Hatutan.com, (31 Marsu 2023), Díli- Jogadór prinsipál no kapitaun ekipa As Ponta Leste Expedito da Conceição marka golu rua hodi lori nia ekipa manan Porto Taibessi FC ho skor 3-0.

Lee Mós : Makikit Laulara Lidera Tabela Klasifikasaun Primeira Divizaun Hafoin Halakon Assalam FC 2-1

Jogadór As Ponta Leste Expedito da Conceição halo selebrasaun hafoin marka golu rua ba nia ekipa. Foto/ LFTL

Ekipa As Ponta Leste no Porto Taibessi FC obrigadu tenke joga iha udan laran tamba molok jogu hahú udan tau no halo bee nalihun iha Estádiu Munisipál Díli, Sesta (31/03/2023). Nune’e,  jogadór ekipa rua tenke halo esforsu atu suta bola ho makas no halo jogu ho bola as tamba bainhira joga bola rai bola sempre belit iha bee ne’ebé nalihun.

As Ponta Leste ne’ebé mai ho ambisaun atu manan jogu ne’e hahú lansa atake bá Porto Taibessi FC iha minutu dahuluk no hamosu amiasa ne’ebé perigu.

Porto Taibessi FC ne’ebé baibain halo jogu badak no liuhosi pasajen ain bá ain falla implementa jogu ne’e tamba kondisaun kampu ne’ebé nakonu ho udan.

Tama bá minutu 3 kapitaun As Ponta Leste, Expedito da Conceição (10) marka golu ida hodi lori nia ekipa lidera uluk ho skor 1-0 hafoin halo sutu direita liuhosi oportunidade ne’ebé iha.

Maske sofre uluk golu ida, Porto Taibessi FC kontinua iha ánimu atu halo balansu bá adversáriu nia jogu. Ho esforsu ne’ebé Porto Taibessi FC halo ekipa rua nafatin halo jogu tuir ritmu ida-idak nian, maibé As Ponta Leste ne’ebé mai ho taktika joga bola as sempre lansa sutu direita bá baliza aproveita udan no bola namdoras.

Iha minutu 7 Jogadór prinsípial As Ponta Leste, Expedito da Conceição (10) marka tan golu ida hafoin konsege manan duel ho defeza sentra Porto Taibessi FC, Angiso Barbosa (12) hodi muda skor ba 2-0.

Hafoin golu ne’e ekipa rua nafatin halo atake ba malu, maibé kampu ne’ebé nakonu ho bee difikulta jogadór sira atu halo jogu ho di’ak tamba bola ne’ebé passa iha kampu laran labele to’o alvu tamba belit metin iha bee laran.

As Ponta Leste hetan tan oportunidade osan mean ida liuhosi Jogadór Luis Figo Ribeiro (7) ne’ebé mesak ho bola no lansa sutu direita bá baliza ne’ebé mamuk, maibé falla atu golu tamba bola belit metin iha bee. Ekipa rua mantein halo kontra atake ba malu no too primeira parte termina laiha tan golu ruma ne’ebé akontese nune’e As Ponta Leste mantein lidera ho skor 2-0.

Tama bá segunda parte, Porto Taibessi FC hola kedas inisiativa hodi hasae ritmu jogu no lansa kedas atake ida bá As Ponta Leste, maibé falla tanba baliza sei bele antesipa ho diak.

Atu hasae tensi jogu no hadia liña dedeza ne’ebé iha Porto Taibessi FC halo substituisaun bá liña kotuk hodi hasai Miguel Silva (2) no hatama Cláudio Araújo (4).

Ho substituisaun ne’e, Porto Taibessi FC hahú halo kombinasaun bá jogu tuir ritmu ne’ebé iha hodi organiza jogu hosi kotuk atu bele halo atake bá AS Ponta Leste.

Porto Taibessi FC kontinua halo substituisaun iha liña klaran hodi aumenta avansadu atu hasae efetividade iha liña oin ho nune’e hasai Nicson Berek (6) no hatama avansadu Jardel Piedade (9).

As Ponta Leste hahú halo tranzisaun no substituisaun bá Jogadór iha liña avansadu hodi hasai Samuel da Cruz (17) no hatama Olagar Xavier (18) iha minutu 72.

Porto Taibessi FC kontinua halo substituisaun iha minutu 73 hodi hasai Edensio da Costa (13) no hatama Eusébio de Almeida (8) atu reforsa liña klaran.

Tama bá minutu 82, Porto Taibessi FC kontinua halo subtituisaun hodi hasai Denilson Araújo (16) no hatama Nelvio Almeida (7) atu bele joga iha liña oin.

As Ponta Leste hatama tan golu ida hodi muda skor ba 3-0 liuhosi Jogadór Olagar Xavier (18) iha minutu 84. Ho golu ne’e, halo ekipa As Ponta Leste sente seguru no kontinua halo jogu hodi asegura vitória ne’ebé iha.

Hafoin golu ne’e, As Ponta Leste halo kedas substituisaun bá jogadór iha liña klaran hodi hasai Revelino Martins (22) no hatama Jacinto Soares (24).

Ekipa Porto Taibessi FC kontinua halo subtituisaun hodi hasai Yohanes Jehaman (10) no hatama Romer Martin (17) iha minutu 90+1.  Maske nune’e, to’o jogu termina As Ponta Leste mantein ho vitória 3-0.

Treinadór Porto Taibessi FC, Miro Baldo Bento fó parabéns áa ekipa As Ponta Leste ne’ebé manan nia ekipa ho skor 3-0.

Nia afirma, Porto Taibessi FC laiha ambisaun atu sai kampiaun iha liga époka 2022-2023, maibé hakarak atu mantein iha primeira divizaun.

“Porto Taibessi FC lakon ha’u hanesan Treinadór mak responsabliza no bainhira manan ami hotu kontente ho vitória,” Miro Baldo Bento tenik.

Treinadór As Ponta Leste, Edy Fernandes hato’o agradese bá jogadór sira nia esforsu mezmu udan maibé hatudu jogu ida ho di’ak no konsege rekolla vitórai.

“Ami fó orientasaun bá Jogadór sira atu kaer bola dala ida no soe  kedas bá oin hodi buka oportunidade. rezultadu hatudu ami konkista duni vitória kontra Porto Taibessi,” Edy Fernandes hateten. 

Jornalista: Vito Salvadór