Hatutan.com, (16 Fevereiru 2023), Díli—Institutu Para a Defesa dos Direitos da Crianças (INDDICA) rejista labarik 300 hala’o servisu iha dalan ninin atu apoia ekonomia família no kompleta sira nia nesesidade eskola nian.

Prezidente INDDICA, Dinora Granadeiro.

Dadus ne’e INDDICA rejsita liu hosi asesmentu ne’ebé hatudu katak labarik sira ho servisu iha dalan ninin, maioria asesu hela Edukasaun, goza sira nia direitu ba eskola no sira uza tempu livre mak hala’o servisu hirak ne’e.

Lee Mós: Primeira iha Istória, Ramos-Horta Halibur Labarik Besik 300 iha Palásiu Prezidensiál

Maioria hosi labarik sira ne’ebé fa’an sasan ka halo servisu iha dalan ninin, tuir asesmentu ne’ebé INDDICA halo maka kestaun ekonomia katak, problema ekonomia mak obriga labarik sira ne’e ajuda inan-aman halo servisu, tanba rendimentu família mínimu tebes no balun rendimentu laiha.

Advertisement

Iha labarik balun, inan ho aman sira nia servisu diáriu maka fa’an sasan tanba ne’e sira mós husu oan sira atu tulun fa’an sasan bainhira fila hosi eskola.

“Dadus ne’ebé INDDICA iha labarik kuaze 300 mak hala’o servisu iha dalan ninin, husi ne’e iha 99% mak asesu Edukasaun,” Prezidente INDDICA, Dinora Granadeiro hateten iha diálogu nasionál ho tema: “Rona ami Labarik nia lian hodi Asegura no Realiza ami nia Diretu” iha CCD, Kinta (16/02/2023).

Informasaun ne’ebé INDDICA hetan liu hosi asesmentu mós hateten katak, labarik sira ne’ebé fa’an sasan iha dalan ninin atrai liu ema atu sosa tanba ida-ne’e mak inan ho aman balun hili atu oan sira ajuda fa’an sasan tuir nesesidade ne’ebé família presiza.

Iha mós razaun seluk ne’ebé mai hosi labarik sira rasik hodi hili dalan fa’an sasan ka halo servisu iha dalan ninin tanba dalaruma la hetan osan hosi família, nune’e labarik sira deside fa’an rasik atu bele iha rendimentu pessoál ne’ebé ajuda fasilita sira hola materiál eskola no buat balun ne’ebé labarik sira rasik hakarak.

Labarik feto ida ne’ebé fa’an hela has iha arredór CCD, Kinta (16/02/2023).

INDDICA ninia preokupasaun kona-bá saida mak Estadu tenke halo atu assegura labarik sira ne’ebé involve direita iha traballu infantíl maka tenke iha Lei ruma kona-bá bandu labarik sira fa’an sasan ka involvimentu labarik sira iha Komérsiu.

“INDDICA hamutuk ho komisaun nasionál kontra traballu infantil ne’ebé hetan apoiu hosi ILO, UNICEF no Plan Internasionál dezenvolve hela draft Dekretu Lei ba kontra traballu infantíl no planu asaun nasionál kontra traballu infantil ne’ebé iha hela Ministru MCAE nia gabinete no seidauk lori ba Konsellu Ministru,” informa.

Advertisement

Tuir dadus ne’ebé iha hatudu katak, labarik sira ne’ebé fa’an sasan iha dalan ninin maioria mai hosi Rejiaun Administrativa Espesiál Oe-cusse Ambeno (RAEOA) tanba ne’e INDDICA halo ona esforsu lubuk ida hamutuk ho autoridade sira kompotente hanesan Autoridade RAEOA rasik ho Polisia no Aportil atu haree oinsa labarik sira hosi Oe-cusse asesu ba ró hodi mai Díli ka hosi Díli ba Oe-cusse, nune’e bele kontrola movimentu labarik sira nian.

Vise-Ministra Solidaridade Sosiál no Inkluzaun (V-MSS), Signi Chandrawati Verdial hateten, Governu komprometidu atu nafatin assegura labarik sira nia direitu no fó protesaun atu labarik sira kontinua goza sira nia direitu hodi dezenvolve poténsia tomak hodi ikus-mai harii futuru Timor-Leste ida ne’ebé di’ak liu.

Desde 2018 to’o 2022, Governu tau ona osan millaun $40 ba programa bolsa da mãe atu tulun labarik sira ne’ebé vulnerável bele asesu ba Edukasaun, saúde no seluk tán.

Hahú hosi 2023 to’o 2025, governu iha tan programa bolsa da mãe jerasaun foun sei buka atu nafatin hakbiit labarik sira nia direitu no fó protesaun atu labarik sira livre dezenvolve sira nia an.

Iha fatin hanesan, Prezidente Repúblika (PR), José Ramos-Horta husu Governu tenke tau prioridade ba Edukasaun no nutrisaun labarik sira nian.

Advertisement

Xefe Estadu husu ne’e tanba nutrisaun di’ak mai hosi alimentasaun di’ak, signifika Governu tenke haree hodi tau osan boot ba agrikultura no programa merenda eskolár ba estudante sira, tenke iha bee moos ba eskola sira atu garante ijiene.

“Luta kontra sub nutrisaun ne’e ida mak tenke iha bee moos, tanba maioria populasaun iha Timor-Leste hemu bee ne’ebé la tratadu, ne’e bakteria iha oin-oin no la di’ak ba Saúde.  Eskola barak bee moos de’it mós laiha. Labarik sira nia merenda eskolár kuitadu loos,” Prezidente Repúblika José Ramos-Horta husu.

Husu mós ba Governu atu nafatin halo esforsu hodi assegura direitu labarik sira nian, atu moris livre hosi violénsia, iha nutrisaun di’ak hanesan saida mak Prezidénsia Repúblika halo iha, presiza fó hahan nutritivu ba labarik sira atu garante sira moris moos no iha ijiene.

Jornalista: Vito Salvadór

Advertisement