Hatutan.com, (06 Marsu 2024), Díli-Xefe Estadu Maiór FALINTIL-Forsa Defeza Timor-Leste (F-FDTL), Brigadeiru Jenerál José da Costa Soares “TRIX”, husu bá soldadu sira iha Unidade Apoiu Servisu (UAS) atu kontinua hatudu hahalok di’ak hodi serbí instituisaun armada tuir regra militár.

Lee Mós: Dezenvolvimentu F-FDTL Tenke Tuir Konseitu Estratéjiku Defeza no Seguransa Nasionál

Membru F-FDTL sira halo marsa FALINTIL ho komemora loron FALINTIL bá da-48, 20 Agostu 1975-20 Agostu 2023. Foto/Rogério Pereira Cárceres.

Brigadeiru TRIX, halo apelu ne’e bainhira reprezenta Xefe Estadu Maiór Jenerál F-FDTL, Tenente Jenerál Domingos Raúl “Falur Rate Laek” hodi partisipa iha serimónia aniversáriu UAS nian iha Sentru Instrusaun no Treinu Komandante Nicolau Lobato, Metinaro, Kuarta  (06/03/2024).

Komandante TRIX dehan, iha selebrasaun hothotu bá loron komponente ka unidade nian importante tebes atu militár hothotu bele reflete, identifika, bá dezenvolve, lider forte sira, ho vizaun forsa vontade nian.

Komandu F-FDTL presiza kria, no treina militár sira, ne’ebé la’ós de’it atu adopta lalais bá sistema no prátika foun sira, maibé mós bele eduka ema seluk atu tuir forsa Timoroan ninian.

Komemorasaun loron UAS nian ne’e reprezenta sira-ninian kompromisu partilladu no kontínua, hodi asegura katak, F-FDTL iha valór no abilidade sira ne’ebé presiza atu lidera UAS  bá jerasaun tuir mai.

“Bá Soldadu ne’ebé agora serbí iha UAS nia okos, ha’u enkoraja imi atu responde loro-loron hosi imi nia superior sira, atu mantein hahalok di’ak, hahalok ne’ebé ohin ha’u hatete ona, hahalok ne’ebé ita -ia bei’ala sira hanorin, no hatudu bá ita. Atu halo tuir regra sira ne’ebé estabelese ona, hosi instituisaun, sobre, nobre, ne’ebé ita hotu serbí ho orgullu,” Brigadeiru Jenerál José da Costa Soares “TRIX”, hateten.

Komandante TRIX dehan, soldadu no membru sira hotu nu’udár esperansa no futuru lider bá F-FDTL, tanba ne’e, nia husu atu prepara sira-nia saúde mentál no fíziku hodi kontinua mehi hosi eroi sira ne’ebé fó sira nian vida moris bá Timor-Leste nia libertasaun nasionál.

“Ita hotu iha ne’e iha devér sagradu atu haka’as aan, loron bá loron, hodi kontinua servisu maka’as, hodi hasa’e sira nia sakrifísiu ne’ebé folin boot, hodi projeta ita-nia rai lulik bá pás, estabilidade ne’ebé mak agora ita hotu sei kaer, tane, tau iha ita nia kabas leten,” TRIX fó hanoin.

Brigadeiru Jenerál F-FDTL ne’e mós husu bá komandante no ofisiál sira hotu iha UAS, responsabilidade atu komanda, komunikasaun bá nia soldadu sira, komprende sira-nia problema pesoál, sira-nia moris di’ak, hatene sira-nia moris pesoál, no foti desizaun bazeia bá regra, no padraun sira tuir regulamentu dixiplina militár no estatutu militár, ne’ebé loron, kalan, komanda sira-hotu.

“Ita iha dalan ne’ebé loos, atu harii forsa armada profisionál, no kontribuisaun hosi ita-boot sira ida-idak, tuir lema ne’ebé sua-exelénsia Jenerál Xefe, hatete tiha ona iha dia 02 fulan-Fevereiru 2024, iha Kuartél Jenerál, katak, tempu ona bá ita atu profesionaliza, tempu ona bá ita atu moderniza,” komandante TRIX afirma tan.

Jornalista: Rogério Pereira Cárceres