Hatutan.com, (10 Maiu 2023), Díli—Partidu Movimentu Libertasaun ba Povu Maubere (MLPM), iha planu di’ak atu hadi’a ordenamentu teritóriu no abitasaun dignu ba povu Maubere tuir konseitu dezenvolvimentu nasionál ne’ebé Timor-Leste iha, no sei hafutar ho identidade relijioza.

Prezidente MLPM, Reis Cadalac.

Prezidente MLPM, Reis Cadalac hateten, kona-bá ordenamentu teritóriu, uma komunidade tenke iha kondisaun no bainhira MLPM kaer ukun sei fasilita atu hatuur kondisaun uma ho rápida no iha fornesimentu eletrisidade, estrada no bee-moos ne’ebé adekuadu atu povu moris iha abitasaun ida dignu.

Lee Mós:Bainhira Ukun, MLPM Transforma Postu Administrativu 66 Bá Munisípiu

“Povu Maubere merese atu iha abitasaun dignu mai hosi ordenamentu teritóriu ne’ebé governu sentrál no munisipál mak organiza kompleta ho fasilidade públiku ne’ebé adekuadu,” Reis Cadalac hateten ba Hatutan.com iha sede MLPM Bairru-Pité, Tersa (09/05/2023).

Iha planu ordenamentu ne’e, MLPM hakarak uma tenke halo didi’ak tuir istilu Timor ninian, uma kakuluk tenke reprezenta uma tradisionál atu bele atrai turista mai Timor-Leste no hasa’e rendimentu ekonomia nasaun.

“Planu ordenamentu territóriu ne’ebé MLPM iha, sei hafutar mós ho identidade relijioza ne’ebé Timor-Leste iha, halo uma ne’ebé bele reprezenta komunidade Muslumanu, Protestante, Hinduízmu no sira seluk,” nia esplika.

MLPM mos iha komprimisu polítiku oinsa tau atensaun máximu ba subsídiu sira liga ho bee-moos, eletrisidade nune’e povu Maubere iha kapasidade atu jere ninia uma no iha mós kbi’it natón atu kuidadu ambiente ne’ebé nia hela ba, hodi garante ema hotu moris moos no livre hosi moras.

Jornalista: Vito Salvadór