Hatutan.com, (12 Agostu 2023), Mantuto-Membru FALINTIL-Forsa Defeza Timor-Leste (F-FDTL) hamutuk na’in-158 konklui marsa FALINTIL hosi Krarás mai Suku Kairui.

Lee Mós : Estrada hosi Laleia bá Kairui Ladi’ak

Marsa FALINTIL hosi Krarás, Viqueque to’o iha Suku Kairui, Postu Administrativu Laleia, Munisípiu Manatuto, Sesta (11/08/2023). Foto/Rogério Pereira Cárceres

Atividade la’o ain ka marsa FALINTIL ho distánsia  kilómetru 41, hosi área Krarás, Suku Bibileo, Postu Administrativu Viqueque-Villa hakur  tama to’o iha Suku Kairui, Postu Administrativu Laleia, Munisípiu Manatuto.

Marsa FALINTIL ne’e nu’udár parte ida hodi komemora aniversáriu ezisténsia FALINTIL nian bá dala-48, (20 Agostu 1975  20 Agostu 2023)  ho tema bá komemorasaun, “Hakbiit Ain-fatin As-ua’in FALINTIL nian no Hametin Unidade Nasionál.”

Advertisement

Xefe Estadu Maiór F-FDTL interinu, Koronél José da Costa Soares ‘Trix’ hateten, Komandu F-FDTL liuhosi komisaun organizadora hili fatin Krarás, Suku Bibileo, Viqueque Villa, bá abertura Marsa FALINTIL no Suku Ciarui, Postu Administrativu Laleia, Munisípiu Manatuto, tanba konsidera hanesan fatin ida istórika bá as-ua’in funu-na’in sira, reziste funu to’o ukun-rasik aan.

“Krarás ho Kairui, fatin ida ne’ebé importante bá gerrilla ninian, iha tempu kotuk bá. Iha ne’ebá duni maka, levantamentu Krarás, ohin loron Rai-ria, Coronel Amico, sei tuur hela, sira mai hamutuk nafatin ho maluk sira ne’ebé uluk reziste iha ai-laran, ami sei eziste,” Xefe Estadu Maiór F-FDTL interinu, Koronél José da Costa Soares ‘Trix’, hateten durante diskursu serimónia enserramentu Marsa FALINTIL nian iha Suku Kairui, Sesta (11/08/2023).

Marsa FALINTIL. Foto/Rogério Pereira Cárceres

Durante funu, as-u’ain FALINTIL barak mak la konsege salva sira-nia vida ka mate, balu kanek, no balu mak ohin loron sei moris, hodi transformasaun FALINTIL bá F-FDTL, hodi sai hanesan instituisaun defeza ida bá povu no rai doben Timor-Leste. 

Iha 1999, joven Timoroan, no populasaun sira hosi rai-ulun Lospalos, Loromonu, to’o Oecusse, tama konsentra duni iha Kairui, sai hosi Mota Lalini, tuir dalan mota ne’e, hodi bá hasoru as-ua’in FALINTIL sira iha Waimori.

Portavós Komandu FALINTIL F-FDTL, Capitão Mar e Guerra João da Silva, hateten, ho tinan 48, aniversáriu ezisténsia FALINTIL nian ne’e, husu bá militár foun no foin-sa’e sira, atu hametin nafatin espíritu nasionalizmu no patriotizmu iha sira-ninian fuan-laran.

Komandu hanoin katak, sei kontinua halo transformasaun bá iha prosesu dezenvolvimentu forsas armadas. Purtantu, foin tinan 20 resin, ne’e la fasil, sai hanesan forsa ida ne’ebé maka profisionál. Maibé, ho esforsu oioin, no esforsu koletivu, hosi Governu mai to’o instituisaun, nafatin halo transformasaun, para depois Forsa Defeza Timor-Leste, sai forsa ida ne’ebé mak profisionál no forsa ida ne’ebé maka kredivel, no fiar, respeitu hosi ninia povu rasik.

Advertisement

“Ohin, enserramentu Marsa FALINTIL, hothotu la’o ho di’ak. Ein-prinsípiu, hahú hosi abertura, mai to’o iha ne’e, agora, problema lojístika ne’e, liu-liu, ita hotu hatene katak, asesu estrada ne’e, la’ós iha Timor laran tomak. Agora, la’o ain-fatin FALINTIL ne’e, tanba, ne’e tenke tama mota-kuak, sa’e foho, tun foho. Tanba ne’e maka, problema lojístika ne’e iha ne’e. Entaun, signifika, uainhira laiha asesu kareta bá iha área sira ne’ebá. Entaun, presiza ema ida-idak lori ninia hahán, ninia bukae,” Capitão Mar e Guerra João da Silva hateten.

Jornalista: Rogério Pereira Cárceres

Advertisement