Hatutan.com, (12 Outubru 2022), Díli-Komandu Jerál Polisia Nasionál Timor-Leste (PNTL) liuhosi Segundu Komandante Jerál, Komisáriu Mateus Fernandes, bolu “urjente” Ajente Xefe Polísia Gastão Piedade, hodi hasoru malu iha kuartél jerál PNTL, Kuarta (12/10/2022).

Lee Mós : Kazu Osan $130.000, PCIC Remete Ona Bá Ministériu Públiku

Ajente Xege Polísia Gastão Piedade simu hela telefone hosi PM Taur Matan Ruak. Foto/Repro

Informasaun ne’ebé Hatutan.com asesu katak, razaun komandu bolu “urjente” Ajente Xefe Gastão Piedade, tanba relasiona ho kazu apreensaun osan fíziku ho montante $130.000 ne’ebé prende hosi autoridade polisiál sira iha Aeroportu Internasionál Prezidente Nicolau Lobato, Tersa, 04 fulan-Outubru 2022.

La’ós ne’e de’it, parte komandu PNTL bolu “urjente” nia Ajente Xefe ne’e, tanba deskonfia Vise-Ministru Interior (MI), António Armindo, husu bá komandu PNTL atu halo fó presaun bá Xefe Investigadór Servisu Nasionál Intelijénsia (SNI) ne’e  tanba ho lian-maka’as ko’alia hasoru membru Governu na’in-rua (2) hosi KHUNTO, bainhira sira bá husu SNI atu fó fila osan ne’ebé autoridade polisiál sira prende.

Osan ne’e partidu Kmanek Haburas Unidade Nasionál Timoroan (KHUNTO) nian ne’ebé nia militante na’in-tolu (3) tenta atu lori sai bá Indonézia liuhosi Aeroportu Prezidente Nicolau Lobato ho objetivu atu bá kompras nesesidade partidu KHUNTO nian bá atividade kampaña polítika iha eleisaun jerál 2023.

Hafoin sorumutuk, Ajente Xefe Polísia Gastão Piedade, ne’ebé foin sai hosi sala Komisáriu Mateus nian, jornalista sira see kedan telefone ho kamera hodi halo gravasaun video no audio. Infelizmente Xefe Investigasaun Servisu Nasionál Intelijénsia (SNI) ne’e, lakohi fó ninia komentáriu ruma kona-bá sorumutuk ne’e.

Iha fatin hanesan, jornalista sira tenta ona hodi konfirma ho Komisáriu Mateus Fernandes, maibé lakohi fó nia komentáriu, ho razaun katak, kondisaun saúde la permite atu ko’alia ho jornalista sira.

Vise-MI Rejeita Halo Presaun

Iha sorin seluk, Hatutan.com, tenta ona halo konfirmasaun ho Vise-Ministru Interiór, António Armindo, kona-bá informasaun ne’ebé espalla katak, deskonfia nia parte husu bá Komandu PNTL atu fó presaun bá Ajente Xefe Polísia Gastão Piedade, liu-liu demite hosi instituisaun seguransa ne’e, maibé nia parte rejeita, katak informasaun ne’e laloos.

Rejeisaun ne’e Vise-MI, António Armindo, hato’o bá Hatutan.com, iha via telefone Kuarta (12/10/2022).

“Hakarak hateten de’it katak, depois akontesimentu iha aeroportu ne’e, ha’u nu’udár Vise-Ministru Interior, seidauk halo karta ruma bá komandu jerál PNTL, tanba ha’u hatete katak, membru ne’e servisu ho SNI temporariamente, la’ós ho PNTL,” António Armindo hateten.

Jornalista: Rogério Pereira Cárceres