Hatutan.com, (28 Outubru 2022), Kupaun—Prezidente Repúblika (PR), José Ramos-Horta, delega antigu Komisáriu Polísia Nasionál Timor Leste (PNTL), Longuinhos Monteiro, hasoru malu ho Eurico Guterres iha Kupaun, Timor Osidentál, Sesta (28/10/2022).

Lee Mós : Dokumentu Fraternidade Umana Lori Horta Hasuru Lopes da Cruz ho Eurico Guterres

Eurico Guterres tara tais bá Longuinhos Monteiro bainhira hasoru malu iha Kupaun, Timor Osidentál, Sesta (28/10/2022). Foto/victorynews.id

Sorumutuk ne’e nu’udár jestu ida atu hametin liután rekonsiliasaun ho Indonézia liuhosi hasoru malu ho lider sira pro-autonomia iha Timor Osidentál.

Sita hosi INewsBelu.Id  katak delegasaun Timor-Leste nian ne’ebé lidera hosi antigu Prokuradór Jerál Repúblika (PGR, sigla portugés), Longuinhos Monteiro, lori mensajen Prezidente Repúblika, José Ramos-Horta ho esperansa hametin rekonsiliasaun no reafirma fali relasaun amizade ne’ebé harii nanis tiha ona hafoin Timor-Leste restaura nia ukun rasik an iha tinan 23 liubá.

“Prezidente Repúblika Timor-Leste, José Ramos-Horta hato’o hela mensajen  rekonsiliasaun atu restaura hikas relasaun amizade entre Timor-Leste ho Indonézia,” Longuinhos Monteiro hateten.

Tuir Longuinhos Monteiro, sorumutuk ne’e mós nu’udár parte ida hosi vizita Prezidente Repúblika, José Ramos-Horta nian bá Kupaun, foin lalais ne’e.

Biban ne’e, Eurico Guterres hateten, sira-nia parte ho kontente simu Prezidente Repúblika Timor-Leste, José Ramos-Horta nia hakarak atu iha rekonsiliasaun hosi fuan ba fuan entre Timoroan sira iha Timor-Leste no iha Timor Osidentál.

“Istória pasadu la’ós atu haluha, maibé mós la’ós sai razaun atu impede Estadu no povu Indonézia ho Timor-Leste nia relasaun amizade,” Eurico Guterres afirma.

Lee Mós : Eurico Guterres ho Nia Grupu Prontu Kontribui bá Konseitu Fraternidade Umana

Jornalista : Vito Salvador