Hatutan.com, (16 Marsu 2023), Díli-Tribunál Konta bele halo auditoria susesiva bá projetu peskiza atu harii armazén kombustivel ho nia kustu millaun $3-resin.

Lee Mós : Terrenu Armazén Kombustivel iha Metinaro Disputa, Timor Gap Asina Kontratu Projetu Peskiza ho Empreza MGS iha Jakarta

Rai komunidade Metinaro nian ne’ebé Timor Gap atu utiliza bá harii Armazén Kombusivel ho ektere 101. Foto/Elio dos Santos da Costa

Projetu peskiza ne’e  na’in ka project owner  mak Timor Gap Empreza Publika ne’ebé estabelese ona kontratu ho PT. Mahakarya Geo Survey (MGS)-Indonézia iha Jakarta iha loron 13 fulan-Janeiru 2023.

Diretór Jestaun Unidade Negósiu Downstream Timor Gap, Francelino Boavida, ne’ebé Hatutan.com konfirma iha nia servisu fatin iha Timor Plaza, Sesta, 10 fulan-Marsu 2023, klarifika katak kontratu kona-bá Front and Engineering Design Study halo tiha ona ho empreza ida naran Tri Patra Engineering hosi Indonézia no empreza konsultór no peskizadór  hosi Indonézia PT. Mahakarya Geo Survey (MGS) ho nia kustu millaun $3-resin.

Kontratu bá projetu peskiza ne’ebé Timor Gap estabelese ho PT. Mahakarya Geo Survey atu bele halo peskiza ka estudu viabilidade bá terrenu ka rai ho luan ektare 101 ne’ebé lokaliza iha Adeia Manuleu, Suku Wenunuk, Postu Administrativu Metinaro, Munisípiu Dili, atu harii armazén  kombustível nian.

Tuir kompeténsia Tribunál Konta nian, katak projetu sira ne’ebé ho kustu millaun $5 bá leten tenke submete bá Tribunál Konta hodi halo apresiasaun no vistu hosi Tribunál Kamara Konta.

Prezidente Tribunál Rekursu ne’ebé asume mós knar no kompeténsia Tribunál   Kamara Konta nian, Deolindo dos Santos, hateten, bá projetu peskiza harii armazén kombustivel Timor Gap nian ne’e ho kustu millaun $3 sei la to’o iha Tribunál Konta, maibé kualkér osan ne’ebé sai hosi kofre Estadu bá projetu Estadu nian sempre iha kontrola hosi Tribunál Kamara Konta.

“Ne’e signifika katak, valór kontratu ne’e menus hosi  millaun $5, mais en-kualkaer momentu, Kamara Konta bele halo auditória susesiva,” PTR, Deolindo dos Santos hateten hodi responde Hatutan.com iha kna’ar fatin, Kuarta (15/03/2023).

Prezidente Tribunal Rekursu, Deolindo dos Santos. Foto/Dok.Espesál

Auditória susesiva ne’e atu bele hatene katak, ezekusaun orsamentu sira bá iha projetu ne’e, loos ka la loos, molok halo ezekusaun. Ida ne’e só depois. Mais kona-bá atu submete bá Kamara Konta  bainhira projetu ho ne’ ho nia kustu  liu millaun $5.

PTR Deolindo informa, durante ne’e, iha mega projetu lubun ida mak Tribunál Konta admite ona vistu previa bá projetu hirak ne’ebé ho ninia valór millaun $5. Uluk liu, komesa hosi millaun $1 mais depois sa’e millaun $5.

“Entaun, barak loos. Mais buat ne’e, ha’u hanoin, dala-ruma ita-boot sira bele mai iha ne’e, tanba kualker aktu Kámara Konta nian ne’e sempre publika iha website. Só ke, buat ne’e, públiku ladún interesse atu hatene ida-ne’e,” Deolindo dos Santos hateten.

Jornalista: Rogério Pereira Cárceres