Hatutan.com, (11 Dezembru 2022), Díli—Durante vizita Estadu Prezidente Repúblika (PR), José Ramos-Horta iha Singapura no Malázia, akompañadu hosi Xefe aldeia Fatukama, joven ida hosi Lequidoe inklui pesoál seguransa sivíl na’in-ida ne’ebé serbisu kleur liu iha rezidénsia Xefe Estadu Metiaut.

Durante vizita Estadu Prezidente Repúblika (PR), José Ramos-Horta iha Singapura no Malázia, akompañadu hosi Xefe Aldeia 03 Fatukama, meti-Aut, Lúcia Araújo, joven ida hosi Lequidoe, Anacleto de Jesus do Rego inklui pesoál seguransa sivíl na’in-ida ne’ebé serbisu kleur liu iha rezidénsia Xefe Estadu Metiaut Gaspar Soares. Foto/Média PR.

“Ha’u konvida mós xefe aldeia 03 Fatukama-Metiaut, Seguransa sivíl ida ne’ebé kleur ona iha ha’u nia rezidénsia inklui jóven ida hosi Lekidoe, Aileu. Ha’u sei halo nune’e nafatin, lori autoriedade lokál iha territóriu nasionál hodi koñese liu tán servisu Prezidente Repúblika nian iha rai-liur no halo komparasaun entre rai rua. La’ós de’it autoriedade lokál, maibé bele akontese mós ba manorin ka negosiante ambulante ida konforme rai ne’ebé besik-besik,” Hatutan.com sita deklarasaun Prezidente Repúblika, José Ramos-Horta iha komunikadu.

Lee Mós: Forum Emprezariál TL Atrai Emprezáriu 100-resin Hosi Singapura no Europa

Iha vizita ne’e mós akompañadu hosi deputadu na’in-lima hosi bankada Governu no opozisaun ne’eb’e integra iha delegasaun Xefe Estadu nian, hodi observa servisu Estadu no projeta konsensu iha Órgaun Soberanu. 

“Ha’u nia vizita Estadu  ne’e, sempre akompaña hosi Deputadu sira. Ne’e atu dehan deputadu sira kontinua akompaña direta vizita Estadu, nune’e bele apoia nafatin Xefe Estadu nia atividade no harii konsensu entre órgaun soberanu sira,” subliña.

Xefe Aldeia 03 Fatukama, meti-Aut, Lúcia Araújo ne’ebé inklui iha delegasaun ne’e sente kontente ba oportunidade, hodi observa dezenvolvimentu iha rai avansadu sira.

“Ha’u sente kontente no ba dala-uluk hanesan Xefe aldeia ida hetan konvite hodi akompaña Xefe Estadu, mai vizita Estadu iha rai-liur. Apresia tebes tanbá bele haree rai dezenvolvidu sira seluk, haree mós moris populasaun nian, sensibilidade populasaun nian, nune’e ha’u husu ba Prezidente Repúblika atu kontinua nafatin hodi lori autoriedade lokál atu akompaña nune’e bele hatene mós ema nia moris iha nasaun avansadu sira,” Xefe Aldeia 03 Fatukama, Lúcia Araújo hateten.

Hafoin observa dezenvolvimentu iha Singapura, líder komunitária ne’e husu ba ema hotu hodi fó liman ba malu no ba líder sira atu dezenvolve rai Timor-Leste.

Gaspar Soares nu’udár Seguransa Sivíl durante tinan 12 destaka iha rezidénsia privada Prezidente Repúblika no jóven ida hosi Aileu, Anacleto de Jesus do Rego agradese ba oportunidade hodi hatene servisu Xefe Estadu iha rai-liur.

Durante iha Singapura, sidadaun na’in tolu, akompaña vizita offisiál ba Palásiu hodi hasoru-malu ho Prezidente Reúblika no Xefe Governu Repúblika Singapura inklui jantar Estadu no vizita bá instalasaun projetu transformasaun bee fo’er bá bee minerál.

Ajenda Vizita bá Malázia Urjente

Prezidente Repúblika (PR), José Ramos-Horta hamutuk ho delegasaun, kontinua vizita traballu bá Malázia, hodi atende konvite hosi Primeiru Ministru (PM) Anwar Ibrahim.

