Hatutan.com (20 Dovembru 2023), Díli—Ministra Edukasaun (ME), Dulce de Jesus Soares seidauk simu informasaun kona-bá polémika konstrusaun edifísiu foun eskola Cesar Maulaka, Letefoho, munisípiu Ermera.

Ministra Edukasaun (ME), Dulce de Jesus Soares. Foto: Tomé da Silva.

“Ha’u seidauk iha informasaun kona-bá ida-ne’e,” Ministra Edukasaun, Dulce de Jesus hateten bá Jornalista Hatutan.com iha Parlamentu Nasionál (PN), foin lalais ne’e.

Lee Mós: Polémika Rai Konstrusaun Eskola Cesar Maulaka, Administradór Letefoho Husu MOP-MEJD Foti Desizaun

Antes ne’e Xefe Suku Haupu, Eusebio Alcino Maia hateten, polémika konstrusaun bá edifísiu foun eskola Cesar Maulaka iha suku Haupu, postu administrativu Letefoho, autoridade lokál entrega hikas bá Ministra Edukasaun (ME), Dulce de Jesus atu buka solusaun.

Xefe Suku Haupu esplika, edifísiu foun eskola Cesar Maulaka ne’e bainhira harii iha tinan 2021, iha duni problema entre autoridade lokál, parte Ministériu Edukasaun no mós Ministériu Obras Públika inklui na’in bá rai, iha Governu anteriór nia ukun.

Nia sita katak, dezentendimentu primeiru ne’e tanba laiha koordenasaun, enkuantu fatin ne’ebé Ministériu Edukasaun utiliza hodi harii edifísiu eskola ne’e konsideradu hanesan fatin sentru bá Letefoho tomak, liuliu bá suku 8 ne’ebé iha.

Autoridade lokál ne’e hatutan, maioria komunidade, liuliu xefe suku na’in-ualu la konkorda atu harii edifísiu eskola iha fatin ne’e tanba fatin ne’e sai sentru bá Letefoho tomak atu utiliza bá kualkér atividade, hanesan komemorasaun loron nasionál ruma hanesan Proklamasaun Unilaterál Indepedénsia  28 Novembru, no loron nasionál sira seluk, úniku fatin ida-ne’e mak bele akumula populasaun hotu hosi suku 8 ne’e rasik no laiha tán fatin seluk.

Ho ida-ne’e maka antes ne’e xefe suku na’in-ualu asina no hato’o karta lamentasaun ida bá parte autoridade Munisípiu Ermera no parte Ministériu Edukasaun iha momentu ne’ebá, maibé laiha solusaun ruma to’o mandatu hotu iha tinan 2023.

Konteúdu karta ne’e deskreve katak, autoridade lokál sira la konkorda duni atu harii edifísiu foun eskola Cesar Maulaka iha fatin ne’e no to’o agora mós hanesan autoridade lokál kontinua la konkorda atu harii eskola iha fatin ne’e.

“Maski nune’e, edifísiu eskola ne’e harii ona entaun ida-ne’e ami entrega hikas bá Ministériu Edukasaun no parte Autóridade Terras Propriedade iha IX Governu Konstitusionál atu muda ka la muda ne’e desizaun iha parte hirak ne’e nia liman,” Eusébio Alcino Maia hateten bá Hatutan.com, iha CCD, foin lalais ne’e.

Nia mós haree katak, maski seidauk inaugura maibé estudante sira utiliza ona edifísiu foun ne’e hodi hala’o prossesu aprendizazen, no autoridade lokál ne’e fó fiar bá parte Ministériu Edukasaun ho Sekretária Estadu Terras no Propriedade (SETP) atu bele buka solusaun.

Lee Mós: Polémika Konstrusaun Eskola Cesar Maulaka, MEJD La Koordena ho Diresaun Terras no Propriedade Ermera

Jornalista Estajiária: Zita Menezes