Hatutan.com, (21 Marsu 2024), Díli—Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay husu bá Ministériu sira ne’ebé tutela bá MKAE atu hatudu prestasaun di’ak no tau prioridade bá programa IX Governu hodi lori duni dezenvolvimentu bá povu iha país ne’e.

Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay foto hamutuk ho Ministru Agrikultura, Pekuária, Peskas no Floresta (MAPPF), Marcos da Cruz, Ministru Komérsiu no Indústria (MKI), Nino Pereira, Ministru Transporte no Komunikasaun (MTK), Miguel Manitelo, Sekretáriu Estadu Formasaun Profisionál no Empregu (SEFOPE), Rogério Mendonça Araújo mo Sekretáriu Estadu Kooperativa (SEKOOP), Arsénio Pereira da Silva iha Faról, Kinta (21/03/2024). Foto: Tomé da Silva.

Francisco Kalbuadi Lay hato’o asuntu ne’e hafoin lidera sorumutu interministeriál sira marka prezensa mós hosi Governadór Banco Central Timor-Leste (BCTL), Helder Lopes iha Faról, Kinta (21/03/2024).

Lee Mós: Manipulasaun iha Foos Subsídiu, Empreza Importadór Husu Vise-PM Francisco Kalbuadi Lay Aprezenta Provas

Kalbuadi informa, durante enkonrtu Ministériu sira ne’ebé tutela iha MKAE halo avaliasaun dezempeñu servisu, nune’e mós konvida Governadór Banco Central Timor-Leste,  mai fo hanoin lubuk ida.

Nia hatutan, Ministériu ida-idak relata progresu servisu durante fulan balun no haree mós planu ba oin liu-liu ezekusaun  atu bele la’o nafatin iha korridór ida iha programa IX Governu nian.

“Iha avaliasaun ami nafatin fó énfaze bá programa sira IX Governu nian, liu-liu planu asaun Ministériu ida-idak nian tuir nesesidade ne’ebé hatur ona atu bele lori dezenvolvimentu ba povu. Ita sei esforsu atu Ministériu hotu-hotu bele ezekuta programa sira 2024 nian tuir metas no nafatin iha Planu estratéjiku dezenvolvimentu nasionál (PEDN) 2011-2030 nian,” Francisco Kalbuadi Lay esplika.

Iha fatin hanesan Ministru Agrikultura, Pekuária, Peskas no Floresta (MAPPF), Marcos da Cruz hateten, ministériu ne’e mai aprezenta servisu bá MKAE liga ho oinsa hasa’e produsaun iha rai laran.

Nia dehan, Ministériu sosa tiha tratór distribui bá munisípiu sira no Prezidente Autoridade sira mak jere no operasiona hodi ajuda povu agrikultór sira.

“Iha aprezentasaun ita relata katak, ministériu kontinua servisu hamutuk ho komunidade, hadi’a irrigasaun liuhosi ekipamentu pezadu sira ne’ebé tau iha Munisípiu hodi normaliza irrigasaun no hatama bee ba área ne’ebé durante ne’e abanonadu no mós área ne’ebé funsiona maibé iha udan boot estraga fali atu bele hadi’a produsaun povu agrikultór sira nian,” Marcos da Cruz hateten.

Aleinde mobilizasaun iha rekursu material sira, MAPPF kontinua mobiliza mós rekursu umanu liu hosi organiza estensionista sira hodi fó apoiu tékniku bá povu agrikultór sira atu bele hasa’e produsaun.

Ministériu sira ne’ebé tutela bá MKAE mak hanesan Ministériu Agrikultura, Pekuária, Peskas no Floresta (MAPPF), Ministéru Komérsiu no Indústria (MCI), Ministériu Transporte no Komunikasaun (MTK), Sekretáriu Estadu Formasaun Profisionál no Empregu (SEFOPE), no Sekretáriu Estadu Kooperativa (SEKOOP).

Jornalista: Vito Salvadór