Hatutan.com, (21 Fevereiru 2024), Díli—Eis Prezidente Tribunál Rekursu (PTR), juis Claudio Ximenes interga hodi fó apoiu bá Grupu Traballu Reforma Justisa ne’ebé oras-ne’e daudaun halo hela diagnóstika nasionál no iha fulan Marsu sei aprezenta rezultadu bá Prezidente Repúblika (PR), José Ramos-Horta.

Koordenadora Grupu Traballu Reforma Justisa Lúcia Lobato hamutuk ho eis Prezidente Tribunál Rekursu (PTR), juis Claudio Ximenes halo audiénsia ho Prezidente Repúblika, José Ramos-Horta, iha Palásiu Prezidensiál Bairru-Pité, Kuarta (21/02/2024). Foto: Tomé da Silva.

Koordenadora Grupu Traballu Reforma Justisa Lúcia Lobato ho ekipa ne’e ohin Kuarta (21/02/2024), hasoru-malu ho Xefe Estadu hodi husu mós apoiu bá reforma justisa, iha Palásiu Prezidensiál Nicolau Lobato Bairr-Pité.

Lee Mós: Seitór Justisa Dezorientadu no Moras Todan, Sei Reforma Buat Tolu

Lucia Lobato hateten, Timor-Leste presiza iha justisa ida ne’ebé forte no kredível tanba ne’e sei halo diagnóstika nasionál ho parte interesadu sira hanesan tribunais, juis, prokuradór, defensór públiku, sosiedade sivíl, emprezáriu no mós organizasaun internasionál sira ne’ebé servisu iha Timor Leste atu halibur dadus no dokumentu hotu hodi halo reforma ida di’ak.

“Péritu sira ne’ebé apoia servisu reforma seitór justisa kompostu hosi juis Claudio Ximenes ne’ebé ho fuan bo’ot hakarak fila hikas mai Timor-Leste hafoin tinan 10 husik hela rai ida-ne’e,” Lúcia Lobato hateten.

Nia hatutan, iha mós advogadu Timoroan ida ne’ebé mós servisu iha grupu traballu ida-ne’e, iha esperénsia tinan barak haree prossesu sira iha tribunais ho difikuldade ne’ebé iha, nia brani sai advogadu iha rai ida-ne’e, iha mós akademista hosi universidade Coimbra tanba ekipa presiza rona hosi akadémiku sira kona-bá reforma justisa, inklui mós apoiu hosi UNDP no sira seluk tán.

Iha sorumutu ho Xefe Estadu, Lúcia Lobato informa kona-bá servisu balun ne’ebé sira halo ona no aproveita oportunidade ida ne’e husu Xefe Estadu nia apoiu kona-bá reforma justisa ne’e rasik.

“Ami kontente Xefe Estadu ko’alia buat barak, apoiu atividade ne’ebé ami halo no husu katak ami tenke servisu lalais ona tanba seitór ne’e presiza duni rekursu oinsá Estadu tomak atu halibur forsa hodi hadi’a seitór justisa no fó kondisaun hotu ba tribunais bele hala’o kna’ar, nune’e bele fó bá ita-nia povu justisa ida ne’ebé sira rasik hakarak,” nia esplika.

Durante enkontru, ekipa traballu ne’e mós kontente tebes ho motivasaun sira hosi Xefe Estadu, tanba ne’e ekipa ne’e sei kontinua servisu haleu Timor laran tomak no iha Marsu sei hato’o fila-fali bá Xefe Estadu no mós ba povu tomak kona-bá rezultadu servisu ne’ebé halo ho relatóriu ikus ne’ebé sei hato’o ba Governu atu oinsa ajuda Governu halo reforma iha seitór justisa.

Ekipa ne’e foin hetan nomeasaun hosi IX Governu Konstituisionál iha Agostu 2023 no hahú servisu iha Setembru, iha fulan tolu nia laran ekipa ko’alia ho parseiru sira no konkretamente UNDP mak halo rekrutamentu bá pessoál hirak ne’ebé mai apoia grupu traballu ne’e.

Lúcia Lobato iha esperansa katak ho servisu ida-ne’e bele apoia Estadu TL hari sistema ida forte iha seitór justisa.

Jornalista: Vito Salvadór