Hatutan.com, (19 Marsu 2024), Díli – Tribunál Judisiál Primeira Instánsia Díli (TJPID), liuhosi Juis turnu Jumiati Freitas, deside aplika medida koasaun Termu Identidade Rezidénsia ( TIR) bá arguido na’in-tolu ne’ebé ameasa ekipa inspesaun ho  Sekretáriu Estadu Asuntu Toponímia no Organizasaun Urbana (SEATOU) Germano Santa Brites  bainhira atua bola guling iha área Aitarak-Laran, Postu Administrativu Dom Aleixo, Munisípiu Díli, foins lalais ne’e.

Lee Mós: PNTL Detein Supeitu Na’in-Tolu Ameasa SEATOU Durante Halo Intervensaun bá Jogu Bola Guling

Sekretáriu Estadu Asuntu Toponímia no Organizasaun Urbana, Germano Santa Brites Dias hamutuk ho PCIC no PNTL hala’o operasaun hodi buska no apreesaun bá jogu Bola Guling iha Díli, 12 fulan-Marsu 2024. Foto/Mídia SEATOU

Iha primeiru interrogatóriu, Tersa (19/03/2024),  Defeza bá arguido sira, Jose Maria da Costa Guterres, hateten Ministériu Públiku promove nia kliente na’in-tolu ho inisiál  AX, ADB no ASP    ho krime  obstrusaun bá autoridade públiku inklui jogu ilísitu ne’ebé  previstu iha artigu 253 iha Kódigu Penál Timor-Leste.

Arguido sira konfesa katak, sira loke jogu bola guling  ne’e la’ós ilegál, maibé sira iha karta lisensa bá estadu, tanba nee iha prémiu interrogatóriu la iha provas ida katak arguido halo obstrusaun bá autoridade públiku.

“Arguido sira hetan TIR tanba  la iha indísiu forte katak sira komete krime obstrusaun ba autoridade públiku inklui jogu ilísitu,” Defeza Jose Maria da Costa Guterres informa.

Parte defeza husu ba tribunal atu aplika medida koasaun Termu Identidade Rezidénsia (TIR) bá arguido sira, razaun tanba la iha faktu provadu no la iha indísiu krime ne’ebé Ministériu Públiku promove ba sira.

Arguido na’in-tolu konfesa katak sira sei koopera hamutuk ho Tribunál no Ministériu Públiku inklui Polísia Nasionál Timor Leste (PNTL) bá kualkér investigasaun liga ho kazu jogu ilísitu bola guling.

Antes ne’e arguido sira kumpre ona detensaun oras 72  iha sela polísia Munisípiu Díli molok submete bá iha prosesu primeiru interrogatóriu iha Tribunál Judisiál Primeira Instánsia Díli.

Iha prosesu primeiru interrogatóriu nee, prezide husi juis turnu Jumiati Freitas, Ministériu Públiku reprezenta husi Prokuradór Reinato Bere Nahac no arguido sira hetan asisténsia legal husi Defensor Públiku, José Maria da Costa Guterres.

Jornalista Estajiáriu : Lazaro Pereira Quefi