Hatutan.com, (25 Janeiru 2023), Díli—Konsellu Ministru (KM) liu hosi reuniaun iha Kuarta (25/01/2023) iha Palásiu Governu, autoriza Ministru Finansas, Rui Gomes hodi reprezenta Governu Timor-Leste asina Akordu Kontribuisaun Finanseira (Grant) ho montante millaun $37,5 hosi Ajénsia Kooperasaun Internasionál Japaun (JICA, sigla Inglés).

Orsamentu ne’e sei uza hodi finansia konstrusaun edifísiu foun terminál pasajeirus no instalasaun fasilidades apoiu iha Aeroportu Internasionál Prezidente Nicolau Lobato, Comoro.

Lee Mós: Xefe Estadu Promulga Dekretu Lei Ezekusaun OJE 2023, Introdús Kartaun Kréditu ba Titulares

“Ho assinatura akordu subvensaun públiku hosi JICA, signifika ita-nia ai-riin haat–finansiamentu hosi ADB millaun $135, Austrália millaun $73,4, JICA millaun $37,5 no kontrapartida hosi Governu – kompleta ona ho nune’e ita bele hahú ona prosesu aprovizionamentu konkursu hodi harii Aeroportu Internasionál Prezidente Nicolau Lobato,” Hatutan.com sita deklarasaun Ministru Finansas, Rui Gomes iha komunikadu.

Serimónia asinatura akordu subvensaun públiku hosi JICA sei realiza iha tempu badak no lansamentu primeira pedra ba Projetu Dezenvolvimentu Aeroportu Internasionál Prezidente Nicolau Lobato, tuir planu sei realiza iha fulan-marsu tinan ida-ne’e.

Projetu Dezenvolvimentu Aeroportu Internasionál Prezidente Nicolau Lobato (AIPNL) opta modalidade “hybrid PPP” ho nia natureza mekanizmu finansiamentu involve fontes finansiamentu oioin hanesan subvensaun públiku, empréstimu no orsamentu kontrapartida hosi Governu Timor-Leste.

Tanbá nia natureza finansiamentu ne’ebé kompleksu tebes, presiza iha liña koordenasaun servisu ne’ebé di’ak entre doadór sira hodi evita duplikasaun esforsu, rekursu no servisu sira.

Jornalista: Rogério Pereira Cárceres