Hatutan.com, (25 Abríl 2023), Díli- Bainhira hetan fiar hosi povu hodi kontribui bá Governa rai ida-ne’e, Partidu Democrática Cristão (PDC) sei tau prioridade bá hadi’a agrikultór sira-nia moris, pekuária sira ho mos peskadór sira-nia moris loron-loron.

Lee Mós : PDC Hakarak Halakon Pensaun Vitalísia

PDC halo kampaña hosi uma bá uma iha Covalima, Segunda (24/4/2023). Foto/Espesiál

Bainhira halo atividade kampaña hosi uma bá uma iha Suku Sukai-Laran, Postu Administrativu Suai Villa, Munisípiu Covalima, Segunda (24/04/2023),  Prezidente PDC, Francisco de Araújo hateten PDC iha komprimisu bo’ot atu tau matan ba seitór sira hanesan  agrikultura, peska no pekuária.

Liuhosi komunikadu ne’ebé Hatutan.com asesu, Tersa (25/04/2023), relata kona-bá PDC nia  kompromisu seluk mak atu apoio material ba to’os na’in sira hodi moderniza esforsu sistema kuda no kolleta produtu lokál sira, hare, foos, batar,  no seluk tan.

Tuir PDC nia perspetiva katak apoiu sira prioridade PDC nian ne’e bele hasae rendimentu ekonómia família nian no kontribui bá dezenvolvimentu Sósio-ekonómiku no kulturál iha Timor-Leste.

Atu haforsa industria iha setòr agrikultura, pekuária no peska iha rai-laran hodi redus importasaun husi rai-li’ur, PDC kontinua halo sosializasaun bá lei sira kona-bá protesaun meiu ambiente no kontinua polítika ne’ebé iha hodi fó kapasitasaun bá agrikultór sira iha teritóriu nasionál.

PDC mós promete atu tau fundu bá juventude sira iha grupu hanesan hakiak-karau, bibi, kuda, ikan no seluk tan, hodi iha kbiit rasik atu kria empregu bá nia rasik no bele fó mós kampu servisu iha suku laran.

PDC sei mos halo ko’alia ho empresariu internasionál sira iha área agrikultura, peska no pekuária hodi halo parseria no emprezáriu timoroan atu bele mai investe iha Timor-Leste hodi loke kampu servisu bá Timoroan tomak.

“PDC bá ukun sei aloka orsamentu estadu bá iha setor agrikultura, peska no pekuária inklui floresta hosi 10%-15% kada tinan,” nia tenik.

 Partidu Democrata Criatão tau problema hirak ne’e hanesan programa prioridade PDC nian hodi hadia povu sira nia moris.

Eleitor iha Munisípiu Covalima ne’ebé sei vota iha eleisaun parlamentár, 21 fulan-Maiu tinan ne’e hamutuk 49.299.

Kampaña PDC nian hosi uma bá uma ne’e hetan mós supervizaun hosi ofisiál CNE no seguransa PNTL no tuir orario PDC sei kontinua ho mini kampaña  iha Munisípiu Aileu, Tersa (25/04/2023).

Jornalista: Vito Salvadór