Hatutan.com, (08 Novembru 2021), Díli—Ekipa Konjunta kompostu hosi Comissão Anti-Corrupção (CAC), Provedoria Direitu Umanu no Justisa (PDHJ), Comissão Função Pública (CFP), Polísia Nasionál Timor-Leste  (PNTL), Patrimóniu Estadu iha Ministériu Finansas ho Inspetór Gerál Estadu (IGE) deteta no halo apreensaun ba karreta Estadu hamutuk sia (9) iha ámbitu loron feriadu   ba Finadu nian hosi loron 01 to’o loron 02 fulan-Novembru, foin lalais ne’e.

Notísia iha Relasaun : Funsionáriu Balu Kontinua Uza Karreta Estadu Viajen ba Munisípiu

Diretór Departamentu Tránzitu Seguransa Rodoviáriu Nasionál, Superintendente Xefe Polísia, João Belo dos Reis. Foto/Hatutan.com

Diretór Departamentu Tránzitu Seguransa Rodoviáriu Nasionál, Superintendente Xefe Polísia, João Belo dos Reis, ba jornalista sira iha Komandu Jerál PNTL, Caicoli, Segunda (08/11/2021), relata katak operasaun tuir sirkulár ne’ebé mak PNTL hasai iha média sosiál no mós iha média eletrónika sira, kona-bá kooperasaun ba entidade hotu-hotu, atu bele deteta movimentu sirkulasaun transporte Estadu nian, tuir dekretu lei númeru 08/2003, kona-bá uzu transporte Governu nian ka estadu nian, sira deteta sirkulasaun karreta Estadu hamutuk sia (9).

Durante prosesu verifikasaun, deteta mós katak, karreta Estadu nian haat  (4) iha autorizasaun hosi dirijente ka fatin ne’ebé mak sira servisu bá, no karreta lima (5) seluk laiha autorizasaun.

“Karreta lima laiha autorizasaun ne’e, agora ami deteta hotu ona, ami enkamiña fila-fali ba iha Patrimóniu Estadu atu deteta loloos, karreta ne’e pertense ba sé, ministériu ne’ebé, depois enkamiña mós ba iha CAC atu bele verifika, karik mosu irregularidade ruma iha ne’ebá, ka kontra lei ruma iha ne’ebá, hola parte iha korrupsaun ruma karik, CAC mak sei halo verifikasaun,” Superintendente Xefe Polísia, João Belo dos Reis, informa.

Notísia iha Relasaun : Komunidade Tenke ‘Kesar’ Funsionáriu Utiliza Karreta Estadu iha Finadu

Durante ne’e mós Polísia Unidade Tránzitu Nasionál rejista  asidente tráfegu ne’ebé mak mosu iha fulan Outubru laran, hamutuk 137, kompostu hosi ema mate laiha, kanek todan na’in hitu (7) no restu kanek kama ‘an.

Halibur Reseita rihun $34 iha Postu Fronteira Batugade ho Salele

Polísia Nasionál Timor-Leste (PNTL), liuhosi Unidade Polísia Tránzitu (Poltranz), dezde  estabelese postu seguransa polísia iha loron 08 fulan-Jullu 2021 iha fronteira Batugade (Mota-ain) no Salele (Mota-masin), to’o mai ohin, halibur ona reseita kuaze rihun $34 ba kofre estadu.

Hosi totál reseita hirak ne’e, PNTL rekolla hosi transporte estranjeiru sira ne’ebé durante halo movimentasaun hosi rai viziñu Indonézia mai área Timor-Leste (TL) bazeia ba dekretu lei númeru 28/2017, kona-bá sirkulasaun transporte estranjeiru nian.

“Ha’u hanoin, presiza update ba públiku kona-bá reseita ne’ebé maka ami kontribui ba kofre estadu hosi sirkulasaun transporte veíkulu estranjeiru ne’ebé maka halo sirkulasaun ba ita nia nasaun. Ita estabelese postu tránzitu iha postu integradu rua maka, Mota-ain no Salele. Hosi ne’e, totál ita hahú monta postu iha loron 08 fulan-Jullu 2021, to’o data ohin, ita kontribui ona reseita ba estadu kuaze rihun $34,” Diretór Departamentu Tránzitu Seguransa Rodoviáriu Nasionál, Superintendente Xefe Polísia, João Belo dos Reis, informa.

Iha lei númeru 28/2017, kona-bá sirkulasaun transporte estranjeira ne’e, regula mós kona-bá kategoria atu selu kada transporte, sura tuir loron. Sé tama loron ida, ba karreta lijeiru hira, no karreta pezadu hira.

“Ha’u foti ezemplu simples, karreta pezadu, maka karreta sira ne’ebé mak tula naha-todan. Nia kuandu tama mai iha territóriu Timor-Leste, loron lima $30. Depois sé nia fila kedas, iha $7 no $5 ne’e iha. Tanba ne’e, tabela kona-bá selu nian iha tiha ona,” João Belo dos Reis hateten.

Bainhira transporte estranjeiru sira ne’e tama mai TL, aleinde haree kona-bá nia durasaun no lisensa, membru tránzitu sira ne’ebé destakadu, sei marka ka taka mós stiker ho kór mean ba loron lima, no metan vale ba loron ida.

“Iha parte seluk, atu labele hadau direitu ba sirkulasaun ita nia importadór sira iha ne’e, karreta estranjeiru ne’ebé mak tama mai ne’e, ita tenke fó guia-da-marcha ne’e, ba ninia destinasaun ida de’it. Porezemplu, nia husu atu ba Díli, nia so to’o Díli de’it, nia labale kontinua ba Aileu, Manatuto ka ba Liquiça. Tanba ne’e kuandu nia halo violasaun ba destinasaun ba loron ne’ebé mak nia autorizadu atu tama, ida ne’e ninia konsekuénsia multa ne’e maka’as,” João Belo dos Reis esplika.

Totál reseita ne’ebé rekolla iha fulan-Outubru nia rohan ne’e, hatama hosi postu Batugade, hamutuk $5.500, no postu Mota-masin, $2.280.

João Belo mós relata katak, totál taxa ka koima ne’ebé PNTL rekolla hosi komandu munisípiu 13, iha fulan-Outubru nian, hamutuk rihun $42,393 ne’ebé mak kontribui ona  ba kofre estadu.

Jornalista: Rogério Cárceres