Hatutan.com, (25 Marsu 2022), Dili-Soldadu feminino timoroan na’in-11 sai vensedóra iha kompetisaun diskursu públiku ne’ebé organiza hosi Departamentu Jéneru, iha Kuartél Jenerál FALINTIL-Forsa Defeza Timor Leste (F-FDTL), Fatuhada, Dili.

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” foto hamutuk ho soldadu feminino na’in-11 ne’ebé sai vensedóra ba kompetisaun diskursu públiku iha Kuartél Jenerál F-FDTL, Fatuhada, Dili, 25 fulan-Marsu 2022. Foto/Hatutan.com

Xefe Jéneru F-FDTL, Tenente Marquita da Cunha esplika, eventu kompetisaun diskursu ne’e, nudár programa ida ne’ebé mak Governu tau ona hodi kontinua kapasita, motiva no hasa’e taxa partisipasaun feto sira-nian iha instituisaun Estadu, no partikularmente iha área defeza.

“Objetivu hosi atividade ida-ne’e, hakarak obriga sira hodi hala’o peskiza uitoan kona-bá tópiku ne’ebé mak sira hili, enkoraja sira atu hamriik iha fatin públiku, hodi hato’o sira-nia opiniaun no mós defende ka profunda tán deklarasaun  ruma,” Xefe Jéneru F-FDTL, Tenente Marquita da Cunha hateten ba jornalista sira, hafoin atribui sertifikadu ba manán na’in sira iha Sala Auditóriu Kuartel Jenerál F-FDTL iha Fatuhada, Dili, Sesta (25/03/2022). 

Tenente Marquita da Cunha afirma, liuhosi eventu diskursu públiku ne’e, atu bele fó hanoin mós komandu F-FDTL, hodi oinsá mak ba futuru bele hadi’a di’ak liután partisipasaun feto iha vida militár, no mós bele identifika feto potensiál sira ne’ebé mak iha F-FDTL nia laran.

Prosesu inisia kompetisaun ba diskursu ne’e, parte komisaun fó espasu ba feto sira iha F-FDTL, hamutuk na’in-50, (25%), hosi komponente sira, unidade, inklui Kuartél Jenerál.

Tuir dadus, feto timoroan sira ne’ebé mak haknaar ona iha instituisaun F-FDTL hamutuk 294 (11%).

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” konsidera, eventu kompetisaun diskursu ne’e, importante tebes iha vida instituisaun militár ninian, no mós iha vida familiár, no sosiedade tomak iha povu Timor-Leste nian.

Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” halo entrevista ho jornalista sira, 25 fulan-Marsu 2022. Foto/Hatutan.com

“Ba dala uluk, ha’u hakarak fó parabéns ba sira ne’ebé tuir konkorrénsia ida ne’e, ba imi hotu ne’ebé husik imi nia tempu, ho imi nia disponibilidade para mai tuir asaun ida ne’e. Parabéns, no obrigadu mós ba sira ne’ebé manan na’in sira, ha’u sente katak, imi konkista pasu ida, mais pasu barak sei iha para imi atu halo, ne’ebé ha’u fó de’it saudasaun importante ida ba ita-boot sira nia susesu ne’ebé alkansa iha tempu badak ida-ne’e,” Tenente Jenerál Domingos Raúl “Falur Rate Laek” hateten tán.

Falur Rate Laek apresia mós ho servisu sira hosi komisaun organizadór nian, ne’ebé organiza direta hosi Departamentu Jéneru F-FDTL nian, tanba sira konsege hala’o ona eventu boot rua. Ida maka, semináriu boot ida iha 2021, no ohin realiza tán diskursu públiku ba feto militár sira.

“Ita hotu ne’ebé kontribui, ita hotu merese atensaun di’ak, no obrigadu no parabéns ba imi hotu, dezde sira nia avaliadór sira, organizadór sira, hotu-hotu merese ha’u nia apresiasaun, obrigadu, no parabéns ba ita boot sira hotu. Ha’u hanoin katak, imi nia mentalidade mós forsa ona, muda ona, treinamentu ne’e muda, ne’ebé ohin imi hamriik iha ne’e, bainhira imi ko’alia halo aprezentasaun,” Falur Rate Laek apresia.

Soldadu feminino na’in-11 ne’ebé sai vensedóra iha kompetisaun ne’e, ho kategoria sira mak hanesan, hosi Postu Ofisiais, Tenente Leandra F. Gonzaga (1), hosi Kuartél Jenerál, Alferes Maria F. Xavier (2) no hosi komponente Aéreu Lizeira  Tenente Julia da Costa (3), hosi Unidade Kuartél Jenerál.

Hosi postu sira Sarjentu nian mak hanesan, Segundu Sarjentu Antonieta da Silva (1), hosi komponente Centro Formação e Terreno. Primeiru Sarjentu Armanda Freitas (2), hosi Kuartál Jenerál. Segundu Sarjentu Silvina Ximenes (3), hosi komponente Centro Formação e Terreno, no Segundu Sarjentu Amena de Jesus (4), hosi Kuartél Jenerál.

Postu Praças nian, Soldadu Isaura E. Freitas (1), hosi Componente Apoio de Serviço (CAS), Cabo Angelina dos Reis, (2), hosi Centro Formação e Terreno, Virginia da Costa (3), hosi Componente Naval, no Soldadu Natalua Soares dos Santo (4), hosi Unidade Formação.

Jornalista: Rogério Pereira Cárceres