Hatutan.com, (23/12/2021), Díli—Autoridade no Komunidade Munisípiu Viqueque, Kuarta (22/12/2021), ofisiálmente asina akta termu entrega rai ektare 600 ba Governu liuhusi Ministeriu Petróleu no Minerál nu’udar área dezignadu ba planta LNG iha Beaço, Viqueque.

Vise-Xefe Estadu Maiór F-FDTL, Brigadeiru Jenerál, Falur Rate Laek, hatudu hela kuadru área dezignadu Planta LNG iha Beaço, Viqueque, 22 Dezembru 2021. Foto/Hatutan.com

Komunikadu Imprensa ne’ebé Hatutan.com asesu husi TIMOR GAP, E.P., Empreza Públiku, Kinta (23/12/2021), informa katak  hafoin  tinan naruk nia-laran, Kuarta (22/12/2021), iha Sede Suku Maluru, Beaço, Munisípiu Viqueque, asina ona akta retirasaun husi komunidade Beaço ba proposta indemnizasaun rai no propriedade ne’ebé hato’o ba Governu iha loron 16 fulan-Jullu 2019.

Governu liuhusi Ministériu Petróleu no Minerál – TIMOR GAP, E.P. hanesan jestór ba Projetu Tasi Mane halo aproximasaun hodi loke dialogu ho komunidade Suku Maluru, Beaço, autoridade lokál, lia-na’in, juventude, veteranu sira no mós jerasaun Patriota hamutuk ho Governu lokál Munisípiu Viqueque no entidade relevante sira seluk ne’ebé realiza tiha ona iha loron 25 fulan-Novembru 2021 tuir kultura Suku Maluru, Beaço nian.

Durante dialogu ne’ebé hala’o ho komunidade Suku Maluru, Beaço, verbalmente deklara hodi retira proposta indemnizasaun ba rai no propriedade área dezignadu planta LNG nian ne’ebé hato’o mai Governu iha loron 16 fulan-Jullu 2019 no entrega ba Governu hodi jere no implementa tuir lei ka rezolusaun Governu nian ne’ebé aplika ona ba Projetu Tasi Mane seluk hanesan Suai Supply Base, Aeroportu Suai, Auto Estrada no área dezignadu ba Planta Refinaria Betano.

Atu fasilita prosesu kontinuasaun ba prosesu libertasaun rai no propriedade iha área dezignadu ba planta LNG Beaço, asina akta deklarasaun hodi entrega área dezignadu ba planta LNG ba Governu liuhusi Ministériu Petróleu no Minerál – TIMOR GAP, E.P. atu implementa tuir lei ka rezolusaun Governu ba projetu Tasi Mane.

Akta ne’ebé asina ona hanesan provas no kompromisu Estadu no povu RDTL no VIII Governu Konstitusionál, katak úniku opsaun dezenvolvimentu ba kampu Mina no Gas iha Greater Sunrise maka dada kadoras mai Beaço. Nune’e loke dalan liuhusi Ministériu Petróleu no Minerál – TIMOR GAP, E.P nu’udar jestór ba projetu Tasi Mane nian hodi kontinua halo estudu tékniku balun no prosesu identifikasaun rai no propriedade iha área dezignadu Planta LNG Beaço inklui área realokasaun komunidade Beaço no seluk tan.

Jornalista: Vito Salvadór