Hatutan.com, (17 Fevereiru 2023), Díli—Aitana FC konkista vitória dahuluk kontra adversáriu Porto Taibessi FC iha jogu abertura primeira divizaun Liga Timorense époka 2022-2023 jornada dahuluk.

Aitana FC konkista vitória dahuluk kontra adversáriu Porto Taibessi FC iha jogu abertura primeira divizaun Liga Timorense époka 2022-2023 jornada dahuluk, ho skore 2:1, iha Estadiu Munisipál Dili, Sesta (17/02/2023).

Jogadór Ekipa Aitana FC no Porto Taibessi FC hatudu animu di’ak iha jogu abertura liga Timorense époka 2022-2023 hodi anima adeptu sira ne’ebé partisipa iha jogu abertura ne’e.

Lee Mós: Abertura Liga Timorense Époka 2022-2023, Aitana Fc Vs Portu Taibessi Fc

Bainhira arbitu Romario S. dos Santos Teti hu árbitu sinal jogu hahu, Porto Taibessi FC hola kedan inisiativa hodi halo atake liu hosi Jogadór Yohanes Yoko Jehaman (10) maibé bola ne’ebé Jogadór ne’e suta semo liu de’it hosi baliza adversáriu.

Ekipa Aitana FC la hein de’it no halo kedan kontra atake no liu hosi kontra atake ne’e ekipa Aitana FC konsege produz golu dahuluk hosi kapitaun ekipa Jilson dos Reis (10) ne’ebé aproveita bola falta iha besik liña 16.

Ekipa rua nafatin ho ritmu jogu ne’ebé iha tuir tátika ne’ebé treinadór sira fó no Porto Taibessi FC konsege halo ameasa lubuk ida ba iha ekipa Aitana FC liu hosi Jogadór avansadu Lazio Pereira (77) no Helman Bere Asan (11) maibé bola ne’ebé sira lansa seidauk bele tama ba rede laran tanba baliza rin sei satan netik.

Ekipa Porto Taibessi FC kontinua halo esforsu maibé seidauk hatudu rezultadu, tamba ekipa Aitana FC kontinua hatudu disiplina iha kada liña.

Tama ba minutu 32 Jogadór Aitana FC Rigerberd Lay (7) hetan kartaun kinur hafoin halo falta hasoru Jogadór Porto Taibessi FC.

Tama ba minutu 39 Aitana FC halo substituisaun ba Jogadór hodi hasai Herminho Moniz (31) hodi hatama Gabriel da Costa (14).

Enkuantu, tama ba minutu 44 ekipa Porto Taibessi FC mós halo substituisaun ba Jogadór hodi hasai Miguel Oliveira Silva (2) no hatama Frederico Sila (19).

Atu asegura rezultadu iha primeira parte, ekipa Aitana FC kontinua halo substituisaun iha minutu 45 hodi hasai Miguel Araújo (9) no hatama Rivaldo Correia (77).  To’o jogu primeira parte remata Aitana FC kontinua lidera ho skore provizóriu 1-0.

Tama ba segunda parte, ekipa Porto Taibessi FC kontinua halo atake ba iha Aitana FC, no tama ba minutu 54 Porto Taibessi FC hetan penalidade ida hafoin Baliza Aitana FC Francisco Tilman (15) halo falta hasoru Jogadór Porto Taibessi FC Feliz Gama (15) iha grandeal laran.

Jogadór Edencio da Costa (13) ne’ebé hetan oportunidade atu suta penalidade konsege ezekuta ho di’ak hodi muda skore ba 1-1.

Hafoin empata iha minutu 54, ekipa rua nafatin halo esforsu atu hetan vitória, nune’e treinadór sira hahú halo mudansa ba tátika no ekipa rua halo substituisaun ba Jogadór iha kada liña.

Porto Taibessi FC halo substituisaun ba Jogadór Nicson Berek (11) hodi hatama Danilson Araújo (16) iha minutu 62, no Aitana FC kontinua ho substituisaun ba Jogadór iha liña meiu kampu iha minutu 71 hodi hasai kapitaun ekipa Jilson dos Reis (10) no hatama Luis da Silva (8).

Maski ho substituisaun ne’ebé iha, ekipa rua mantein ho rezultadu 1-1, Porto Taibessi FC kontinua ho substituisaun hodi hatama Jogadór veteranu Eusebio Almeida (8) hodi hasai Lazio Pereira (77) iha minutu 80.

Tama ba minutu 88, Aitana FC konsege lidera jogu ne’e liu hosi Jogadór estranjeiru Mamoudou Conde (27) hodi muda skore 2-1.

Ho golu ne’e, ekipa rua hasae tensi no Porto Taibessi FC halo atake ho intensidade aas ba iha ekipa Aitana FC maibé la muda rezultadu ne’ebé iha.

Baliza Aitana FC Francisco Tilman (15) simu kartaun mean iha minutu 90+3 hafoin halo falta hodi kaer bola pasajen hosi nia maluk Jogadór Francelino Belo (22) iha area grandeal laran.

Maske nune’e Porto Taibessi FC falla atu halo impata no rezultadu ikus Aitana FC manan ho skore ikus 2-1.

Treinadór Aitana FC, José da Fonseca hateten rezultadu ida ne’e mai hosi esforsu ekipa nian liu hosi preparasaun no treinu ne’ebé durante ne’e iha.

“Ha’u fo parabéns ba ami nia ekipa ne’ebé ohin hatudu jogu di’ak no ikus mai ami manan. Ida-ne’e mak ami hakarak atu iha jogu dahuluk ne’e ami tenke manan,” José Fonseca hateten.

Jogadór Sénior Porto Taibessi FC Eusébio de Almeida hateten, normalmente iha jogu sempre iha ekipa ida manan no ida lakon. Ekipa ida ne’e iha preparasaun ne’ebé mínimu no ema hotu hatene liga Timorense paradu kleur tanba ne’e afeita mós ba ekipa nia performasaun.

Jornalista: Vito Salvadór