Hatutan.com, (02 Fevereiru 2023), Díli—Prezidente Repúblika (PR), José Ramos-Horta konsidera papél Konstitusionál FALINTIL Forsa Defeza Timor-Leste (F-FDTL) maka servisu ba pás, demokrasia no Estadu direitu, tanba ne’e responsável sira iha instituisaun militár no membru hotu-hotu tenke iha dezempeñu funsaun ne’ebé aas, atribui hodi ezerse autoridade ida-ne’ebé firme, harii membru hotu-hotu ho profisionalizmu no disiplina rigorozu.

José Ramos-Horta hala’o pasa revista ba parada militár iha aniversáriu Transformasaun FALINTIL ba FDTL, ne’ebé hala’o iha Kuartél Jenerál F-FDTL Fatuhada, Kinta (02/02/2023).

Xefe Estadu mós lembra katak, iha tinan 22 liubá nia marka prezensa iha serimónia emosionál ida-ne’ebé hala’o iha Aileu, Komandante Supremu FALINTIL, Kay Rala Xanana Gusmão, rezigna-an no entrega Komandu máximu ba Komandante Taur Matan Ruak.

Lee Mós: Ezisténsia FALINTIL Iha Tempu Rezisténsia Dignifika Povu TL

Iha okaziaun ne’e mós, Xefe Estadu entrega medalla osan-mean Prémiu Nobel da Paz ba Komandante foun FALINTIL.

Medalla ida-ne’e sei nafatin iha kuartél Jerál F-FDTL, ne’ebé hanesan ba dahuluk nu’udár prémiu Nobel da Paz oferese símbolu importante liu ba forsa gerilla, forsa Armada.

“Ohin ha’u ko’alia kona-bá imi hotu ne’ebé serbí loron-loron. Ha’u hein katak ho dedikasaun totál instituisaun ida-ne’ebé iha tempu liubá kontribui ona ho aten-barani no dedikasaun ba Libertasaun pátria nian. Ba F-FDTL atu hala’o misaun Konstitusionál hodi defende nasaun bainhira agresaun esternu akontese, asegura independénsia Nasionál no integridade Teritoriál, nune’e mós liberdade no seguransa populasaun nian,” José Ramos-Horta hateten iha diskursu aniversáriu Transformasaun FALINTIL ba FDTL, ne’ebé hala’o iha Kuartél Jenerál F-FDTL Fatuhada, Kinta (02/02/2023).

Xefe Estadu hatuta, povu ezije ba lider sira ne’ebé responsável ba instituisaun militár sira, iha dezempeñu funsaun ne’ebé aas ne’ebé atribui ba sira, ezerse autoridade ida-ne’ebé firme, harii membru hotu-hotu hosi Forsas Armadas ho profisionalizmu rigorozu, disiplina rigorozu, sein hamosu mós konsesaun ka esepsaun sira.

Ba tinan 2023, F-FDTL iha orsamentu S$33,022,685.00.  Tenke investe iha reorganizasaun no profisionalizasaun F-FDTL nian, hodi favorese kualidade duke kuantidade.

Polisia Militár iha formatura aniversáriu Transformasaun FALINTIL ba FDTL, ne’ebé hala’o iha Kuartél Jenerál F-FDTL Fatuhada, Kinta (02/02/2023).

Ida-ne’e prefere liu atu iha tropa mane no feto 1,000 ne’ebé iha motivasaun ba misaun atu serbí, hetan formasaun ne’ebé di’ak, saláriu adekuadu, ho ekipamentu ne’ebé di’ak, ho mobilidade no fleksibilidade ne’ebé aas, ne’ebé hetan benefísiu hosi insentivu sira ne’ebé di’ak, duke iha membru 5.000 ka 10.000 maibé saláriu la di’ak, la hetan treinamentu no formasaun ne’ebé ladún di’ak, ho ekipamentu ne’ebé ladún di’ak, sein foti-an no la hetan rezultadu aat.

Iha nasaun sira ne’ebé sei iha hela dezenvolvimentu nia laran, bele haree ezemplu barak kona-bá funu no forsa Defeza no seguransa ne’ebé boot tebetebes, ne’ebé la sustentavel hosi pontu dé vista finanseiru nasaun nian, sein formasaun militár ne’ebé adekuadu, ekipamentu sira ne’ebé afeta maka’as ba morál Estadu nian, hodi demotiviza sira ne’ebé sira-nia nasaun no sosiedade depende ba sira-nia seguransa no pás hanoin nian.