“Horikalan (09/12), ha’u ko’alia ho Primeiru Ministru Malázia, Anwar Ibrahim, ne’ebé konsidera hanesan amigu bo’ot, tinan lubuk ida nia laran inklui nia família, nia hatene ha’u mai Singapura, nia foin simu posse hosi liurai bo’ot Malázia, Abdullah Pahang no husu ha’u atu hasoru Nia maibé ha’u dehan konforme ita nia tempu no Anwar nia resposta ba ha’u, sei muda programa atu ita hasoru malu. Tanbá ne’e mak horikalan ha’u deside muda urjente programa,” Prezidente Repúblika José Ramos-Horta, hateten iha komunikadu, Sábadu (10/12/2022).

Ramos-Horta konsidera Xefe Governu Malázia Anwar Ibrahim, hanesan líder mundiál no estadista koñesidu.

Durante vizita Estadu Prezidente Repúblika (PR), José Ramos-Horta iha Singapura no Malázia, akompañadu hosi Xefe Aldeia 03 Fatukama, meti-Aut, Lúcia Araújo, joven ida hosi Lequidoe, Anacleto de Jesus do Rego inklui pesoál seguransa sivíl na’in-ida ne’ebé serbisu kleur liu iha rezidénsia Xefe Estadu Metiaut Gaspar Soares. Foto/Média PR.

Malázia iha relasaun forte ho Timor-Leste dezde tinan 1999, baihira exérsitu Malázia apoia Missaun ONU iha Timor-Leste no Prezidente hakarak reforsa relasaun bilaterál ho goveru Kuala Lumpur.

“Malázia nia apoia mai Timor-Leste, dezde tempu eís-Primeiru Ministru, Mahathir bin Mohamad, missaun INTERFET no UNTAET. Ha’u sempre hanoin atu hametin liu tán relasaun ho Malázia, tanbá ne’e ha’u muda programa no informa ona ba Prezidente Parlamentu Nasionál, konsulta mós deputadu sira ne’ebé akompaña mai Singapura, Primeiru Ministru autoriza, Ministra Adaljiza no  Joaquim Amaral kontinua viázen traballu ba Malázia,” Horta esplika.

Relasiona ho adezaun Timor Leste nian ba ASEAN, Ramos-Horta hateten desde uluk kedan hahú iha tinan 2002, Malázia apoia ona Timor-Leste atu tama ASEAN no sei hadia-an neneik hodi priénxe rekézitu sira.

“Malázia dézde uluk  apoia Timor-Leste, hahú ita nia independénsia, sira hateten kedan 2002 bele tama ona ASEAN, depois hadia-an neneik nia governasaun. Ha’u mós hateten ba Primeiru-Ministru Anwar, ami  hakarak tama ona ba ASEAN iha 2023, la signifika Timor-Leste preparadu 100%, ita nunka sai perfeitu, ita sei halo esforsu maka’as hosi Janeiru to’o Novembru 2023, espera sei tama. Maibé preparasaun sira seluk kontinua nafatin, ASEAN la’ós Lalehan nune’e perfeitu mak tama, Timor-Leste sei tama durante Indonézia nia Prezidénsia iha ASEAN,” Xefe Estadu fundamenta.

Molok Xefe Estadu sai hosi Díli mai Singapura, seidauk iha planu atu kontinua vizita Estadu ba Malázia ho razaun oras-ne’e Primeiru Ministru Malázia foin simu posse no formasaun governu seidauk kompletu, nune’e vizita ne’e hanesan vizita traballu no fulan balun oin mai sei organiza vizita Estadu nian bainhira governasaun kompletu ona.

Xefe Estadu sei to’o iha Malázia iha loron 11 Dezembru no sei hasoru-malu ho Primeiru-Ministru Malázia iha Segunda-Feira semana oin ho membru governu balun no ikus liu sei hasoru malu ho liurai bo’ot Malázia, Abdullah Pahang.

Ho oras 24 nia laran iha Malázia, Xefe Estadu ho delegasaun sei fila mai Timor-Leste ho tránzita iha Bali  hafoin Kuarta sei to’o iha Díli.

Jornalista: Vito Salvadór