Hatutan.com, (18 Novembru 2023), Díli–Ministériu Komérsiu no Indústria (MCI) sei halo ajustamentu bá empreza importadór foos sira ne’ebé sidauk hetan subsídiu husi Governu  liga ho implementasaun subsídiu intervensaun temporáriu bá estabilizasaun presu foos  kilograma 20  ho presu $9.00 kada saku bazeia bá dekretu-lei  númeru 76/2023.

Lee Mós: FRETILIN Konsidera Subsídiu Hosi Governu Hariku De’it Importadór Foos, Povu Kontinua Halerik

Foos iha armajenamentu CLN nian iha Tibar, Liquiça, ne’ebé fa’an ona ho presu $12.00 kada saka 25kg bá povu iha terítoriu nasionál. Foto/Elio dos Santos da Costa

Empreza importadór  ne’ebé  sidauk hetan subsídiu  mak  hanesan empreza  Lisun ho Alfa ho razaun  tanba stoke foos ne’ebé kompañia refere iha mak foos ho kuantidade kilograma 25 ho 30 kg, enkuantu  20 kg laiha ho nune’e tenke halo ajustamentu ida bá presu loloos hosi foos hirak ne’e, tanba foos ho 25 kg no 30 kg  folin sei as.

“Ami iha hela diskusaun ho sira atu haree katak hotu-hotu tenke distribui foos ho kilograma ne’ebé hanesan. 20 kg hahú la’o, enkuantu 25 kg iha hela evaluasaun entre empreza ho diretór relasaun komérsiu hodi hein orientasaun husi ministru kona-bá hahú distribui foos 25 kg,”  Vise Ministru MCI, Agostu Junior Trindade haktuir bá jornalista sira iha edifísiu MCI, Díli, Kinta (16/11/2023).

Empreza importadór foos rua mak fa’an ona foos 20 kg ho presu $9.00 husi sira-nia armazén rasik. Foos sira-ne’e ho marka hanesan Amor de Família husi Perisos no Beruang Merah husi Kreatif Furak.

Faze daruak bá kompañia Kreatif Furak hahú ona no sei kontinua hosi kompañia Perisos bainhira kompleta tonelada 2.500 bá faze dahuluk no durasaun tempu bá distribuisaun foos kada faze fulan ida. 

Agostu Junior esklarese dau-daun ne’e intervensaun kontinua la’o  iha kada munisípiu hodi identifika prosesu distinsaun distribuisaun foos refere no foos hirak ne’e husi kompañia ne’ebé.

Kona-bá kualidade foos Amor da Familia ne’ebé konsege hamosu preokupasaun husi públiku kona kór foos, Vise-Ministru MCI, Agostu Junior Trindade klarifika ekipa AIFAESA foti ona amostra no identifika katak kualidade foos la iha impaktu.

“Bele mosu saka ida ka saka rua ne’ebé  kualidade lad’iak maibé labele jeneraliza katak foos ne’e hotu-hotu la di’ak,” Agostu Junior Trindade hateten.

Jornalista : Leopoldina de Carvalho