Connect with us
Pakote Ahi

Nasionál

30 Agostu 1999 Nu’udár Loron bá Libertasaun Nasionál

Published

on

Hatutan.com, (30 Agostu 2023), Díli-Povu Timor-Leste iha loron 30 agostu 2023, komemora loron Konsulta Populár (Referendum) bá dala-24 (30 agostu 1999 to’o 2023). Xefe Estadu Maior FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”, konsidera loron 30 Agostu, nu’udár loron bá Libertasaun Nasionál, tanba povu tomak bá deside liuhosi fó sira-nia votu hodi hili CNRT bá ukun rasik an.

Lee Mós: Iha Misa Loron Konsulta Popular, Xanana Deklara Ukun ho Responsabilidade no Domin

Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’. Foto/Elio dos Santos da Costa

La’ós ne’e de’it, 30 Agostu 1999 ne’e, tuir Falur Rate Laek, hanesan objetivu supremu ka objetivu boot no aas liu, luta naruk ne’ebé hosi kedan tempu abon no beiala sira nian, hodi defende sira-ninian identidade rasik.

“30  Agostu ne’e, loron ida ne’ebé, loron  libertasaun. Povu tomak, deside objetivu supremu, ne’ebé uluk, ita-nia avo sira, beiala sira ne’ebé funu bá sira-nian identidade, kulturál, identidade ekonómiku, identidade polítiku, ne’e, sira luta, ninia obejtivu mak ita ukun an,” Tenente Jenerál Falur Rate Laek hateten bá jornalista sira, foin lalais ne’e.

Komandante Frente Armada bá Libertasaun Nasionál Timor-Leste (FALINTIL) ne’e afirma, Konsulta Populár iha 30 Agostu 1999 ne’e, prosesu ida ne’ebé liuhosi guerra remota ka funu iha foho, área rural, atu luta bá libertasaun nasionál.

Advertisement

“Ninia objetivu supremu ne’ebé ita hakarak. Ita uluk, luta bá objetivu ida be dehan, sensibilizasaun opiniaun públika internasionál. Opiniaun públika ne’e, fó presaun, para atu halo Referendum. Ne’e mak ita realiza ida ne’e, ne’ebé vitória boot ne’ebé alkansa, mak ita hetan liberdade. Ne’ebé, ema labele trai ida ne’e, ema labele halo foer ida ne’e, ema labele halo mihis ida ne’e. Tenke hametin ida ne’e,” Tenente Jenerál Falur Rate Laek hateten.

Iha sorin seluk, Francisco da Cunha “Laloran” ne’ebé uluk rekruta hosi Organizasaun Nasoens Unidas nian (ONU) ka UNAMET nu’udár Polling Staff, hodi organiza no tau matan bá prosesu eleisaun iha 30 Agostu 1999, iha sentru votasaun Eskola Sekundária 10 de Dezembro Comoro, Dili (uluk SMP2), fó sasin katak, altura ne’e, prosesu eleisaun hahú iha dadeersan tuku 06:00 de’it, nia haree Timoroan barak, kompostu joven sira, ferik-katuas, defisiente sira, ho entuzizmu hakbesik aan bá sentru votasaun, hodi hili ukun-rasik an.

“Ami mak sai servidór bá votasaun iha tempu ne’ebá. Ha’u nia observasaun iha tempu bá, katak, ema barak mak bá tuir vota, tanba hakarak duni atu Timor ukun an. Maibé, situasaun iha tempu ne’ebá mós, ami sente iha presaun nia laran, tanba milísia pro-otonómia sira besik hela iha sentru votasaun, balu mós tuir hotu vota. Tanba ne’e maka, ita Timoroan sira ne’ebé vota bá ukun an, depois de vota, sira fila kedan bá uma,” Francisco da Cunha bá  konta tuir bá Hatutan.com, iha nia rezidénsia Aldeia São José Ai-meti Laran, Suku Comoro, Kuarta (30/08/2023).

Polling staff UNAMET iha 1999, Francisco da Cunha “Laloran”. Foto/Rogério Pereira Cárceres

Francisco da Cunha konsidera loron 30 Agostu 1999 hanesan loron nasionál no importante bá Timor-oan hotu, liu-liu hirak ne’ebé uluk hakarak luta bá ukun  rasik an.

Maske nune’e, nia sente lamentável tebes, tanba ohin, Governu rasik selebra loron ne’e, ladun importante. Tuir loloos, iha loron istóriku ida-ne’e, Governu mós tau osan aloka bá suku sira, realiza eventu iha ne’ebá, hodi nune’e komunidade sira bele halo reflesaun kle’an bá memória luta sira iha pasadu. Nune’e,  fó hanoin fali bá labarik sira, liu-liu jerasaun foun katak, loron ida 30  Agostu ne’e, importante bá Timor-Leste nia istória libertasaun nasionál.

Konsulta Populár entrega bá iha Nasoens Unidas nia Misaun iha Timor-Leste (UNAMET), lidera hosi Ian Martin. Bainhira to’o ona iha fulan-Juñu 1999, UNAMET tau tiha ona staff eleitóral internasionál, polísia no ofisiais militár ligasaun ninian iha distritu 13 hotu. Maibé violénsia la’o nafatin no bainhira buka atu harii dame la konsege.

Advertisement

Votante sira ne’ebé rejístadu hodi bá tuir votasaun iha Konsulta Popular ne’e hamutuk 451, 792 no votante ho persentajen  98.66 mak vota iha eleisaun 30 Agostu 1999.

Konsulta Popular nia rezultadu fó sai iha loron 04 fulan-Setembru 1999, ne’ebé hatudu votante ho porsentajen 21.5 hili ka vota bá autonómia espesial ho Indonézia no Timor-oan  ho porsentajen 78.5, vota bá CNRT hodi rejeita autonomia espesiál ho Indonézia. 

Jornalista: Rogério Pereira Cárceres

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

Dezastre Naturál Hamate Ema Na’in-Rua no Estraga Uma 55

Published

on

Hatutan.com, (18 Juñu 2024), Díli—Durante semana ida, hahú hosi loron 10 to’o 17 fulan Juñu 2024 Autoridade Protesaun Civil (APC) rejista ema na’in-rua lakon-vida  no uma hamutuk 55 mak hetan estragus hosi dezastre naturál iha territóriu tomak.

(more…)

Kontinua Le'e

Nasionál

GUN Agradese Ramos-Horta Nia Advokasia bá Solusiona Konflitu Myanmar

Published

on

Hatutan.com, (18 Juñu 2024), Díli- Governu Unidade Nasionál (GUN) agradese Prezidente Repúblika, José Ramos-Horta nia advokasia bá solusiona konflitu iha Myanmar.

(more…)

Kontinua Le'e

Nasionál

Idul Adha Fó-Hanoin Kona-bá Identidade, Espíritu Unidade no Toleránsia Relijiozu

Published

on

Hatutan.com, (17 Juñu 2024), Díli- Prezidente Repúblika (PR), José Ramos-Horta hateten selebrasaun loron Idul Adha fó-hanoin hikas kona-bá identidade relijiaun, espíritu unidade no toleránsia relijiozu iha Timor-Leste.

(more…)

Kontinua Le'e
Advertisement

Trending