Hatutan.com, (22 Juñu 2023), Díli—Sekretaria Inspesaun Ministériu Públiku  (MP) notifika jornalista Hatutan.com, Rogério Pereira Cárceres, hodi bá presta deklarasaun iha Ministériu Públiku, Kinta (22/06/2023).

Sekretaria Inspesaun Ministériu Públiku (MP) notifika jornalista Hatutan.com, Rogério Pereira Cárceres (klaran) hodi presta deklarasaun iha Ministériu Públiku, Kinta (22/06/2023). Foto/Hatutan.com.

Notifikasaun ho númeru referénsia 82/IMP/2023, Dili, 19 fulan-Juñu 2023, ne’ebé asina direta hosi Sekretaria ba Inspesaun Ministériu Públiku, Eliana Flora Pereira, ho nia asuntu Notificação Comparência.

Lee Mós: MAPKOMS Halo Keixa “Denúncia caluniosa” Hasoru Xefe Redasaun Hatutan.com

Notifikasaun ne’e hodi kumprimenta bá despaixu hosi Inspetora Ministériu Públiku, Dra. Zélia Trindade, atu rona deklarasaun hosi jornalista Rogério Pereira Cárceres, iha servisu inspesaun Ministériu Públiku nian, iha loron 22 fulan-Juñu 2023, hale’u tuku 10:00 dadeer OTL.

Tuir opiniaun jurídiku hosi Hatutan.com nia fonte balun fó hanoin dehan,  Nontificação Comparência ne’e katak ema ka pesoál ne’ebé hetan notifikasaun ida-ne’e atu bá konfirma de’it asuntu balun ka dokumentu balun ne’ebé Ministériu Públiku  relasiona ho investigasaun ba objetu kazu ruma.

Jornalista Rogério Pereira Cárceres ne’ebé akompaña hosi Xefe Redasaun Hatutan.com, Francisco Belo Simões, to’o iha edifísiu Prokuradór Jerál Repúblika (PGR), Colmera, Díli, tuku 9:45 Otl, no liu kedas bá iha parte resepsionista nian hodi fó hatene prezensa iha edifísiu refere.

Parte resepsionista edifísiu PGR nian arrola tiha lori hikas Jornalista Rogério Pereira Cárceres bá presta deklarasaun iha prokuradór durante oras ida liu minutu tolu, hahú tuku 10.00  OTL no remata iha tuku 11:03 Otl. 

Bá jornalista sira, Rogério Pereira Cárceres, konfirma katak nia simu duni notifikasaun hosi  ofisial MP nian iha redasaun Hatutan.com, Tersa loraik, 20 fulan-Juñu 2023, tuku 15:00 Otl.

Rogério Pereira Cárceres haktuir, notifikasaun ne’e ho naran notifikasaun komparénsia (Nontificação Comparência) hodi konfirma asuntu balun bá prokuradór ligadu ho notísia balun ne’ebé publika iha Mídia online Hatutan.com.

“Hanesan jornalista no hanesan mós sidadaun, ha’u mai MP hodi kumpre notifikasaun MP no presta deklarasaun. Ida-ne’e de’it, buat seluk, ha’u labele ko’alia tanba segredu justisa,”   jornalista Rogério Pereira Cárceres hateten.

Iha fatin hanesan, Xefe Redasaun Hatutan.com, Francisco Belo Simões, esplika katak  bainhira entidade kompetente sira atu notifika jornalista sira ligadu ho produtu Jornalístiku ne’ebé publika iha órgaun komunikasaun sosiál sira tenke baze ba espíritu Lei Komunikasaun Sosiál númeru 5/2014 no Dekretu Lei  numeru 25/2015.

Iha pratika komún jornalizmu nian, Francisco Simões tenik, responsabilidade jurídiku bá produtu Jornalístiku sira ne’ebé publika iha orgaun komunikasaun sosial sira mak Xefe Redasaun la’ós jornalista. Tanba ne’e, Francisco Belo Simões, husu bá membru órgaun soberanu sira, polítiku sira, entidade sira no povu hotu, katak bainhira sente ofendidu  ho publikasaun notísia iha mídia sira nian, ka mídia sira sita sala deklarasaun fonte sira-nian, favor uza Direitu bá Resposta no Direitu Retifikasaun ne’ebé  prevalese iha Lei Komunikasaun Sosiál kapitulu 5 (Direto de Resposta no Retifikasaun) artigu 34.

Nia afirma tan, bainhira produtu Jornalístika ne’ebé publika iha mídia ka órgaun komunikasaun sosiál sira iha tendénsia krime, di’ak liu haruka karta notifikasaun bá Xefe Redasaun sira, tanba Xefe redasaun mak assume responsabilidade másimu iha Redasaun Mídia ida-idak nian, inklui hola responsabilidade perante Lei Komunikasaun Sosial artigu 31 numeru 4, katak, Konsellu Redasaun ne’ebe xefia hosi Xefe Redasaun mak hatan ba produtu jornalistiku hotu iha liur no iha laran. 

Jornalista: Vito Salvadór