Hatutan.com, (02 Abríl 2024), Díli—Primeiru-Ministru (PM), Kay Rala Xanana Gusmão husu bá Embaixadora Laura Abrantes atu estabelese kooperasaun importante haat ho país belun Comunidade dos Paises de Lingua Portuguesa (CPLP).

Primeiru-Ministru (PM), Kay Rala Xanana Gusmão hala’o enkontru ho Embaixadora Timor Leste bá CPLP Laura Abrantes iha palásiu Governu, Tersa (02/04/2024). Foto: GPM.

Rekomendasaun ida-ne’e PM hato’o iha Tersa 02 Abril 2024, iha Palásiu Governu, Dili, bainhira simu audiénsia hosi Embaixadora Laura Abrantes, ne’ebé mak sei reprezenta Timor-Leste (TL), hodi hala’o misaun iha CPLP.

Lee Mós: Embaixadór TL bá Cuba ho CPLP Simu Posse

Embaixadora Laura Abrantes informa, sorumutu ho PM Xanana ne’e atu husu orientasoens xefe Governu nian, tanba nia papél nu’ud’ar embaixadora iha CPLP importante oinsa halo leitura kle’an bá paízes no estadus membru sira CPLP nian, buka aprende, haree, depois halo análiza saida mak TL bele halo kooperasaun di’ak no metin liu tán.

“Iha pilár haat importante ne’ebé sai hanesan misaun embaixadora nian reprezenta país Timor-Leste ba CPLP,” Embaixadóra Laura Abrantes hateten hafoin hala’o enkontru ho Xefe Governu iha Palasiu Governu.

Nia sita pilár haat ne’e mak hanesan, primeiru Komité Konsentrasaun polítika permanente, segundu pilar maka divulgasaun ka difuzaun da Lingua Portuguêsa, terseiru maka kooperasaun iha áreas ne’ebé mak haree hosi estudus iha paizes estadus  CPLP ho TL, no kuartu pilár maka Komérsiu Emprezariál.

“PM Xanana husu atu tau aas interese polítika no ekononomia, edukasaun no asuntu prioridade seluk-seluk tán, hodi bele promove TL iha CPLP,” nia hateten.

Ida ne’e nia konsidera hanesan onra ida hanesan embaixadora Timor-Leste bá CPLP, iha obrigasaun atu mai fó hatene no ko’alia ho Primeiru-Ministru, husu orientasoens buat sira ne’ebé mak halo misaun ida hanesan reprezentante País Timor-Leste junta CPLP nian.

Embaixadora konsidera mensájen politika no motivasaun hosi Xefe Governu importante hodi orienta nia hala’o misaun ho susesu ezekuta orden xefe governu nian.

Embaixadora Laura simu posse hosi Prezidente Repúblika, José Ramos-Horta iha Palásiu Prezidensiál Nicolau Lobato, Dili, Kuarta (13/03/2024).

Tuir oráriu, iha fulan ne’e, Embaixadóra Laura sei arranka b’a Portugál hodi hala’o ninia kna’ar hanesan diplomata, hodi hametin liután diplomásia ho estadu membru sira CPLP nian.

Jornalista: Rogério Pereira Cárceres