Hatutan.com, (17 Abríl 2023), Díli—Polísia Nasionál Timor-Leste (PNTL), iha 17 Abríl kalan, kaptura membru na’in-haat (4) hosi Grupu Arte Marsial (GAM), tanba deskonfia involve iha konfontu ida iha área Benaemauk, Aldeia Mota Ulun, Suku Becora, Postu-Administrativu Cristo-Rei, Munisípiu Díli.

Ho akontesimentu ne’e, Polisia simu kedan informasaun no komandu orienta mós ekipa servisu sira bá to’o iha lokál krime hodi hakalma situasaun.

Polísia Nasionál Timor-Leste (PNTL), iha 17 Abríl kalan, kaptura membru na’in-haat (4) hosi Grupu Arte Marsial (GAM), tanba deskonfia involve iha konfontu ida iha área Benaemauk, Aldeia Mota Ulun, Suku Becora, Postu-Administrativu Cristo-Rei, Munisípiu Díli. Foto/PNTL.

Lee Mós: Governu Tenke Ejize Líder Arte Marsiál-Rituál Kontrola Membru Sira

Bainhira to’o fatin, membru sira hosi GAM KORK ho GAR 77 koopera di’ak, hodi hakalma situasaun, maibé, membru sira hosi GAM Ikatan Kera Sakti (IKS) lakohi koopera ho autoridade polisiál no kontinua lori fatuk tuda hasoru ekipa konjunta, tuda mós komunidade nia uma rezulta karreta ida hetan estragu iha vidru oin.

“Haree ba situasaun komesa grave, ekipa konjunta lansa operasaun hodi duni tuir sa’e ba foho leten no konsege asegura suspeitu na’in-haat hosi Grupu IKS, tanba involve iha krime tuda-malu entre grupu no kria instabilidade iha área Benaemauk. Na’in-rua seluk konsege halai sa’e liután ba foho leten, halo ekipa servisu duni la toman, tanba dalan laiha no rai tahu de’it,” Hatutan.com, sita komunikadu, Segunda (17/04/2023).

Suspeitu na’in-haat ne’e ho identidade, LA membru IKS hela iha Lequidoe, Munisipiu Aileu, suspeitu RS membru IKS, hela iha Aldeia Tuku Itin, Suku Cribas, Munisipiu Manatuto, no Suspeitu JS ho MS hela iha Bairu Benaemauk, Aldeia Mota Ulun, Suku Bekora, Munisípiu Díli.

Iha fatin insidente ne’e mós ekipa konjunta PNTL halo apreensaun ka prende sasán kro’at sira balun mak hanesan Rama Ambon ida, Katana tipu surik haat, maubeka naruk ida, tudik rua, besi kanu ida, Ai tongkat ida, inklui fatuk hodi lansa iha fiska iha pasta ida nia laran.

Ho evidénsia hirak ne’e suspeitu sira vióla Lei númeru 5/2017, kona-bá prátika Arma Branka ne’ebé define iha artigu 2 númeru 1, ko’alia kona-bá katana, espada no rama ambon.

Suspeitu na’in-haat ne’e ekipa servisu halo kedan prevensaun hodi entrega ba Forsa Rezerva no ekipa Patrulla PNTL Esquadra Cristo Rei, lori mai Esquadra PNTL Cristo Rei hodi halo detensaun durante oras 24 no sei kontinua halo prosesu investigasaun.

Kapturasaun ne’e ezekuta hosi ekipa Servisu Informasaun Polisia Nasional (SIPN) Aranha Leste, Aranha Oeste, Forsa Polisia (FP) junta ho Servisu Nasionál Intelejénsia(SNI) inklui Forsa Rezerva no ekipa Patrulla PNTL Esquadra Cristo Rei.

Jornalista: Rogério Pereira Cárceres