 ne’ebé identifikadu liuhosi Set Top Box hamutuk 256 ne’ebé kompañia indikadu DILI ETERNAL INNOVATION INFORMATION, Lda, seidauk halo instalasaun, maibé prejuizu ne’e sei aumenta makas bainhira kontinua halo inspesaun no kontinuasaun bá benefisiáriu hirak ne’ebé simu ona STB iha suku besik atus ida resin iha Munisípiu lima hanesan Díli, Aileu, Ermera, Liquiça no Bobonaro, tanba STB barak maka seidauk halo instalasaun no benefisiáriu rasik maka halo instalasaun la’ós kompañia.

Prejuizu indireta seluk ne’ebé Estadu sofre hamutuk $674,581.7 no prejuizu ida ne’e hetan bainhira halo komparasaun entre estimasaun kustu ba instalasaun STB ne’ebé halo hosi RTTL.EP ho valor $225.400 ho valor kontratu ba projetu ne’ebé maka asina husi MAPCOMS no kompañia DILI ETERNAL INNOVATION INFORMATION (DEII) Lda ho valor $899.981.70.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza   DILI ETERNAL INNOVATION INFORMATION, Lda nu’udár sósiu hosi Melánia da Silva Fernandes Capela, ne’ebé tempu ne’ebá asume knaar Sekretaria iha Gabinete Prezidente FFTL.

Lee Mós: Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

Jornalista: Rogério Pereira Cárceres