Hatutan.com, (04 Dezembru 2023), Díli—Primeiru-Ministru (PM) Kay Rala Xanana Gusmão liu hosi despaixu númeru 014/GPM/XII/2023 harii komisaun tranzisaun bá mandatu membru sira Autoridade Rejiaun Administrativa Espesiál Oe-cusse Ambeno (RAEOA).

Despaixu Primeiru-Ministru ho nian ne’ebé publika ona iha Jornal Repúblika konsidera katak, Lei númeru 3/2014, loron 18 fulan-juñu, altera ho Lei númeru 3/2019, loron 15 fulan-Agostu, 2/2022, loron 10 fulan-fevereiru no 18/2023, loron 30 fulan-novembru, hodi kria Rejiaun Administrativa Espesiál Oe-cusse Ambeno.

Lee Mós: Proposta Alterasaun Da-toluk Lei Kriasaun RAEOA-ZEESM Aprovadu Iha Jeneralidade

Konsidera bá alínea a) hosi parágrafu 1 hosi artigu 15 Lei númeru 3/2014, loron 18 fulan-juñu, estabelese Autoridade Rejionál nu’udár órgaun deliberativu Rejiaun Administrativa Espesiál Oe-cusse Ambeno, no parágrafu b) hosi artigu ida-ne’e estabelese Prezidente Autoridade Rejiaun nian nu’udár órgaun ezekutivu.

“Konsidera mós katak, tuir artigu 4 Lei númeru 3/2014 loron 18 fulan-juñu, Primeiru-Ministru ezerse supervizaun bá órgaun Rejiaun nian,” Hatutan.com sita depaixu.

Konsidera ba artigu 5 hosi lei númeru 18/2023, loron 30 fulan-novembru, determina katak, ho ninia vigór, membru sira hosi Autoridade Rejiaun Administrativa Espesiál Oe-cusse Ambeno no mós Prezidente Autoridade Rejiaun Administrativa Espesiál Oecusse nia mandatu automatikamente hapara.

Konsidera Arsénio Paixão Bano no membru sira hosi Autoridade aprezenta bá Primeiru-Ministru sira-nia pedidu rezignasaun hosi Prezidente no membru Autoridade RAEOA.

Konsidera katak, importante atu assegura tranzisaun bá mandatu sira hosi membru sira Autoridade RAEOA nian iha maneira ne’ebé di’ak hodi hatama ninia situasaun administrativa no finanseira, molok hahú prossesu nomeasaun membru foun sira.

Iha paragrafu 1 no 2 hosi artigu 4 Lei numeru 3/2014, loron 18 fulan-juñu, iha ninia liafuan atuál, númeru 4 hosi Artigu 3 hosi Dekretu-Lei númeru 5/2015, loron 22 fulan-janeiru, iha ninia liafuan atuál, no númeru 3 hosi Artigu 6 Dekretu-Lei númeru 46/2023, 28 Jullu, Orgánika IX Governu Konstitusionál determina katak:

Komisaun ne’e harii atu halo tranzisaun ba membru sira hosi Autoridade Rejiaun Administrativa Espesiál Oe-cusse Ambeno, ne’ebé refere bá Komisaun mak responsavel ba  simu, hodi Primeiru Ministru nia naran, relatóriu mandatu hosi membru sira ne’ebé agora daudaun sai hosi Autoridade RAEOA no La prezudika bá provizaun sira iha parágrafu uluk nian, fornese relatóriu ida-ne’ebé aprezenta situasaun no avalia atividade administrativa no finanseira ne’ebé hala’o hosi RAEOA, ne’ebé inklui, entre sira seluk, karaterizasaun rekursu umanu sira-nian, inventáriu patrimóniu movel no imovel sira, identifikasaun obrigasaun kontratual, kompromissu sira seluk ne’ebé assume, no responsabilidade finanseira sira.

Komisaun ne’e kompostu hosi koordenadóir Sebastião José Luis dos Santos Pereira ho membru sira mak hanesan Dulce Guterres Junior, Agostinho Caet, Francisco da Costa Soares Borlaku, Benedito Escorial Fernandes, Januário Maia Guterres no Ricardo Alves Delgado.

Jornalista: Vito Salvadór