Hatutan.com, (05 Dezembru 2022), Díli— Governu Japaun iha kompromisu boot atu kontinua hametin relasaun bilaterál hodi tulun dezenvolvimentu Timor Leste (TL) iha seitór edukasaun, saúde, agrikultura no seitór sira seluk.

Embaixadór foun Japaun Kimura Tetsuya entrega karta kredensiál bá Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Segunda (05/12/2022). Foto/Media PR.

Embaixadór foun Japaun Kimura Tetsuya hato’o kompromissu ne’e durante entrega karta kredensiál ba Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, Segunda (05/12/2022).

Lee Mós: Japaun Konstrui Postu Saúde Ida iha Souro

“Iha aprejentasaun karta kredensiál ne’e Prezidente Repúblika no Embaixadór Japaun foun Kimura Tetsuya ko’alia kona-bá mobilizasaun apoiu hosi Governu Japaun ba Timor Leste iha seitór sira relevante ho dezenvolvementu Timor Leste durante tinan 20 ikus no sei kontinua apoia iha futuru,” Vise-Ministru Negósius Estranjeiru no Kooperasaun (MNEK), Julião da Silva hateten.

Xefe Estadu mensiona kona-bá apoiu hosi Governu Japaun nian ba dezenvolvimentu ekonómiku, dezenvolvementu greater sunrise no servisu sira seluk ne’ebé sei apoia Timor Leste nia adezaun ba ASEAN.

Kooperasaun ne’ebé Timor Leste iha ho Japaun kobre área sira hanesan infraestrutura iha ne’ebé Timor Leste husu atu hahú iha tinan 2023 konstrusaun ba Aeroportu Komoro bele hahú.

Husu mós atu Governu Japaun kontinua oferese bolsu estudu ba Timoroan sira liu hosi Ajénsia JICA, fó mós énfaze atu Japaun kontinua tulun iha seitór agrukultura no peskas no ikus liu husu atu seitór privadu ka ajénsia sira Japaun nian bele mantein apoiu no tulun ba dezenvolvimentu investimentu greater sunrise.

Governu Japaun hahú mós diskute posibilidade sira atu simu traballadór Timoroan ne’ebé sei ba servisu iha Japaun no Governu TL liu hosi SEPFOPE hahú esplora oportunidade sira ne’e hodi haree posibilidade atu prepara foinsa’e sira ba servisu iha Japaun.

Jornalista: Vito Salvadór