Hatutan.com, (15 Janeiru 2024), Díli—Parlamentu Nasionál (PN) simu keixa hosi sidadaun na’in-tolu mai hosi aldeia Manuinpena, suku Lalisuk, sub rejiaun Pante Makasar, Rejiaun Administrativa Espesiál Oecusse Ambeno (RAEOA) katak, kompañia fernesedór programa Cesta Bázika deve hela sira-nia karau hamutuk sanulu resin tolu (13) no to’o oras-ne’e seidauk selu.

Kestaun ne’e levanta hosi deputadu bankada CNRT, Firmino Taequi iha plenária, Segunda (15/01/24).

Lee Mós: CAC-PDHJ Identifika Lakuna no Defisiénsia iha Preparasaun Implementasaun Programa Cesta Bázika

Iha intervensaun, deputadu oecusse oan ne’e preokupadu hodi sita kompañia ne’ebé deve ho naran Revivel Fraternál Unipesoal Lda, halo povu baibain sai vítima bá programa Cesta Bázika iha ne’ebé la selu to’o ohin loron no laiha informasaun ruma.

“Ohin dadersan vítima sira hosi Programa Cesta Bázika mai lori keixa hatama iha bankada CNRT. Ema sira ne’e hanesan matadalan hodi bá deve ema nia karau tanba to’o agora kompañia la selu,” Firmino Taequi hateten iha plenária.

Deputadu ne’e konta tuir kronolojia katak, antes ne’e Prezidente Autoridade RAEOA, Arsénio Paixão Bano bolu kompañia ho naran Revivel Fraternál Unipesoal Lda hosi Díli bá deve ema nia karau hamutuk 13 iha loron 20 fulan Jullu 2022 no oho duni iha suku Lalisuk, sub-rejiaun Pante Makasar.

Nia hatutan, informasaun hosi vítima sira katak, Arsénio Bano transfere duni ona osan atu selu karau 13 ne’e bá kompañia maibé kompañia ne’e halai tiha mai Díli no to’o agora la selu.

Taequi sita mós buat ne’ebé vítima sira informa katak, karau 13 ne’ebé kompañia deve ne’e, karau neen hosi sidadaun Hermino Sila ho totál $5.225, karau neen hosi sidadaun Benjamin Ego ho osan  $6.350, karau ida hosi Xefe Suku Lalisuk.

Tuir informasaun katak, vítima sira mai buka na’in bá kompañia Revivel Fraternál Unipesoal Lda iha Díli durante semana ida resin ona, maibé seidauk hetan.

Tuir planu, vitima sira hakarak hasoru diretamente ho Primeiru Ministru (PM), Kay Rala Xanana Gusmão hodi hato’o assuntu ne’e.

Kona-bá ne’e, parte Governu seidauk fó resposta tanba Vise-Ministru Asuntu Parlamentár Adérito Hugo da Costa la marka prezensa iha plenária, Segunda (15/01/24) hanesan baibain, maibé tékniku hosi Vise-Ministru Asuntu Parlamentár anota hela asuntu ne’e hodi aprezenta bá Governu atu bele buka solusaun.

Jornalista Estajiária: Zita Menezes