Hatutan.com, (12 Abril 2023), Díli—Klubu Primeira divizaun Karketu Díli FC kontinua hatudu nia superioridade iha jogu kontinuasaun Liga Futebol Timor-Leste (LFTL), hafoin halakon Académica FC ho skore 2-1.

Klubu Primeira divizaun Karketu Díli FC kontinua hatudu nia superioridade iha jogu kontinuasaun Liga Futeból Timor-Leste (LFTL), hafoin halakon Académica FC ho skore 2-1, Kinta (12/04/2023). Foto/Elio dos Santos da Costa.

Golu Karketu Díli FC marka hosi Agusto da Costa (80) no Gaudencio Monteiro (7), no golu Academica FC marka hosi Jogadór Lexi Junior Atok (16).

Lee Mós: Impata 1-1, Fitun Estudante Lorosa’e FC Ho Santa Cruz FC Fahe Pontu Hanesan

Bainhira arbitu Pedro Braga hu sinal jogu hahú, Jogadór ekipa Académica FC no Karketu Díli FC hahú kedan halo movimentasaun iha kampu laran hodi buka oportunidade halo pasajen ba bola no hahú implementa mós taktika ne’ebé iha atu bele domina bola.

Ekipa Académica FC ne’ebé iha zona okos tabela klasifikasaun provizoriu primeira divizaun hahú hola kedan inisiativa hodi buka atu domina jogu liu hosi kombinasaun Jogadór ne’ebé iha atu nune’e bele buka oportunidade hodi halo golu no asegura vitória.

Tama ba minutu 10 mósu insidente entre Jogadór ekipa rua ne’ebé obriga arbitu tenke fo kartaun kinur ba Jogadór avansadu Karketu Díli FC Augusto da Costa (80) no Jogadór Academica FC Lexy Junior Atok (16).

Ekipa Karketu Díli FC ne’ebé bai-bain joga ho ritmu no intensidade as, lakon ritmu jogu no Jogadór sira kuaze halo pasajen bola as maibé falla tanba bola la too ba iha terjetu ne’ebé iha.

Academica FC kontinua domina jogu ne’e no Jogadór sira kontinua halo jogu ho bola badak hosi ain ba ain no sempre halo ameasa ba Karketu Díli FC maibé Academica FC sei falla atu marka golu.

Tama ba minutu 13 Jogadór estranjeiru Academica FC Nortey Kojo (18) simu kartaun kinur hafoin halo erru iha.

Ekipa Académica FC kontinua halo esforsu no iha jogu hatudu ekipa Académica FC domina liu jogu no iha kada pasajen ne’ebé Jogadór Académica FC halo sempre rezulta ameasa ba adversáriu Karketu Díli FC maske la rezulta golu ruma tanba bola sempre dook hosi tarjetu.

Karketu Díli FC kontinua joga iha presaun nia laran no liña klaran laiha kombinasaun di’ak no sempre falla iha pasajen.

Académica FC lansa ameasa ida ba Karketu Díli FC liu hosi bola falta iha area grandeal liur, Jogadór Academica FC Alexandre da Cruz (10) ne’ebé tiru bola falta refere konsege halo ameasa ida maske baluza Karketu Díli FC sei bele salva bola ho di’ak. Jogadór Karketu Díli FC Maurício González (11) simu kartaun kinur iha minutu 31.

Ekipa Karketu Díli FC hola inisiativa hodi halo substituisaun ba Jogadór iha liña klaran hodi hasai Januario Fonseca (17) no hatama Gaudencio Monteiro(7) iha minutu 34.

Ho substituisaun ne’e Karketu Díli FC hahú hadi’a liña hodi buka atu halo balansu ba ekipa adversáriu nia jogu hodi bele buka mós oportunidade atu halo golu.

Karketu Díli FC hetan bola falra ida no Jogadór Gellvanio ne’ebé hiit bola falta ne’e no Gaudencio Monteiro (7) ne’ebé iha pozisaun livre konsege kabesada no baliza académica FC konsege salva bola.

Jogadór Karketu Díli FC Zacarias Cabral (32) simu kartaun kinur iha minutu 36. Ekipa rua kontinua halo jogu no Academica FC kontinua lansa atake ba Karketu Díli FC maibé too primeira parte termina ekipa rua mantein ho skore 0-0.

Tama ba segunda parte, ekipa Karketu Díli FC sei mantein ho Jogadór ne’ebé iha no hahú hadi’a liña klaran hodi halo jogu atu asegura ekipa hosi ameasa.

Karketu Díli FC kontinua hadi’a failansu sira iha primeira parte no hahú hetan hikas ritmu hafoin halo tranjisaun ba taktika no Académica FC kkmesa lakon ritmu jogu.

Ho ida ne’e Karketu Díli FC aproveita kedan oportunidade hodi lansa atake ba adversáriu Académica FC. Karketu Díli FC lidera uluk jogu ne’e liu hosi Jogadór Augusto da Costa (80) iha minutu 51 hafoin simu asisténsia hosi nia maluk Jogadór Gaudencio Monteiro (7) no muda skore ba 1-0.

Hafoin golu ne’e ekipa Karketu Díli FC kontinua domina jogu no hare katak Academica FC komesa lakon nia ritmu jogu no Jogadór sira falla halo jogu no iha liña klaran Karketu Díli FC hahú domina no halo jogu hodi lansa ameasa ba Academica FC.

Tama ba minutu 64 Jogadór Karketu Díli FC Gaudencio Monteiro (7) marka tan golu ida hodi muda skore ba 2-0.

Hafoin golu ne’e Academica FC komesa hadi’a liña no halo substituisaun ba Jogadór iha liña klaran hodi hasai Damianus Putra (12) no hatama Helmerino da Costa (8).

Académica FC kontinua halo tranjisaun ba taktika atu bele iha mudansa ba taktika nune’e halo tan substituisaun iha minutu 74 hodi hasai Calistro Pereira (22) no hatama Erolismo Martins (4) atu bele hadi’a liña defeza no asegura baliza hosi ameasa ne’ebé ekipa adversáriu halo.

Tama ba minutu 77, Jogadór Academica FC Lexy Junior Atok (16) marka golu ida hodi muda Skore ba 2-1 hafoin marka golu dook liu hosi bola falta ne’ebé iha.

Jogadór Karketu Díli FC Gaudencio Monteiro (7) no Lexi Junior Atok (16) obrigadu tenke simu kartaun mean iha minutu 79 hafoin Jogadór rua refere baku malu iha kampu lara.

Tama ba minutu 81 Karketu Díli FC kontinua halo substituisaun hodi hasai Janneth Kamare (25) no hatama António Martins (2).

Academica FC mós halo substituisaun ba Jogadór iha liña defeza hodi hasai Nortey Kojo (18) no hatama Dani Ardianto (2).

Atu duni atrazu ne’ebé iha Academica FC halo tan substituisaun ba Jogadór iha liña avansadu hodi hasai Hilário Ximenes (11) no hatama Florindo Soares (21) iha minutu 87.

Karketu Díli FC halo substituisaun ikus hodi hasai Agusto da Costa (80) no hatama Silvestre Gama (29) iha minutu 90+4. Too jogu termina ekipa Karketu Díli FC mantein lidera ho skore 2-1.

Ho vitória ne’e, ekipa Karketu Díli FC rekolla pontus hamutuk sai hosi jogu lima (5) no sae ba terseira klasifikasaun provizoriu tabela klasifikasaun no Académica FC mantein iha pozisaun da hitu ho pontus 6 hosi jogu hitu (7).

Jornalista: Vito Salvadór