Hatutan.com, (06 Outubru 2023), Díli—Hahú Kuarta loron 04 fulan ne’e, transporte públiku iha Díli la hala’o operasaun tanba folin konvustível sa’e no mós motorista sira ezeije passajeiru sira liu liu estudante sira atu selu 0,20 centavus, no ikus mai ohin konsege hala’o hikas operasaun hanesan baibain, maibé Ministru Transporte no Komunikasaun (MTK), Miguel Manetelo ho Diretór Diresaun Nasionál Transporte Terrestre (DNTT), António da Costa “duun-malu” hela kona-bá oinsá solusiona tarrifa pasajeiru sira.

Motorista mikrolete 010, Carlos Soares dos Santos. Foto: Lazaro Pereira Quefi.

Jornalista Hatutan.com halo entrevista ida via telefónika ho Diretór Nasionál Transporte Terrestre (DNTT), António da Costa hodi husu kona-bá desizaun ruma ne’ebé autoriza transporte públiku sira hala’o hikas operasaun hanesan baibain bazeia bá despaixu ka kritéria ruma, maibé diretór ne’e rejeita atu fó komentáriu no haruka Jornalista Hatutan.com atu bá husu direta iha Ministru Transporte no Komunikasaun (MTK), Miguel Manetelo.

Lee Mós: Folin Mina Mundiál Sa’e Maka’as Kada Barríl Besik Ona $100.00

“Ha’u labele fó lai informasaun. Imi ba husu lai Ministru Miguel Manetelo,” António da Costa hateten.

Kona-bá ne’e, iha loron ida antes, bainhira jornalista hosi média nasionál sira tenta halo entrevista ho Ministru Transporte no Komunikasaun (MTK), Miguel Manetelo kona-bá assuntu ne’e no hatán katak, nia sei buka uluk informasaun hosi DNTT atu bele fasilita dadus liga ho tarrifa pasajeiru sira nian.

“Kona-bá tarrifáriu ne’ebé pasajeiru sira karik selu la tuir estandar karik, ha’u sei husu lai bá DNTT atu fornese informasaun mai ha’u,” Manetelo hateten.

Observasaun Jornalista Hatutan.com iha terrenu hatudu katak, ohin loron 06 Outubru tinan 2023, mikrolete ka transporte públiku sira hala’o operasaun hanesan baibain.

Iha terrenu Jornalista konsege dada lia ho motorista mikrolete 010, Carlos Soares dos Santos, hateten iha Kinta meiudia hale’u 1:15 otl, motorista transporte públiku liuliu mikrolet sira konsentra iha arredór DNTT hodi rona solusaun hosi Governu tanba ne’e hosi parte DNTT fó-sai katak iha meiudia ne’e bele hala’o hikas operasaun normál maibé bá pasajeiru sira mak tenke selu ho konsiénsia kada ema, hosi estudante $0,20 no ema baibain ho funsionáriu $0.25.

“Hosi DNTT rasik mak ko’alia ba ami dehan katak agora imi halai normal fali bá, importante hateten ba sira katak, selu ne’e tenke komprende tanba agora mina folin aumenta. Hotu-hotu mak komprende de’it, tanba imi ajuda sira no sira mós ajuda imi durante fulan tolu nia laran maizumenus bele to’o Janeiru 2024. Ohin ami halai normál no pasajeiru sira selu mós di’ak. Ha’u agradese boot ba konsiénsia ne’e,” Carlos Soares do Santos hateten bá Hatutan.com iha Tasi-tolu Díli, Sesta (06/10/2024).

Iha Segunda semana oin, hosi DNTT sei imprime kritériu tarrifa nian atu fahe bá transporte públiku sira atu ida-idak taka iha odamatan karreta nian, hodi passajeiru sira haree no selu tuir standar ne’ebé mak Governu fó-sai.

Motorista ne’e dehan, bainhira iha fulan tolu nia laran mak Governu la fó solusaun di’ak bá promessa ida-ne’e, entaun transporte públiku sira sei mobiliza malu fila-fali sei kontinua halo greve hanesan.

Nune’e mós estudante Ermelinda de Deus Babo hanesan passajeira  ne’ebé lorloron utiliza transporte públiku kestiona no husu Governu atu buka netik solusaun ruma tanba hanesan povu babain enfrenta nafatin situasaun ida difisil liliu menus aihan inklui mina folin sa’e.

“Hanesan estudante laiha osan tanba lorloron bá eskola la buka osan ida. Bainhira Governu mak la iha kapasidade atu rezolve ida ne’e ha’u hanoin iha futuru ita sei terus liu tán tanba maioria estudante iha Dili utiliza transporte públiku,” Ermelinda de Deus Babo dehan.

Nia husu Governu atu normaliza lalais problema mina ne’e atu nune’e bele hakman estudante sira atu assesu transporte publiku.

Jornalista: Gloria Maia/Estajiáriu Lazaro Pereira Quefi