Hatutan.com, (23 Dezembru 2022), Díli- Ministru Turizmu Komérsiu no Indústria (MTCI, sigla portugés), José Lucas do Carmo da Silva,  Kinta (22/12/2022), inaugura sítiu turístiku komunitáriu Rabilau iha Postu Administrativu Maubisse, Munisípiu Ainaro, hodi promove setór turístiku ne’ebé sai prioridade VIII Governu Konstitusionál hanesan setór alternativu bá ekonomia Timor-Leste.

sítiu turístiku komunitáriu Rabilau iha Postu Administrativu Maubisse, Munusípiu Ainaro. Foto/Media MTCI

Iha diskursu ne’ebé Hatutan.com sita hosi pajina ofisiál MTCI, Ministru José Lucas do Carmo da Silva, hateten, VIII Governu Konstitusionál hatuur setór turizmu hanesan setór alternativu ida bá ekonomia rai laran, tanba ne’e Governu esforsu maka’as dezenvolve sítiu turístiku sira atu oinsá bele asegura kreximentu ekonomia ne’ebé mak efetivu, efisiente no sustentavel husi setór turizmu, nune’e bele halo diversifikasaun ekonomia Timor-Leste.

MTCI dezenvolve ona fatin turizmu Rabilau nakfila bá turizmu komunitáriu atu empodera komunidade no kapasita komunidade lokál hodi dezenvolve setór turizmu iha sira-nia área no hamosu na’in bá rekursu turístiku hodi proteje kultura no mós prezerva meiu-ambiente.

“Konseitu turizmu komunitáriu ne’e hatuur komunidade sai hanesan na’in no komunidade iha sentidu pertense iha dezenvolvimentu turizmu nia laran tanba sustentabilidade, kontabilidade no responsabilidade iha komunidade nia liman,” Ministru José Lucas do Carmo da Silva hateten.

Advertisement

Dezenvolvimentu fatin refere MTCI koopera ho Grupu Turizmu Komunitáriu Warda, tanba ne’e, komunidade Maubisse atu kuida no proteje ho areadores sítiu turístiku refere, no kuida fasilidade ne’ebé mak instala ona iha terrenu refere.

Iha fatin hanesan adjunta Administradór Munisípiu Ainaro, Olga Mendonça, husu bá Governu liuliu MTCI atu nafatin ajuda komunidade sira nune’e bele fasilita prosesu sira to’o remata.

“Ha’u husu nafatin bá Governu no MTCI atu hamutuk nafatin ho komunidade Maubisse para dezenvolve fatin turizmu Rabilau ne’e to’o remata, tanba Maubisse nu’udár fatin estratéjiku bá setór turizmu,” Rosa Olga, hateten.

Biban ne’e Koordenadór WARDA Adelino Mendonça reprezenta komunidade hato’o agradese ba MTCI tanba tulun ona komunidade Maubisse hodi dezenvolve fatin turizmu Rabilau sai fali ba turizmu komunitáriu.

Ministru MTCI, José Lucas do Carmo da Silva, hamutuk ho autoridade sira, Kinta (22/12/2022), inaugura sítiu turístiku komunitáriu Rabilau iha Postu Administrativu Maubisse, Munuisípiu Ainaro. Foto/MTCI

Sitíu turístiku ne’e  dezenvolve tanba servisu hamutuk entre komunidade Maubisse no MTCI liuhosi Diresaun Nasionál Turizmu komunitáriu no Kulturál hahú  iha tinan 2021.

Fatin turístiku refere dezenvolve ho orsamentu hamutuk US$41,070 husi montante ne’e hodi konstrui Arka Bem vindo, Haris Fatin, tanke bee-moos, instala eletrisidade ho solar painel, eskada bá pra-wedding, uma bá seguransa, no infraestrutura seluk tan.

Advertisement

Programa refere fó ona benefísiu ba komunidade no joven sira, no prepara ona juventude sira atu sai na’in ba dezenvolvimentu foho Rabilau, nune’e iha futuru joven sira senti na’in bá fatin turizmu komunitáriu ne’e hodi kuida atu bele garante  nia sustentabilidade.

Jornalista : Vito Salvadór

Advertisement