Hatutan.com, (01 Fevereiru 2024), Díli—Superiór sira iha Eletrisidade Timor-Leste, Empreza Públiku (EDTL,E.P) kontinua “taka-ibun” bá problema no lamentasaun hosi funsionáriu antigu  EDTL,E.P nian hamutuk 500 ne’ebé sofre konsekuénsia hosi desizaun superior sira-nia hodi ko’a sira-nia saláriu kada ema 50%.

Lee Mós: Funsionáriu EDTL,E.P Na’in-150 Halo Petisaun Kontra Superiór Sira Tanba Ko’a Sira-Nia Saláriu 50%

Tékniku EDTL,E.P halo menutensa bá liña distribuisaun eletrisidade. Foto/Hatutan.com

Iha Kinta (01/02/2024), haleu tuku 11.20 Otl,  Hatutan.com hakat dala-ida tan bá edifísiu EDTL,E.P atu hasoru prezidente EDTL,E.P, Paulo da Silva, hodi konfirma karta petisaun ne’ebé asina direta hosi funsionáriu antigu sira  hamutuk na’in-150 tanba sira la satisfás hodi desizaun “prematura” hosi superiór sira kona-bá ko’a sira-nia saláriu.

To’o iha edifísiu EDTL,E.P iha Caicoli, Díli, Hatutan.com hasoru Komisáriu Ezekutivu Servisu Koorporativu EDTL,E.P, Júlio de Jesus Gonçalves ho Komisáriu Ezekutivu Servisu Tékniku, Latino Jerónimo, maibé sira-na’in-rua lakohi fó komentáriu buat ruma kona-bá informasaun funsionáriu tékniku profisionál na’in-500 ne’ebé sira-nia saláriu hetan ko’a laiha justa kauza.

Hatutan.com esforsu atu bá hasoru direta Prezidente EDTL,E.P, Paulo da Silva, maibé komisáriu ezekutivu na’in-rua ne’e dehan katak saida mak sira-na’in-rua ko’alia nee sei hanesan mós prezidente nia pozisaun no prezidente sei la ko’alia buat ida hodi hein to’o nia tempu mak foin bele ko’alia ka pronúnsia buat ruma.

Foin lalais ne’e, funsionáriu antigu EDTL,E.P hamutuk na’in-150 ne’ebé servisu iha Díli reprezenta nia maluk sira ne’ebé hala’o hela servisu iha munisípiu halo karta protesta ka petisaun  bá Prezidente EDTL,E.P, Paulo da Silva ho Prezidente Komisaun Ezekutivu EDTL,E.P.

Karta funsionáriu tékniku profisionál EDTL,E.P haruka bá prezidente EDTL,E.P. Foto/Repro

Karta ho nia asuntu Ezijénsia bá revizaun nivel kategoria & nivel salariál funsionáriu EDTL, E.P bazeia bá despaxu númeru 105/GMOP/2022 ne’e hato’o mós koñesimentu bá Ministru Obras Públika (MOP), Samuel Marçal ho Sekretáriu Estadu Eletrisidade no Agua, Santos Noronha.

Funsionáriu sira ne’ebé sente sofre hosi polítika ko’a sira-nia saláriu kada ema 50% hosi sira-nia saláriu báziku ne’e la simu no husu klarifikasaun hosi Prezidente EDTL,E.P, Paulo da Silva. Maibé to’o agora seidauk fó esplikasaun no sira mós sente duvida tanba bainhira EDTL,E.P estabelese kontratu indeterminadu ho sira iha fulan-Janeiru 2024, la iha kláuzula ida mensiona sira ida-idak nia  saláriu ka remunerasaun.

Iha karta petisaun ne’e, funsionáriu sira ne’ebé sira-nia saláriu ko’a fó tempu bá prezidente EDTL,E.P, Paulo da Silva, atu bele esplika iha tempu badak nia laran no bainhira la hetan resposta pozitiva, sira sei avansa kazu ne’e hodi hetan justisa no lia-loos.

Jornalista: Zita Menezes