Hatutan.com, (07 Outubru 2021), Dili—Polísia Nasionál Timor-Leste (PNTL), Unidade Polísia Marítima (UPM), la hala’o operasaun iha tasi laran durante fulan haat, hahú hosi Juñu to’o Outubru, tanba kondisaun ró patrullamentu Kay Rala ho Lusitania aat grave.

Komandante Unidade Polísia Marítima (UPM), Superintendente Polísia, Basílio de Jesus. Foto/Hatutan.com.

Oras-ne’e parte UPM buka hela meius atu bele hadi’a ró rua ne’e, nune’e iha Novembru bele utiliza no reativa patrullamentu rutina iha tasi-laran.

Notísia iha Relasaun:Deskobre fukun-sira fó espasu ba pasajen ilegál buras iha fronteira

“Ha’u iha esperansa katak, novembru di’ak ona. Sé la di’ak, pasiénsia ita hala’o servisu ho buat ne’ebé ita iha,” Komandante UPM, Superintendente Polísia, Basílio de Jesus, hateten iha kna’ar fatin Lecidere, Kinta (07/10).

Hatán bá situasaun ne’e, Komandante Jerál PNTL, Komisáriu Faustino da Costa, hateten dezde sosa ró hirak-ne’e, to’o ohin loron seidauk halo manutensaun, tanba fatin atraka mak laiha.

Alende ne’e, problema ne’ebé difikulta manutensaun ne’e, tanba grau másimu iha tasi Timor as no laiha ekipamentu adekuadu atu tun ba tasi okos hodi halo matensaun.

TL mós laiha ró boot atu bele tula ró Lusitania ne’e iha laran, hodi halo manutensaun, ne’ebé oras-ne’e ahu-ruin obriga mákina ró la funsiona, maibé Komandu sei esforsu buka meius atu rezolve situasaun ne’e.

“Ita iha osan ba manutensaun, maibé ita laiha fatin ne’ebé merese atu tula ró sira ne’e mai iha rai-maran hodi halo manutensaun,” Faustino da Costa, hateten ba jornalista iha Palásiu Prezidensiál, Bairru-Pité, Kinta (07/10).

Antes ne’e UPM iha ona ró ki’ik balun, inklui ró boot tolu, ida Governu Xina mak oferese, Ró Kay Rala Governu Koreia mak oferese no Ró Lusitania sosa ho Orsamentu Jerál Estadu (OJE) 2011. (ger)