Hatutan.com, (02 Fevereiru 2023), Díli—Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’ husu bá Prezidente Repúblika (PR), José Ramos-Horta, atu kontinua fó ninia konsellu, motivasaun no hanoin nu’udár Komandante Supremu bá dezenvolvimentu instituisaun forsa armada.

Militár sira iha formatura aniversáriu Transformasaun FALINTIL ba FDTL, ne’ebé hala’o iha Kuartél Jenerál F-FDTL Fatuhada, Kinta (02/02/2023).

Tenente Jenerál Domingos Raúl ‘Falur Rate Laek’ husu iha diskursu aniversáriu transformasaun FALINTIL bá FDTL dala-22 iha Kuartél Jenerál Fatuhada, Díli, Kinta (02/02/2023).

Lee Mós: Membru F-FDTL Tenke Dezempeña Funsaun Ho Profisionál no Tuir Lei

Falur Rate Laek, sente onradu ho prezensa Prezidente Repúblika no Komandante Supremu Forsas Armadas iha serimónia importante ida-ne’e, hanesan motivasaun ne’ebé boot tebetebes, tanba buat hirak ne’e hotu hanesan demonstrasaun konfiansa no dignifika ka foti mós sira-nia oin.

“Vosa Exelénsia hatene kle’an tebes kona-bá asuntus seguransa no defeza. Tanba motivu sira-ne’e hotu no tanba importánsia hosi kargu ne’ebé okupa, mak ami konta ho apoiu hosi Komandante Supremu no ami mós hein orientasoens no konsellu  tuir esperiénsia bele fó mai ami. Forsa Defeza ida-ne’e iha vontade no dedikasaun tomak atu atinji objetivu sira ne’ebé define ona hosi leten, kona-ba seguransa no dezenvolvimentu Timor-Leste,” Falur Rate Laek hateten.

Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’.

F-FDTL hatene nia misaun liu-liu misaun fundamentál hanesan defeza integridade territóriu, garantia soberania nasionál no defeza militár hasoru kualkér ameasa hosi li’ur.

Durante nia ezisténsia, forsas armadas hamriik hanesan instituisaun fundamentál ida iha garantia seguransa nasionál, iha kriasaun ambiente trankuilidade ho pás, kondisoens esensiais bá dezenvolvimentu nasionál.

“Ida ne’e mak ami-nia postura. Ami prontu atu kumpri misaun sira ne’ebé fó mai ami tuir Konstituisaun. Bainhira de’it presiza no tuir buat sira ne’ebé hakerek iha Lei ne’ebé regula empregu forsas, ami mós prontu apoia forsas no servisus seguransa ho protesaun sivíl, hodi garante seguransa no bein-estár populasaun,” afirma.

La kleur tán sei hahú períodu ida ne’ebé hanesan baibain sei karakteriza ho atividade polítika barak tebes, relasiona ho eleisoens bá Parlamentu Nasionál. Ema hotu espera no apela kona-ba konxiénsia sívika no polítika bá sidadaun sira hotu, bá responsável polítiku sira, líder organizasaun polítiku-partidária, juventude einjerál kona bá nesesidade aktu.

Maski iha diferensa no disputa sira, tenke respeita nafatin valór sira ho direitu ema hotu nian, hodi buka mantein ambiente trankuilidade no toleránsia, tuir ezemplu prátika sira demokrátika nian, ne’ebé sira hatudu ona iha tempu sira uluk.

Grupu banda F-FDTL iha formatura aniversáriu Transformasaun FALINTIL ba FDTL, ne’ebé hala’o iha Kuartél Jenerál F-FDTL Fatuhada, Kinta (02/02/2023).

“F-FDTL sei matan moris no neon na’in nafatin no prontu atu apoia no garante seguransa no trankuilidade públika bainhira de’it presiza,” Tenente Jenerál Falur Rate Laek, kompromete.

Xefe Estadu maiór F-FDTL ne’e husu bá militár sira, Ofisiais, Sarjentus, no Prasa sira hotu, atu dezempeña ka hala’o de’it funsaun tuir valór sira mak hatuur tiha ona iha misaun lulik F-FDTL nian.

Buat sira ne’ebé to’o agora sira halo ona ne’e, hanesan obra sira hotu-hotu nian. Hosi jerasaun tuan to’o militár foun sira ne’ebé foin tama. Ba oin sira sei hasoru dezafiu barak la-halimar, situasaun oioin ne’ebé sira hotu hamutuk tenke hatene enfrenta no ultrapasa.

Asegura misaun sira ne’ebé fó bá sira, prepara bá kumprimentu misaun foun sira, ho laran hakmatek hatutan ba malu sasin sira hosi jerasaun tuan bá jerasaun foun, adaptasaun bá estrutura foun sira, bá forma sira lideransa foun, ne’e mak dezafiu balu ne’ebé sira sei hasoru.

Tanba ne’e mak importante tebes atu militár hotu, hahú hosi komandante sira, komandante sira hosi eskalaun hotu-hotu to’o militár izoladu ida iha nia postu besik fronteira, iha gabinete traballu ka iha nia unidade nia ofisina, atu serbisu ho dedikasaun, ho laran tomak, hala’o ida-idak nia kna’ar ho rigór no ezijente iha kumprimentu dever sira ida-idak nian.

“Nu’udár Komandante F-FDTL ha’u konta ho imi hotu nia apoiu, la iha exesaun. Ha’u konta ho imi hotu nia dedikasaun no empeñu iha defeza valores F-FDTL nian, hanesan, lealdade, korájen, inisiativa no respeitu,” nia subliña.

Lealdade katak, tenke leal bá povu, governu, komandante no kamarada sira hotu. Miltár sira tenke ho korajen, hodi hasoru adversidade ka dezafiu sira, atu boot to’o ne’ebé de’it, ho aten-barani fíziku no konviksaun morál hodi defende povu ho Pátria.

Inisiativa katak, atu proteje Nasaun ho povu tomak tuir sira-nia kbi’it no beran. Respeitu bá ninia povu nia moris iha liberdade, la sente ta’uk ka hetan intimidasaun, no militár sira tenke kompromete-an atu defende sira ho kustu ka sakrifísiu tomak.

Jornalista: Rogério Pereira Cárceres