Hatutan.com, (14 Abríl 2023), Díli-Polisia Nasionál Timor-Leste (PNTL) hasai ona apelu ida hodi husu bá militante no simpatizante  partidu polítiku (ParPol) atu respeita ordén públiku no respeita sidadaun hotu nia liberdade.

Lee Mós : Membru F-FDTL Labele Envolve Atividade Polítika

Membru PNTL hosi Unidade Espesiál Polísia (UEP). Foto/Dok.Hatutan.com

Segundu Komandante Jerál PNTL, Komisáriu Polísia Pedro da Costa Belo, afirma  Polísia sei la tolera militante ParPol sira atu “tuda-malu” iha eventu kampaña polítika no Eleisaun Parlamentár (Elpár) 2023.

Komandante Pedro Belo alerta ida ne’e, durante organiza sorumutu ho reprezentante partidu politiku 17 ne’ebé atu partisipa iha eventu kampaña polítika durante fulan-ida,  hosi loron 19 fulan-Abríl to’o loron 18 fulan-Maiu 2023.

“Atu labele mosu konflitu, labele mosu mós violasaun bá orden públiku sira, ami ho ParPol sira  hasoru malu hodi fó informasaun bá sira katak, ami esplika kona-bá regras sira ne’ebé maka sei aplika iha tempu kampaña, eleisaun, no depois eleisaun,” Komisáriu Polísia Pedro Belo hateten, hafoin sorumutu ho ParPol sira iha kuartel jerál PNTL, Caicoli, Sesta (14/04/2023).

Nia hateten, PNTL iha prinsipiu rasik, karik maka iha violasaun bá iha krime ka violasaun bá iha regra tranzitu nian, maka PNTL sei tau lei no ordém nafatin, ne’e la haree bá partidu A no B, maibé, PNTL tenke tau lei no ordén ne’ebé mak rigorozu.

Segundu komandante jerál PNTL ne’e dehan, liuhosi sorumutu ho reprezentante ParPol 17 ne’ebé konkorre iha eleisaun parlamentár 2023chametik komunikasaun ho Polísia karik mosu problema ka distúrbiu buka rezolve lalais.

Fretilin Prontu Koopera

Iha biban ne’e, reprezentante partidu Frente Revolusionáriu Timor-Leste (FRETILIN), Ricardo da Costa Ribeiro ho prontidaun tomak katak, Fretilin prontu servisu hamutuk ho PNTL tanba PNTL mak hanesan responsável bá seguransa iha nasaun ida ne’e.

Ricardo dehan, Fretilin prontu halo tuir prosedimentu ne’ebé PNTL fó, maibé, sira mós hein PNTL fó giaun ida, para partidu politiku sira ne’e bele tuir.

Membru Komite Sentrál Fretilin nian (CCF-sigla portugés) promete sei informa rezultadu sorumutuk ne’e bá militante sira, atu fó hanoin katak, labele envolve iha infrasaun, no militante tenke iha ninia responsábilidade rasik bá nia aktu.

CNRT Nia Motto mak Sempre Estábilidade

Reprezentante partidu Congresso Nacional de Reconstrucção Timorense (CNRT), Francisco Guterres afirma, CNRT sempre prontu atu koopera ho instituisaun seguransa hanesan PNTL, hodi garante estabilidade iha rai-laran, tanba  CNRT ninia motto mak sempre estábilidade.

“Bá CNRT mak ne’e, ami-nia motto prinsipál ne’e, sempre estabilidade nasional. Ne’ebé, partidu sempre tenta atu kontribui bá estabilidade nasionál ne’e rasik,” Francisco Guterres hateten.

Kuadru partidu CNRT ne’e, husu bá sira-ninia militante sira hotu, atu bele kontribui, atu la’o tuir regra sira ne’ebé mak iha para halo kampaña ne’e ho di’ak, atu nune’e iha Domingu (21/04/2023), povu tomak bele bá vota ho hakmatek, ho susesu.

Membru GAM-GAR Labele Utiliza Atributu iha Kampaña

Polísia Nasional Timor-Leste (PNTL) husu mós membru Grupu Arte Marsiál (GAM) no Grupu Arte Rituál (GAR) sira atu la bele utiliza fali sira-ninia atributu durante partisipa iha eventu kampaña polítika no Eleisaun Parlamentár (Elpár) 2023.

“Sei la uza atributu GAM-GAR nian iha fali fatin sira ne’ebé mak iha, tanba hosi ida-ne’e mak bele mós halo problema,” Komisáriu Polísia Pedro da Costa Belo hateten.

La’os ne’e de’it, Komisáriu Polísia Pedro Belo, husu militante partidu sira, atu labele lori sasán kro’at tama iha eventu kampaña laran. Sasán kro’at ne’e la’ós lori tama de’it, mais, nia uza la’o tuir dalan de’it mós polisia sei atu, tanba vióla rezolusaun númeru 15/2017, kona-bá Arma Branka nian.

Asegura Sede FRETILIN-CNRT

Komandante Pedro Belo hatutan, PNTL liuhosi Komandu Operasaun Nasionál tau ona iha ninia planu, tanba ne’e, durante fulan-ida tomak eventu kampaña politika ne’e, polísia sei destaka ka koloka membru sira, atu asegura sede partidu Frente Revolusionáriu Timor-Leste (FRETILIN) ho Congresso Nacional de Reconstrucção Timorense (CNRT) nian.

Razaun PNTL sei destaka membru iha sede partidu rua ne’e nian, tanba kada períodu, uainhira realiza kampaña poliíika bá eleisaun jerál  no eleisaun prezidensiál sempre iha konfrontu ka tuda-malu entre militante sira to’o ho fatuk tuda bá sede partidu nian.

Pedro Belo hateten, PNTL mós lakohi atu haree no rona militante sira uza motór ho kondisaun kanu-resin, hodi halai gás tun-sa’e.

“Atu fó hatene de’it bá maluk sira katak, kanu-resin, nia sorte liu, entaun ne’e di’ak liu, kuandu kaer kona fali mós, nia sei multa ne’e $24.00 to’o $120.00 Mais, ami baibain tau bá ne’e, kuandu nia provoka demais ne’e, ami tau $120.00 para motor ne’e para iha ne’ebá. Ne’e bá kanu-resin, infrasaun ne’ebe mak aplika ne’e, hanesan ne’e,” Pedro Belo fó hanoin.

Jornalista: Rogério Pereira Cárceres