Hatutan.com, (13 Fevereiru 2023), Díli—Sekretária Estadu Protesaun Sívil (SEPS), liuhosi Autoridade Protesaun Sívil (APC-Sigla Portugés) rejísta ema ida mate no uma 18 mak hetan estragus hosi dezastre naturál iha territóriu nasionál, durante semana ida hahú hosi 07 to’o 13 fevereiru 2023.

Diretór Relasaun Externa no Komunikasaun APC, Anacleto Caetano informa katak, kazu hosi asidente sira ne’e barak liu ho intensidade boot, halo ai-tohar, hodi hanehan komunidade sira nia uma to’o rezulta vitama balun tenke lakon vida.

Lee Mós: SEPS Rejista Tan Vítima Dezastre Naturál 200

Advertisement

“Ohin, 13 fereveiru 2023, autoridade protesaun sívil kontinua atualiza situasaun dezastre ne’ebé mak akontese iha territóriu tomak, durante semana ida. Dezastre ne’ebé afeta bá komunidade iha munipiu ualu,” Anacleto Caetano informa liuhosi konferénsia imprénsa iha kna’ar fatin Caicoli, Segunda (13/02/2023).

Uma 18 ne’ebé hetan estragu ne’e, ida iha Munisípiu Ainaro, Postu Hato-Udo, Suku Leo-lima, Aldeia Goulou, Kuarta (08/02/20233) anin sobu uma.

Iha loron ne’ebé hanesan, iha Munisipiu Covalima, Postu Administrativu Maucatar, Suku Oges, Aldeia Horum, akontese udan-boot no halo bee tama iha komunidade ida nia uma hetan estragus.

Iha Kinta (09/02/2023), akontese kazu insédiu ida iha Becusse, Suku Becora, Postu Administrativu Cristo Rei, Dili, rezulta ahi-han no estraga komunidade nia uma ida temporária ida. Iha uma ne’e okupante ka ema ne’ebé mak hela iha ne’ebá, iha xefe familia 14.

“Tuir informasaun ne’ebé mak ita hetan hosi terrenu, katak, uma ne’e ida de’it, maibé iha kuartu mak hamutuk 14, no xefe familia hamutuk na’in-14 mak hela iha uma ida ne’e,” nia hateten.

Advertisement

Apoiu emerjénsia ne’e fó kedan bá iha vitima sira iha loron akontesimentu hanesan food ho non-food (hahan no la’os hahan).

Iha Kinta (10/02/2023), iha Munisipiu Ermera, Postu Ermera Villa, Suku Poetete, Aldeia Líkisé, akontese anin-boot halo ai-tihar hanehan komunidade nia uma ida no alin feto ida ho idade tinan 7, lakon vida.

“Ai-monu hanehan uma, entaun, labarik ne’e la konsege salva vida,” diretór Caetano tenik.

Iha Munisipiu Likisá, Postu Likisá Villa, Suku Daru-lete, Aldeia Cai-leli iha 08 fevereiru 2023 akontese anin-boot, sobu komunidade nia uma hamutuk 6.

Iha Munisipiu Lautém, Postu Lautém, Suku Pairara, Aldeia Puno, iha dia 07 de fevereiru akontese anin-boot no sobu komunidade ida nia uma.

Advertisement

Iha Munisipiu Manufahi, Postu Alas, Suku Uma-Berloic, Aldeia Colocau, iha dia 08 fevereiru akontese anin-boot no sobu komunidade nia uma hamutuk 6.

Iha Munisípiu Vikeke, Postu Lakluta, Suku Dilór, Aldeia Tula-Oli, iha dia 11 akontese ahi-han komunidade nia uma ida. Totál uma ne’ebé mak hetan estragus iha 18.

Hafoin akontesimentu dezastre sira ne’e, APC liuhosi ninia ekipa iha kada munisipiu, tun direta bá halo observasaun, rekolla dadus, depois fó kedan apoiu emerjénsia bá vítima sira.

Kona-bá distribuisaun apoiu sira ho tipu rekuperasaun ninian, seidauk bele realiza, tanba oras ne’e daudaun ekipa konjunta kompostu hosi autoridade protesaun sívil ho autoridade lokál sira, sei iha terrenu hodi halo verifikasaun fali bá uma sira ne’ebé hetan estragus, kategóriza bá iha ida ne’ebé mak bele fó apoiu hanesan aat naton, aat kamán, aat totál, sei define hosi rezultadu verfikasaun.

Jornalista: Rogério Pereira Cárceres

Advertisement