Hatutan.com, (31 Outubru 2023), Díli-Ministériu Transporta no Komunikasaun (MTK) liuhosi Diresaun Nasionál Transportes Terrestres (DNTT) hamutuk ho Polísia Nasional Timor-Leste (PNTL) Departamentu Tránzitu Nasionál, husu bá motorista transporte públiku (bis ho mikrolete)  tula pasajeiru tenke tuir kapasidade karreta nian.

Konferénsia imprensa DNTT ho Polísia Tranzitu Nasionál, Tersa (31/10/2023). Foto/Tome da Silva

Bainhira motorista sira admite pasajeiru sira tabele de’it, tuur to’o kapaun leten  no sena-malu iha bis ka mikrolete nia laran sei hetan sansaun koima hosi $15 to’o $45.

DNTT ho Polísia Nasionál Tránzitu hasai alerta ida ne’e atu evita asidente tráfegu iha tempu sira movimentu hosi Díli bá munisípiu komemora loron Finadu no hosi fali munisípiu sira mai Dili bainhira fila hosi feriadu loron Finadu nian.

Iha loron tolu bá kotuk, hosi Domingu to’o Tersa (29-31/10/2023), pasajeiru barak mak hadau-malu karreta iha fatin estasionamentu transporte públiku nian, hanesan iha Becora, Tasi-tolu ho Hali-Laran, atu halo viajen bá munisípiu hodi selebra loron Finadu, 02 fulan-Novembru 2023.  

“Atu evita asidente tráfegu, liu-liu iha loron-boot sira ne’ebé mak besik dadauk ona, DNTT hamutuk ho Polísia Tranzitu Nasionál, hato’o bá motorista transporte públikus hothotu, hanesan bis, mikrolete, no transportes mistu sira, ne’ebé mak tula pasajeirus labele liu kapasidade karreta nian,” Diretóra DNTT, Maria Antónia Vitór, hateten bá jornalista sira liuhosi konferénsia imprénsa iha Sala Auditóriu DNTT, Balide, Díli, Tersa (3/10/2023).

Dekretu-Lei Númeru 06/2003, Artigu 54, ne’ebé ko’alia kona-bá Kódigu Estrada, númeru 03 no 04, esplika katak, bainhira karreta laiha ona tuur fatin, kondutór sira labele tula tán pasajeiru, atu nune’e, bele fó seguransa bá iha pasajeiru sira hothotu ne’ebé mak uza transporte públiku refere.

Polísia Sei Halo Operasaun

Xefe Departamentu Polísia Tránzitu Nasionál, Superintendente Asistente Luis Costa, fundamenta katak bazeia bá iha avizu ne’ebé mak Polísia Tranzitu Nasionál ho DNTT halo ona tenke kumpre.

Orientasaun ka avizu ida ne’e, Tránzitu Nasional enkamiña no distribui ona bá iha Xefe Seksaun Tranzitu nian sira iha munisipiu 13 inklui RAEOA, atu bele haree ida ne’e, halo kontrolu tuir Dekretu-Lei Dekretu-Lei Númeru 06/2003, ne’ebé maka prevee tiha ona, kona-bá lei kódigu estrada nian.

Bainhira motorista ka kondutór sira la kumpri bá lei kódigu estrada ne’ebé iha, ekipa konjunta sei foti kedan medida tuir Lei no aplika mós ho sansaun koima  ho montante mínimu $15 no másimu $45.

Jornalista: Rogério Pereira Cárceres