Hatutan.com, (17 abríl 2023), Díli—Komandu Polísia Nasionál Timor-Leste (PNTL) hala’o hela preparasaun fízika fulan ida resin ona liuliu kona-bá tátika seguransa nian hodi asegura líder partidu polítiku 17 tun bá baze iha kampaña politika bá eleisaun Parlamentár.

Simulasaun iha Kuartél UEP, Karreta PNTL baku fila, Segunda (17/04/2023).

Iha segunda 17 abríl, PNTL, liuhosi membru Unidade Batalhão Ordem Pública (BOP), Corpo Segurança Pessoál (CSP) no Komandu Espesiál Polísia (COE), halo abertura simulasaun hatudu forsa ka “Show force” nian iha Kuartel UEP.

Lee Mós: Operasaun Konjunta F-FDTL ho PNTL “La Halimar” ho Kriminozu

Hosi membru BOP hatudu kona-bá oinsá asegura fatin kampaña,  bainhira mosu situasaun perturbasaun orden públiku.

Membru CSP hatudu simulasaun ho karreta liu-liu oinsá fó protesaun bá alta entidade sira iha kazu ida ne’e líder partidu sira, bainhira hetan risku iha kampaña. Infelizmente, hosi simulasaun ne’e rezulta karreta operasionál PNTL nian ida baku fila iha kampu treinamentu.

Maske nune’e, Komandante Jerál PNTL, Komisariu Jerál Polisia Henrique da Costa konsidera kareta baku fila ne’e normál tanba akontesimentu ne’e mosu bebeik iha simulasaun sira.

Komandante Henrique mós afirma, PNTL hanesan instituisaun seguransa interna nasaun nian, tanba ne’e treinu kontinua no situasaun saida de’it mak mosu ka risku saida de’it mak iha, polisia sempre prontu enfrenta.

“Situasaun sira hanesan ne’e normál. Ita agradese bá aman Maromak tanba mezmu mosu asidente sira hanesan ne’e maibé ita-nia membru sira di’ak hela. Ne’e mak importante,” Henrique da Costa hateten hafoin asiste direta simulasaun iha Kuartél UEP, Segunda (17/04/2023).

Hafoin akontesimente, komadante Henrique hala’o kedan pasa-revista bá kondisaun membru sira nian, no insidente ne’e la rezulta membru ruma kanek gráve.

Nia konsidera situsaun sira hanesan ne’e hatudu katak, servisu polisia nian la fásil no prontu hasoru situasaun saida de’it.

“Ho treinu ne’ebé maka’as hanesan ne’e  hodi  hatudu katak polisia ne’e tún atu servisu duni bá ita-nian nasaun no povu ida-ne’e,” Henrique hateten.

Tuir planu, komandu PTNL sei husu Governu atu bele sosa tán karreta operasionál ne’ebé ho kondisaun viábel, nune’e membru sira bele uza  bá hala’o treinamentu.

Governu Rekoñese Limitasaun PNTL

Iha fatin hanesan, Vise-Ministru Interiór (VMI), António Armindo rekoñese katak, PNTL sei iha limitasaun bá transporte, liu-liu  karreta sira ne’ebé atu utiliza bá treinamentu nian.

Governante ne’e haree katak, maioria karreta ne’ebé membru polisia sira uza hala’o treinu ne’e la’ós karreta bá treinu nian, maibé karreta hirak  ne’e uza  bá operasionál.

“Karreta sira ne’ebé ita-nia polisia sira uza ohin ne’e maiória uza bá operasionál la’ós uza bá treinu. Ho insidente ida-ne’e, fó hanoin ona ba Governu katak, PNTL presiza iha karrreta espesiál  ne’ebé utiliza ba treinu nian,” António Armindo hateten.

Atu hola karreta hanesan ne’e, ba oin Governu hamutuk ho Komandu PNTL sei haree hamutuk, modellu karreta saida mak parte Komandu hola, nune’e membru sira bele uza ba treinu.

Jornalista: Rogério Pereira Cárceres