Hatutan.com, (13 Outubru 2021), Díli—Uma nia kakuluk monu no nakloke daudaun ona no  ko’ak boot iha kakuluk leten. Ida-ne’e maka kondisaun Edifísiu Estadu nian ida iha Díli nia-fuan.

Kondisaun Edífisiu Terminál Portu Díli grave. Foto/Hatutan.com

Terminál Portu Díli ne’ebé tempu Indonézia nian ‘luxu’ no ‘elegante’ iha sentru sidade Díli. Ohin loron, nakfilak, atu hanesan tiha uma at ida ne’ebé laiha nain.

Maske kondisaun uma kakuluk ho nia lolon sira grave tebetebes, maibé Instituisaun Estadu nian, hanesan Autoridade Aduaneira ka Alfándega, Polísia Marítima, Kuarentena, pesoál Saúde, Servisu Migrasaun, inklui mós destakamentu pesoál intelijente Estadu nian, kontinua hala’o sira-nia knar iha uma ne’e nia mahan.

Iha tempu udan, difikulta no prejudika tebes pesoál instituisaun sira-ne’e nia atendimentu no serbisu ba interese Estadu nian, tanba espasu balun udan-been suli ho livremente tama uma-laran.  

Advertisement

Prezidente Konsellu Autoridade Portuáriu Timor-Leste (APORTIL), Flavio Cardoso Neves, hateten, kondisaun edifísiu ne’e at kedas dezde 2015 no kada tinan ajente Estadu sira ne’ebé hala’o knar Estadu nian iha Edifísiu ne’e nia mahan preokupa tanba uma nia postura la favoravel ona.

Ho kondisaun edifísiu ne’e nian, APORTIL liuhusi Fundu Infraestrutura iha orsamentu jerál estadu 2021 propoin montante osan $300,000 hodi  halo reabilitasaun, maibé sei iha hela prosesu nia laran iha CNA (Comissão Nacional do Aprovisionamento)

Ba Hatutan.com iha nia serbisu fatin, Portu Díli, Kuarta (13/10/20210), Prezidente Konsellu APORTIL, Flavio Cardoso Neves, relata katak AOPRTIL iha esforsu atu halais prosesu sira kona-ba reabilitasaun terminal ne’ebé iha kondisaun aat ona ne’e   atu  bele fasilita serbisu sira portu nian liga ho tranzasaun ne’ebé iha atu asegura sasán sira ne’ebé proibidu labele tama mai Timor Leste.

Terminal Portu Díli sai mós fatin hodi ta’is sasán sira tama no sai iha portu tamba ne’e presiza atu hadi’a no iha ona prioridade no hein atu implementa.

“Ita iha hanoin atu portu ne’e muda ba Tibar mós ita nafatin fó prioridade atu hadi’a nia kondisaun infraestrutura iha Portu Díli hodi asegura droga no sasán illegal sira tama mai ita nia rai,” nia hateten.

Advertisement

Nia rekoñese katak iha tempu udan, ajénsia sira ne’ebé halo serbisu iha terminal ne’e enfrenta difikuldade boot no dalaruma labele halo serbisu ho di’ak tanba espasu ne’ebé iha kuaze udan-been tama iha tempu udan.

Iha fatin hanesan Diretór Infraestrutura Portu Díli, Gabriel Hilario Fernandes, informa tinan ne’e Portu Díli iha projetu rua. Ida mak halo reabilitasaun ba Portu Díli no ida seluk mak halo terminal foun iha parte oeste hodi fasilita serbisu portu nian.

“Prosesu tomak to’o ona iha CNA nia liman no iha tempu badak sira bele anúnsiu ona rezultadu balun relasiona ho terminal tuan ne’e.”

Gabriel Hilario Fernandes klarifika katak  konstrusaun ba terminal foun iha parte oeste tuir estimasaun tékniku ne’ebé parte Portu Díli halo ho valor orsamentu $700,000 no nia prosesu iha hela Ajénsia Dezenvolvimentu Nasionál (ADN)  no sei hein sira-nia estudu tékniku molok submete  ba CNA hodi halo konkursu públiku.

Jornalista : Vito Salvador

Advertisement