Hatutan.com, (07 Fevereiru 2023), Díli-Soldadu foun ida FALINTIL-Forsa Defeza Timor-Leste (F-FDTL) rekrutadu 2022 ho inisiál NM,  labele tuir seremómia graduasaun, Tersa (07/02/2023), tanba komete krime arma branka no tentativa omisídiu.

Soldadu foun F-FDTL ne’ebé komete krime ho insiál NM. Foto/Espesiál

Hosi aktu NM nian ne’ebé rezulta lezadu Nelson Guterres, kanek grave iha akontesimentu iha serimónia festa família ida iha área Becora, Díli, iha tinan 2020  ne’ebé envolve direta hosi kondenadu NM nune’e Tribunál Distritál Díli (TDD) hasai mandadu kapturasaun atu NM kumpre  pena prizaun tinan-tolu (3) iha prizaun Becora.

Rezultadu hosi kazu ne’e rezulta Nelson Guterres kanek todan tanba liman hetan taa hosi autór. Ho nune’e Tribunál deside ho pena prizaun durante tinan-tolu.

Xefe Estadu Maiór Jenerál F-FDTL), Tenente Jenerál Domingos Raúl ‘Falur Rate Laek’, hateten, ligadu bá desizaun hosi Tribunál ne’e ikus mai nia hasai kedan despaixu ida hodi hapara nia misaun iha instituisaun forsa armada ne’e.

Advertisement

“Horseik lori bá iha Polísia Militár ne’e, asegura tiha, ninia identifikasaun ne’e, dokumentu, mandadu tribunál sai tiha ona. Despaixu hosi ha’u, sai tiha ona, hapara nia. Ne’e mak haruka lori bá asegura tiha iha Polísia Militár , depois ohin ne’e, ninia familia ho advogadu bá akompaña, depois polísia bá foti lori bá komarka,” Tenente Jenerál Domingos Raúl ‘Falur Rate Laek’, informa, hafoin seremónia graduasaun bá soldadu foun na’in-600 iha Sentru Formasaun no Treinu, Nicolau Lobato, Metinaro, Díli, Tersa (07/02/2023).

Falur Rate Laek simu dokumentu hosi Tribunál ne’e, iha Segunda (06/02/2023), hafoin lee tiha hotu konteúdu sira hosi mandadu ne’e no krime ne’ebé akuzadu, liuhosi orientasaun komandu, komisaun rekrutamentu entrega kedan soldadu ne’e bá Polísia Militár (PM) asegura iha kuartel Quintál-Boot, Díli.

“Akuzadu iha ne’ebá dehan krime omesídiu no arma branka, tanba taa nia kolega ida nia liman kotu, Ami mós la hatene. Ne’ebé, ohin ne’e, nia família sira ho advogadu entrega tiha ona bá tribunál, depois polisia lori ona nia bá kadeia,”  Falur Rate Laek hateten.

Maske nune’e, líder másimu F-FDTL ne’e, sente lamenta no triste oituan ho Tribunál nia desizaun, tanba komandu investe tiha ema, durante fulan-6, nia ezersísiu maka’as, estadu mós investe osan sosa bá farda, hahan, buat sira ne’e hotu.

Jornalista: Rogério Pereira Cárceres

Advertisement