Hatutan.com, (07 Fevereiru 2024), Díli— Prezidente Repúblika (PR), José Ramos-Horta rekomenda bá IX Governu Konstitusionál atu prolonga prazu pasaporte, labele tinan lima de’it maibé tau to’o tinan sanulu (10).

Xefe Estadu hato’o rekomendasaun ne’e iha Aeroportu Internasionál Prezidente Nicolau Lobato Comoro, Kuarta (07/02/2024).

Lee Mós: TL Sei Selebra Akordu ho Vietname Kona-bá Izensaun Vistu bá Titulár Pasaporte Ordináriu, Diplomátiku no Servisu

“Ha’u hateten, favór hanoin didi’ak antes halo desizaun ruma, pasaporte fó validade bá tinan 10. Signifika bá estudante sira gasta osan, laiha ulun fatuk moras bá buat sira ne’e. Entaun, ha’u espera katak pasaporte fó admite ne’e tinan 10. Ne’e urjente laiha buat ida ne’ebé urjente liu ida-ne’e, Timoroan servisu Inglatera, Austrália, Korea du Súl ne’e tinan 2023 Timoroan sira iha Inglatera sira hatama osan mai Timor millaun $110,” Ramos-Horta rekomenda.

Xefe Estadu mós konsidera katak, dala ruma Governu la hanoin didi’ak ho kakutak, hanesan estudante sira bá Indonézia ka bá ne’ebé de’it, sira hetan de’it pasaporte trata tinan ida liu tiha, depois hein tán viza atu bá universidade.

“Tanba naran, depois bá-mai finalmente hetan atrazu tama universidade maibé pasaporte liu tiha tinan rua, depois to’o iha ne’ebá imigrasaun Indonézia ne’ebé labele fó viza tinan lima tanba pasaporte ne’e validu tinan tolu, bainhira falta de’it fulan neen remata la vale ona,” Ramos-Horta preokupa.

Xefe Estadu mós lakohi rona Ministériu Justisa nia argumentu kona-bá kustu ekipamentu ne’ebé sei bá tau karun tebe-tebes, no husu katak favór haree ho kakutak oitoan labele halo azneiras oi-oin.

Fasilita Produsaun Pasaporte bá Timoroan iha Reinu Unidu

José Ramos-Horta husu atu Ministeriu Justisa liu hosi Diresaun Jerál Servisu Rejistu Notariadu instala ekipamentu emisaun pasaporte iha Reinu Unidu, Koreia Súl no Austrália inklui nasaun sira ne’ebé Timoroan sira hela bá, nune’e bele fasilita halo atendimentu emisaun pasaporte ba sidadaun sira bainhira data emisaun inválidu.

Prezidente Repúblika espera Ministériu Justisa halo buat ne’ebé nia rekomenda tiha ona bá Primeiru Ministru no Xefe Governu konkorda atu haree Timoroan lubuk ida, rihun ba rihun iha Reinu Unidu, Korea Súl, Austrália, Embaixada TL iha ne’ebá, tenke monta ekipamentu modernu ne’ebé rai hotu-hotu iha.

“Atu iha ne’eba halo emisaun ba pasaporte ne’e mak ha’u rekomenda, ha’u espera ida ne’e mak sira halo no halo urjente, tamba orsamentu iha ona,” nia rekomenda.

Jornalista: Vito Salvadór