Hatutan.com, (08 Novembru 2021), Dili—Prezidente Komisaun B Parlamentu Nasionál (PN), José Agostinho Sequeira ‘Somotxo’ husu ba Servisu intelijénsia atu buka tuir no investiga didi’ak fukun hosi krime ne’ebé ikus-ikus ne’e kontinua akontese iha munisípiu Baucau.

Somotxo preokupa no konsidera krime ne’ebé akontese iha semana kotuk, iha parte Baucau nian, tam aona iha kategoria krime públiku.

Nune’e, nia alerta katak, PNTL liuhosi Servisu Investigasaun Kriminál (SIK), hamutuk ho Policia Ciêntífica Investigaçăo Criminal (PCIC) no Serbisu Intelijénsia ka informasaun sira, tenke iha responsábilidade atu halo investigasaun kle’an hodi buak tuir nia kauza loloos.

“Konserteza sira tenke halo investigasaun. Serbisu informasaun no servisu intelijénsia iha PNTL, militár no aas liu maka serbisu intelijénsia nasionál,” Somotxo hateten iha Parlamentu Nasionál, Segunda (08/11/).

Kona-bá ne’e, parte Komandu Polísia Nasionál Timor-Leste (PNTL), alerta nafatina katak, sei halo atuasaun ba kazu krime-sira ne’ebé mosu hosi joven sira ho dekretu lei númeru 05/2017, tanba konfrontu ne’ebé molok ne’e mosu entre joven sira iha Munisipiu Baucau, deskonfia involve hosi membru Grupu Arte Marsiál (GAM).

Komandante jerál PNTL, Komisáriu Polisia, Faustino da Costa, hateten, to’o oras-ne’e Governu seidauk reativa atividade GAM iha bairru, maibé sei prosesa atu legaliza, buka no prepara hela dokumentu sira hodi  kompleta rekezitu tuir lei.

Komisáriu Faustino mós kontinua husu ba líder GAM sira atu kontinua konsolida membru hodi ba rejista iha Sekretária Estadu Juventude no Deaportu (SEJD) no Komisaun Reguladora Arte Marsiál (KRAM).

Husu ba responsável GAM sira atu labele hala’o bebeik atividade sira ne’e ho ‘ilegál’, tanba polisia sira nafatin atua bazeia ba dekretu lei.

Kona-bá membru Konsellu Polisiamentu Komunitáriu (KPK) sira ne’ebé instala ona iha kada suku, sira ne’e mai hosi membru konsellu nian hodi ajuda serbisu Ofisiál Polisia Suku (OPS), atu bele haree rezolve hamutuk problema komunidade sira nian iha baze. Maibé, infelizmente problema iha bairu sira nafatin akontese.

Maski nune’e, autór-sira ba kazu iha Baukau, oras-ne’e iha ona Polísia nia liman hodi kontinua ho prosesu investigasaun kriminál tuir lei.

Iha 01 Novembru 2021, tuku 19:00, mosu insidente ida iha Suku Samalari, Postu Administrativu Baucau Vila, rezulta joven mane ida kanek no mate fatin, tanba hetan tiru hosi oknum polisia ida ne’ebé halo hela atuasaun ba problema entre joven sira iha área ne’ebá.

Iha 06 Novembru 2021, tuku 17:35, mosu grupu ida kompostu hosi joven mane na’in-lima ne’ebé tenta halo asalta hasoru bus ho marka Avante ho diresaun hosi Dili ba Uatulari Vikeke, no bainhira to’o iha área Suku Garwai, Postu Aministrativu Baukau Vila, joven sira ne’ebé hamri’ik iha estrada ibun, tenta lori rai baku ajudante ida nia liman, maibé la konsege hakanek, inklui iha joven balun mós uza fatuk hodi duni tuir karreta ne’e iha dalan.

Aleinde ne’e, iha Domingu 07 Novembru 2021, iha tuku 20:11, mosu mós insidente ida iha área Becora, munisipiu Dili, iha ema deskoñesidu balun ne’ebé ho katana tá kanek joven mane ida seluk nia liman sorin parte karuk ho kondisaun kanek gráve.

Jornalista: Rogério Cárceres