Hatutan.com, (27 Janeiru 2023), Díli—Ministériu bá Asuntu Kombatente no Libertasaun Nasionál (MAKLN), iha Sesta 27 Janeiru 2023, transfere uluk ona millaun $3-resin bá Konsellu Veteranu Libertasaun Nasionál (KVLN) hodi bele finansia atividade durante tinan ida nian.

Ministru bá Asuntu Kombatente no Libertasaun Nasionál (MAKLN), Júlio Sarmento ‘Meta-Malik’. Foto/MAKLN.

Millaun $3-resin ne’e ekivále ho 60% nu’udár transferénsia dahuluk hosi Orsamentu Jerál Estadu (OJE) 2023 nian ne’ebé MAKLN transfere bá konsellu administrasaun veteranu sira nian.

Bainhira orsamentu 60% ne’e konklui ona nia ezekusaun, maka Konsellu Veteranu foti tán 40% iha Ministériu.

“Seremónia ohin, assina de’it konkordánsia ida entre konsellu atu loke dalan bá sira nia osan tinan 2023. Sira nia osan ne’ebé ho montante millaun $3,4-resin. Ohin asina akordu ne’e atu aloka daudaun bá sira ho 60%. Bainhira 60% sira gasta hotu ona tuir planu konsellu nian hotu ona, sira halo pedidu ikus atu bele finaliza ho 40%,” Ministru bá Asuntu Kombatente no Libertasaun Nasionál (MAKLN), Júlio Sarmento ‘Meta-Malik’ hateten, hafoin serimónia selebrasaun akordu ho Konsellu Veteranu iha Caicoli, Sesta (27/01/2023).

Advertisement

Iha OJE tinan 2022 nian, MAKLN transfere de’it millaun $1-resin bá Konsellu Veteranu, tanba orsamentu ne’ebé atribui bá Ministériu rasik valór ki’ik tebes. Maibé, bá tinan ne’e iha mudansa.

“Planu tomak ne’ebé Konsellu fó mai, ami la ko’a buat ida. Ami ko’a de’it verba ida ko’alia kona-bá sosa viaturas. Tanba Oitavu Governu laiha verba atu sosa viaturas. Entaun, Konsellu lori sira nia planu tomak mai, ami diskute, to’o de’it iha verba ida atu sosa viaturas ne’e mak ami ko’a, mais restu ami konsidera hotu. Tanba ne’e mak sira nia osan hodi hetan to’o millaun $3,4,” Meta-Malik hateten.

Prezidente Konsellu Veteranu Libertasaun Nasionál (KVLN), Vidál de Jesus ‘Riak Leman’ informa, ho orsamentu millaun $3-resin ne’ebé sira simu ona, bá oin sei implementa tuir programa ne’ebé mak Konsellu Veteranu rasik trasa ona. Programa importante ida maka, selebrasaun aniversáriu Veteranu nian ne’ebé monu iha 06 Marsu tinan ne’e.

“Agora, implementasaun hanesan baibain, Konsellu mós iha serbisu lubuk ida atu hala’o no hanesan mós Ministériu, iha atividade lubuk ida atu hala’o. Tanba ne’e, kuandu uma-véz osan bá ona iha Konsellu, ezekusaun ne’e tenke halo. Reprezentante sira munisipiu nian, rejioins ho estrutura konsellu nasionál iha atividade barak atu hala’o. Entaun, kona-bá loron 03 Marsu, orsamentu kuandu entrega ona, ami mós prepara atu hala’o selebrasaun ida ne’e,” Riak-Leman hateten.

Kona-bá orsamentu ho montante millaun $1,6-resin ne’ebé MAKLN transfere ona iha tinan kotuk, progresu ezekusaun atinje 99% no 1% hatama fila-fali bá kofre Estadu nian.

Advertisement

Progresu ezekusaun OJE 2022 iha MAKLN, ezekuta to’o 97%. Sura ho ezekusaun sira hosi Konsellu Veteranu nian, sira entrega fila bá kobre Estadu  montante osan 3%.

Pertájen ida-ne’e, barak liu mai hosi verba ida kona-bá kapitál dezenvolvimentu nian, iha ne’ebé Ministériu labele ezekuta, tanba ninia prosesu ne’e naruk demais.

Jornalista: Rogério Pereira Cárceres

Advertisement