Hatutan.com,  (05 Janeiru 2024), Díli—Prezidente Repúblika (PR), José Ramos-Horta konsidera identidade Timor-Leste (TL) nian ida ne’ebé sai ai-rin ida forte no metin liu maka Katolisizmu no prezépiu Natál sira ne’ebé halo reprezenta Timoroan nia kultura no fiar.

Konkorrente sira iha atrasaun prezépiu Natál 2023 iha Palásiu Prezidensiál Bairru-Pité, simu prémiu hahú hosi $1.000 to’o $250. Foto: Vito Salvadór.

Prezidente Repúblika haree identidade Timor nian ida forte liu maka Katolisizmu ho omojenidade relijiozu, tensaun no instabilidades menus, signifika relijiaun bele barak maibé depende bá líder sira halo jestaun, iha Timor minoria maka Protestante no minoria Muslumana maibé iha relasaun di’ak tebtebes.

Lee Mós: Prezépiu Natál Nu’udár Atrasaun Turizmu Relijiozu Úniku

“Iha Timor laiha tensaun relijiozu no radikalizmu relijiaun no ida-ne’e mak Prezidénsia Repúblika haree oinsa tau konsiderasaun bá kreatividade joven sira nian atu halo prezépiu Natál ne’ebé bele sai hanesan atrasaun turístiku relijiozu ne’ebé bele dada atensaun turista sira mai vizita Timor-Leste. Ho importânsia prezépiu Natál ida-ne’e, Prezidénsia Repúblika no  Governu hamutuk ho Igreja hola inisiativa atu fó oportunidade ba joven sira no komunidade sira halo prezépiu Natál ne’ebé sai hanesan identidade kulturál relijiozu Timor-Leste nian,” Ramos-Horta hateten iha Palásiu Prezidensiál Nicolau Lobato Bairr-Pité, Sesta (05/01/2024).

Xefe Estadu fó parabéns bá joven sira hotu ne’ebé halo prezépiu Natál no tinan oin mai sei halo di’ak liután no tinan seluk Prezidénsia Repúblika fó de’it apoiu no inisiativa bele mai hosi Parókia, Suku, Postu-Administrativu no munisípiu, enkuantu Prezidénsia Repúblika fó de’it apoiu prémiu.

Representante ekipa juri nasionál, Nuno Horta Assis hateten, prezépiu Natál ne’ebé halo iha área Palásiu Prezidensiál Nicolau Lobato Bairr-Pité nia oin mesak di’ak, furak no kapás ho kreatividade di’ak hotu.

Nia afirma, iha kompetisaun sempre iha balun ne’ebé iha oin no balun tuir mai tanba ida-ne’e mak natureza kompetisaun nian.

“Prezépiu Natál tinan ne’e halo ami ekipa juri susar atu fó valór tanba hotu-hotu iha kreatividade di’ak, badinas no hatudu talentu ne’ebé di’ak tebes,” Nuno Horta Assis hateten.

Maski nune’e, ekipa iha ninia kritéria rasik hodi halo avaliasaun bazeia bá kreatividade, kulturál no relijiozidade.

Iha aspetu tolu ne’e nia persentajen la hanesan no hosi tolu ne’e tau hamutuk mak hetan prezépiu Natál ne’ebé di’ak liu no merese bá prémiu hanesan manán-na’in.

Prezepiu Natál ne’ebé la hetan mellor klarifikasaun la signifika la di’ak, maibé iha aspetu balun ne’ebé maka tenke hadi’a bainhira iha tinan oin halo fali kompetisaun.

Prezidente Komisaun Organizasaun no Asesór Gabinete Sosiedade Sivil Prezidénsia Repúblika, Quintiliano Moniz hateten inisiativa bá kompetisaun prezépiu Natál ne’e mai kedan hosi tinan kotuk, maibé la konsege realiza tanba Konferénsia Episcopal Timorense (CET) hasai ona karta pastorál hodi bandu halo prezépiu Natál ho razaun oin-oin ne’ebé iha momentu ne’ebá aprezenta.

Tanba ne’e, iha tinan ne’e Prezidénsia Repúblika koordena ho Igreja hodi realiza no ohin fó prémiu bá prezepiu Natál sira ne’ebé di’ak liu hodi valoriza esforsu joven no komunidade sira ne’ebé halo ona prezepiu Natál iha resintu Prezidénsia Repúblika no mós iha munisípiu.

“Prezépiu Natál 25 ne’ebé hari ka halo iha areador Palásiu Prezidensiál, ita fó prémiu osan no mós sertifikadu apresiasaun,” Quintiliano Moniz hateten.

Ekipa juri halo selesan no iha prezepiu hamutuk neen mak mak di’ak liu no manan na’in dahuluk hetan $1.000 ho sertifikadu, manan nain daruk $800, manan nain datoluk $700, manan nain dahaat $600, manan nain dalima $500 no ikus liu manan nain daneen $400, no ba sira na’in 19 seluk hetan sertifikadu no osan hamutuk  $250.

Lee Mós: Xanana ho Ramos-Horta Fahe Prémiu bá Prezépiu Furak iha Palásiu Prezidensiál

Jornalista: Vito Salvadór