Orsamentu ne’e tenke kanaliza ba formasaun espesializada rekursu umanu sira ne’ebé iha, ba manutensaun no optimizasaun infraestrutura no rekursu materiál sira, hodi evita degradasaun no konsekuente lixu.

Saida mak akontese ba ro patrulla klase Shanghai rua ne’ebé sosa iha Repúblika Populár Xina no ro patrulla tolu seluk (uza) ne’ebé Governu Koreia du súl fó iha tinan 2011.

Timor-Leste tenke reforsa dezenvolvimentu programa kooperasaun tekniku-militár ho nasaun amigável sira-Austrália, Nova Zelándia, Indonézia, Malázia, Singapura, Koreia súl, Japaun, Portugál no Estadus Unidus Amérika.

Militár sira iha formatura aniversáriu Transformasaun FALINTIL ba FDTL, ne’ebé hala’o iha Kuartél Jenerál F-FDTL Fatuhada, Kinta (02/02/2023).

To’o oras ne’e Portugál sai ona hanesan belun ida-ne’ebé laran-metin, no laiha interese seluk duke povu ida nia moris-di’ak ne’ebé iha ligasaun ho nasaun ne’e dezde epójiu furak ho tinan 1.500. TL sei kontinua haburas relasaun espesiál ida-ne’e iha área hotu-hotu, sein limita, sein limitasaun.

Tanba ne’e, importante tebes atu hametin kapasidade F-FDTL nian hodi halo patrullamentu aero iha territóriu marítima Nasionál, hodi investe iha akizisaun ba veículo sira Marítimo nian.  

Timor-Leste sei moderniza Forsas Armadas, no mós Forsas seguransa, hodi hili atu hamenus númeru pesoál operasionál, ho kualidade ne’ebé aas, kualidade umanu no kualidade operasionál, ne’ebé hetan benefísiu hosi ekipamentus profisionál ne’ebé adekuadu.

Timor-Leste hasoru kontestu foun kona-bá Defeza no seguransa iha nivel Nasionál no internasionál, ne’ebé karakteriza hosi ameasa no risku sira ne’ebé la profisionál, tranznasional, krime organizadu, Terrorizmu, tráfiku armadu, tráfiku droga, tráfiku umanu, degradasaun ambientál, dezastre umanitária no moras sira. Imperativu atu asegura katak F-FDTL iha kapasidade atu responde lalais no efetivu ba dezafiu foun sira.

Memru F-FDTL iha formatura aniversáriu Transformasaun FALINTIL ba FDTL, ne’ebé hala’o iha Kuartél Jenerál F-FDTL Fatuhada, Kinta (02/02/2023).

Hodi rekoñese ida-ne’e, iha tinan 2010, harii tiha ona sistema Integradu seguransa Nasionál nian, ne’ebé prevee asaun Integradu hosi forsa Defeza no hosi servisu seguransa nian sira, liuliu, polísia Nasionál Timor-Leste nian no protesaun sivíl, hodi hala’o objetivu sira kona-ba Defeza no estratéjia Nasionál sira kona-ba seguransa nian, atubele garante legalidade Demokrátika, nune’e mós estabilidade no orden publika ne’ebé presiza ba kualkér nasaun Demokrátika, koezaun no dezenvolvidu.

Povu hein katak, F-FDTL barak. Hanesan uluk, sira halo parte fundamentál ba destinu nasaun nian, no tenke halo buat hotu-hotu, iha tempu hotu-hotu, hasoru espetativa aas liu povu nian, hodi dignifika misaun Konstitusionál Nobre ne’ebé fó fiar ba sira nu’udar defensór soberania Nasionál no independénsia no garantia orden Demokrátika nian.

Iha oportunidade ne’e,  Xefe Estadu fo mós Parabens ba ofisiál sira hotu-hotu ne’ebé ohin hetan promosaun ne’e halo parte prosesu profesionalizasaun, tranzisaun hosi Komandu 1975 tempu luta armada nei-neik ba jerasaun foun. Istória rua, istória antigu ho istória foun ne’ebé ita hakerek daudauk ona.

Ne’eduni ba sira hotu-hotu ne’ebé hetan formasaun iha rai laran, no rai li’ur parabens, parabens mós ba Komandu tomak ne’ebé organiza programa sira, organiza prosesu tranzisaun ida ne’e hosi jerasaun 1975 mai jerasaun foun forsa armada nian.

Jornalista: Vito Salvadór