Hatutan.com, (14 Novembru 2022), Díli—Prezidente Federasaun Futeból Timor Leste (FFTL), Francisco Martins da Costa Pereria Jerónimo, eleitu nu’udár vise-prezidente Federasaun Futeból ASEAN nian (AFF, sigla ingles) períodu 2022-2026.

Lee Mós : Abaixo Assinado no Ejizénsia bá Francisco Jerónimo Atu Rejigna-an Hosi FFTL

Prezidente FFTL, Francisco Jerónimo eleitu nu’udár vise-prezidente AFF períodu 2022-2026. Foto/Pajina Facebook FFTL

Francisco Jerónimo, atuál Ministru Asuntu Parlamentár no Komunikasaun Sosiál (MAPKOMS)  eleitu bá kargu vise-prezidente AFF liuhosi Kongresu Ordináriu AFF 2022  ne’ebé hala’o iha Siem Reap, Cambodia, iha loron 14 fulan-Novembru 2022.

Sita hosi pájina Facebook Federasaun Futeból Timor Leste (FFTL) katak kongresu ordináriu AFF nian ne’e  re-eleitu Khiev Sameth nu’udár prezidente AFF bá períodu 2022-2026.

Nomeasaun bá Francisco Jeronimo hanesan vise-prezidente AFF nu’udár orgullu boot bá timoroan. Ho nune’e, Sekretáriu Estadu Juventude no Desportu (SEJD), Abrão Saldanha,  hato’o nia parabens bá prestasaun ne’ebé Francisco Jerónimo hetan iha nivel rejionál no mundiál.

“Ne’e oportunidade di’ak bá timoroan tanba ita timoroan ida mak hola parte iha estrutura AFF. Ha’u nia parabéns bá Prezidente FFTL, Francisco Jerónimo,” Abrão Saldanha haktuir jornalista sira iha SEJD, Segunda (14/11/2022).

Liuhosi pájina ofisial Facebook FFTL nian hato’o mós kongratulasaun bá atuál prezidente FFTL, Francisco Martins da Costa Pereira Jerónimo, ne’ebé eleitu nu’udár vise-prezidente AFF iha Kongresu Ordináriu AFF 2022 iha Siem Reap, Cambodia, bá períodu 2022-2026.

FFTL mós hato’o kongratulasaun bá mós Khiev Sameth ne’ebé re-eleitu nu’udár prezidente AFF bá períodu 2022-2026.

Jornalista : Vito Salvadór